8
साःरो बाचानिकाव प्रधान पुजारी
1 आव है गेदाचिज़्यावए ओअर्थ आव ज़, गे गेप्रधान पुजारी येसु स्वर्गत बाद माहान परमेस्वरए उसिंहासनए ओवोर्दा च़ुसिद ले।8:1 भज ११०:१ 2 नल परमेस्वरए ओङ़ाकाव चोखो पोल गेलाई परमेस्वरस सखैन्याए जूँनी ओय़ेन दाव ज़ नैज़्याव। नो चोखो पो मिँए जैसिउ मिताव माःक, आव ते परमेस्वरए ओजैव साचो पो ज़।
3 कानुननिकाव प्रधान पुजारीर मिँराए परमेस्वरस खैन्या यादोव पुजा चरैःद्यान्याए जूँनी खतैसिउर यालिज़्याव। है जैद गेप्रधान पुजारीए ब गेजूँनी कातार चरैःद्याव ज़ परिके। 4 खाली गेप्रधान पुजारी आःपै आव मानुवात ओल्यो ताकिन निताव पुजारी य़ेन मादैखेहो। निताव य़ेन दैन्यार ते कानुननिकाव पुजारीर ज़ लिज़्यार। 5 नोराए याय़ेन स्वर्गत छींनीकाव तान्याए ओसाँ सतैंसिउ मिताव वाज़ लिज़्या। काराव ल्यो ताकिन मोसाए नो चोखो पाल जैव ओपैंज़्याक परमेस्वरए है दोक्यो,
“नो पाल नजैक खागरताव सतैंद ङाईंव गोइँनी वाज़ जैयो।”8:5 प्रस २५:४०
6 खाली ङ़ादाकिनकाव पुजारीराए यादैव य़ेनकिन येसुए ओदैव य़ेन घेप्पा लिज़्या। नोए ओय़ेन कातानी ओघ्योःव लिक ते, परमेस्वरए मोसालाई ओयो य़ाकाराकिन येसुए ल्योनी ओयासिउ य़ाका घेप्पा ओतावए येसुए मिँर स़ोनो परमेस्वरसकाव याखार्लाव ओसखैज़्याव बाचा घेप्पा लिज़्या।
7 नो मोसानी परमेस्वरए मिँरालाई उस॰कताव ओरायो बाचा नत ज़ उतुपैव ताकिन छुत जैन्या ओमेला ज़ मालिखेहो। 8 खाली परमेस्वरए नो उमींरालाई याखत ल्योर थ·रैद अइ लिद पाँके,
“छींनी तछा इस्राएल स़ोनो यहूदा कुललाव ङामींरास साःरो बाचा ङानैरिज़्या।
9 नो बाचा यासाखा पुर्खारासकाव ङानैव मिताव ते तान्या माले।
हो बेलाक ङामींरालाई इजिपनी याकुइनी दोरैद पले·द, बाचा ङाराएके।
खाली नोर ङाबाचाल यामाल्योए ङामाराचिऊके।
10 छींनी तछा इस्राएलीरास इताव साःरो बाचा ङानैरिज़्या,
ङाकानुन यायुँल झाःद्याद, ङापाँर यायुँल सर्द ङाराएरिज़्या।
हुनी ज़ ङा यापरमेस्वर तान्या ङाले, या ङामींर तान्या लेर।
11 हो बेलाक छुतलाई ङापाँ पैव परिन्या ब तान्या माले,
ओभाइलाई, ‘परमेस्वर सरेस्के’ है दाव ब परिन्या माले।
काराव ल्यो ताकिन घेप्पा ज़िम्ज़ाराए प़ाइँए ङालाई सरेस्न्या लेर।
12 नोरालाई ङायुँ नाद यादोव पापर ऱास्द्याद फरी य़ाका ज़ दान्या ङामाले।”8:8-12 यर ३१:३१-३४
13 नो सर्सिउल परमेस्वरए “साःरो बाचा ङानैरिज़्या” है ओल्योए ङ़ादाङाव बाचा भरी पुराँदो थ·रैक्यो। है जैद पुराँदोए ओपोल साःरो ओताव प़ाइँना पुराँदो भरी म़ाके।