1 ङा बल्‍ल चौध बर्स छींनी ङास बारनाबास स़ोनो तीतसनिलाई लाँद फरी यरूसलेमल ङाबाके। 2 नो ङाबाव ओल परमेस्‍वरए सतैंद ओयाँवनी ज़। होङ बाद नो छुत जातलावरालाई ङारासथैज़्‍याव परमेस्‍वरए ओपाँ ‘सिप्यानी ङारासथैज़्‍याव सैं बिप्‍यानी ङारासथैज़्‍याव?’ लिद नलाव मन्‍दलीलाव घेप्‍पाराए ल्‍योक अलगज़ा बाद ङाय़ेन भरी सतैंद ङाराएके। 3 नोराए मनी ङाय़ेनर भैंःद ङास बाव तीतसलाई छुत जातलाव*2:3 छुत जातलाव है लिसिउ ग्रीक खामनी — ग्रीक। ओतादी ब क्‍याल्‍न्‍या सरेस जैन्‍या कर मालैकेर। 4 खाली हो बेलाक नो दुप्‍सिद यालिज़्यावल तोबो ऩेब्‍लो ख्रीसए उमिनताव मिताव जैसिद, गेखार्ल पसिद साँना हुवर ब यालिज़्‍याव। नोराए गेलाई येसु ख्रीसए पला·द ओऱास्‍सिउनी फरी बाँदा मिताव जैव यापैंज़्‍याव। 5 गे फरी जेस लिज़्‍याव ख्रीसए साचो ओपाँ बले·र्‍या लिद नोराए यापाँ तोबो ब भैंःद गेमाराएके।

6 परमेस्‍वरए ओपाँताव घेप्‍पा मिन दैवराए ङा ङारासथैव परमेस्‍वरए ओपाँकिन छुत काता पाँ ज़ माचा·र। तान्‍या ते नोर जो मिताव यातादी ब ङालाई मतलब माले, परमेस्‍वए मिँ रँःद मादोव।2:6 ब्य १०:१७ 7 बुरू नोराए, किताव पत्रुसए यहूदीरालाई परमेस्‍वरए ओपाँ सथैन्‍या हक ओदैव याथ·रैव, हिताव ज़ ङालाई ब छुत जातलावरालाई परमेस्‍वरए ओपाँ सथैन्‍या हक ङादैव थ·रैनाकेर। 8 किताव परमेस्‍वरए ओल ओसक्तीनी पत्रुसलाई यहूदीरालाई ओपाँ सथैन्‍या ओसाची ओजैव, हिताव ज़ ङालाई ब ओल ओसक्तीनी छुत जातलावरालाई ओपाँ सथैन्‍या ओसाची जैनाक्‍यो। 9 आव य़ेनत परमेस्‍वरए ओअसिक ङादैव यासरेसोए परमेस्‍वरए ओपाँताव यामिन थासोर याकूब, पत्रुस स़ोनो यूहन्‍नाराए गिनलाई बारनाबासस यास सम समकाव य़ेनल गनिसिन्‍केर। है जैद गिनलाई छुत जातलावराए ल्‍योदा बान्‍या जैसिन्‍केर, या यहूदीराए ल्‍योदा बान्‍या थ·रैकेर। 10 नोराए गिनलाई तोबो पाँ वाज़ है दासिन्‍केर, नो यासकाव माथैंव मायो·वरालाई चिऊन्‍या। ङा ब नो पाँत खुसी ज़ ङाताके।

11 छींनी पत्रुस एन्‍तिओखियाल उलिज़्‍याक नोए मिँराए ङ़ाक ऩेय़ेन ओदोवए ओपाहा झाःद ङाएके। 12 नल पत्रुसए ङ़ादा याकूबए ओल्‍योङाव मिँर यामाहुवा पै छुत जातलाव मिँरास ज़्‍यान्‍यार सिप ज़ उज़्‍युज़्‍याव। खाली पत्रुस क्‍याल्‍न्‍या सरेस जैव पैंज़्यावरास ओछे·ज़्यावए याकूबए ओरापरींव मिँर याहुवत नोरालाई रँःद नो छुत जातलावराकिन जाँ तँदा जैसिद नोरास ज़्‍यान्‍यार ब सिप माज़्‍युक्‍यो। 13 हाःकिन नो सहरलाव परमेस्‍वरए ओपाँत हुव यहूदीराए ब ओल मिताव ज़ ऩेय़ेन दोनाकेर। छींनी झन बारनाबास ब नोराए याय़ेनदा ज़ खैनाके। 14 नोराए ख्रीसए ओपाँ साचोस यामादोज़्‍याव ङारँःवए ङा प़ाइँराए ङ़ाक च्‍याँःसिद पत्रुसलाई है ङादोके, “नँ यहूदी ताद ब यहूदी चलन ऱास्‍द छुत जातलाव मिताव नजैसिके। नँ निताव जैसिउ मिँए फरी कै जैद छुत जातलावरालाई झन यहूदी जैसिउ नरापरींज़्याव?”

15 नोलाई है ङादोवए ओअर्थ आव ज़ — ‘गे जर्मननी ज़ यहूदीर गेलिज़्या, छुत जातलाव मिताव पापीर गेमाले’ है गेलिदी ब, 16 मोसाए ओकानुननी सु ज़ परमेस्‍वरए उयुँलाव तान्‍या माताए, येसु ख्रीसलाई युँ हुप्‍न्‍यानी वाज़ ताज़्‍या लिन्‍या गेसैंज़्या। है जैद गे परमेस्‍वरए ओपाँत हुव यहूदीराए मनी नो पाँ साचो ज़ गेथ·रैवए गे मनी येसु ख्रीसलाई गेयुँ गेसुहुप्‍के।2:16 भज १४३:२

17 गे ख्रीसनी धर्मी थ॰रिन्‍या धामा दाज़्याव यहूदीरालाई मनी छुत जातलावराए माँःती पापी याथ·रैसिज़्याव ताकिन, ख्रीसए माचाव य़ेन ओदोव रोकी? हिताव ते माःक। 18 बुरू गे फरी नो ङ़ादाङाव मिताव मोसाए ओकानुननी धर्मी जैसिन्‍या गेखिम्‍किन झन ननी ज़ पापीर गेगनिसिज़्‍या। 19 ङा परमेस्‍वरए उयुँलाव मिताव ङाताक लिद, ङालाई सिन्‍या सजाल झाःज़्‍याव मोसाए ओकानुननी ङामिन क्‍याल्‍द ङापुलुस्‍के। 20 है जैद ङा ख्रीसस क्रुसत तङ्गैसिद ओलस ङासिउ मिताव ज़ ताके। हैदी ब ङा ङामासिए, जींदो ज़ ङालिज़्‍या। खाली नो जींदो लिज़्‍याव ङा माःक, नो ङास लिज़्‍याव ख्रीस ज़। अबकिन आव ङाजिउ ङा ङाजूँनी माःक, ङालाई उयुँ नाद उजिउ झाःद्याज़्याव परमेस्‍वरए ओज़ाए उजूँनी ङायुँ हुप्‍द ज़ ङादोज़्या। 21 परमेस्‍वरए उयुँ गराँद, दाद ओयासिउ य़ेनलाई अऩाकलाव ङामाजैए। गे मोसाए ओकानुननी परमेस्‍वरए ओङ़ाक उयुँलाव मिताव गेताज़्‍याव ताकिन गेजूँनी ख्रीस उसिउ अऩाकलाव ज़ ताखेहो।