1 ङा, गेपरमेस्‍वर स़ोनो गेप्रभु येसु ख्रीसनी निसेवा दोज़्‍याव याकूबए ङाल्‍योनी जे चितराँ पुतराँ ताद लिज़्‍याव इस्राएली बाह्र थरलाव परमेस्‍वरए उमिनत लिज़्‍यावरालाई जेरो लिज़्‍या।

2 अ ङानैं ङामेंर, भाँती भाँतिलाव दुखर जेदैक ‘चाव ज़ लिज़्‍या’ लिद थ·रैच्‍यो, 3 काराव ल्‍यो ताकिन युँ हुप्न्‍यात जाँचर उहुकिन वाज़ थ॰रिउ युँ ताज़्‍या। 4 निताव थ॰रिउ युँ दैन्‍याए जूँनी नो दुखर उहुकिन घुहुज़्याक। ननी ज़ जे परमेस्‍वरए ओपाँत थ॰रिउर, छिबोर, कान्‍त ज़ जेखत माल्‍योर तान्‍या जेले।

5 जो य़ेन जेमासैंए, होए उजूँनी परमेस्‍वरलाई पोंखारिद ऩिउ ताके। हो ताकिन ची प़ाइँलाई उयुँ य़ाल्‍द उयुँ माकैद याज़्‍याव परमेस्‍वरए ओल ज़ पैन्‍या ले। 6 खाली नो मिँए, “जुनी ब याँवा ज़,” लिद उयुँ सुहुप्‍द ओपोंखारिउक। उयुँ माहुप्‍द पोंखारिज़्‍याव मिँ ते बतासए आदानी होदा ओख्याज़्‍याव समुन्‍द्र स्‍यासो ज़ ताज़्‍या। 7 है जैद निताव मिँए ते, “परमेस्‍वरनी ङाऩिउ भरी ङादैया ज़,” है ओमालिदी ब ताए। 8 नोए उयुँ खर्क ज़ तोबो पोक माथ॰रिए।

9 परमेस्‍वरए ओपाँत बाज़्‍याव मिँ आव मानुवात कान्‍ल ज़ मागनिसिउ ज़िम्‍ज़ा उलिदी ब ‘परमेस्‍वरनी ते घेप्‍पाल गनिसिउ ङालिज़्‍या’ लिन्‍या ओसम्‍जिउक। 10 धनी मिँए फरी ‘ङास लिज़्‍याव भरी परमेस्‍वरनी ते काता ज़ माले’ है लिन्‍या ओसम्‍जिउक। नो धनी मिँ ते वास वैद उथँज़्‍याव मिताव ज़ तान्‍या ले। 11 ख्यो·व नमल निमी बनै य़ेप य़ेप ऱाव बतासस उहुक छी भरी थँद वासराए यावैर ब गलिद याजोबन ज़ म़ाज़्‍या। हो मिताव ज़ मिँ ब धनी उलिदी ब ओल उसिक ओधन ब खेम्‍ज़्‍या, उमिन ब म़ाज़्‍या। 1:10-11 यसै ४०:६-७

12 धो सहिउ दुखर सहिज़्‍याव मिँ असिक दैव मिँ ज़। निताव जाँचरानी उथ॰रिकिन नोए परमेस्‍वरनिकाव अजम्‍बरी जुनी दैरिज़्‍याव। परमेस्‍वरए ओल्‍योदा यायुँ थू जैज़्‍यावरालाई नो जुनी यान्‍या य़ाका ङ़ादाकिन ज़ नैद ओराएज़्‍याव। 13 खाली सुवारालाई यायुँए बिप्‍यादा लाँवा लाँवा ओराजैकिन आव जाँच परमेस्‍वरनी हुव ज़ है तालिरक। यायुँए ज़ है याजैज़्‍याव। परमेस्‍वरए उयुँ माचावदा खर्क ज़ माबाए, छुतरालाई ब माचावदा बान्‍या युँ जैद मारायो। 14 बुरू मिँर या यालोभए ज़ यायुँलाई माचावल पारैज़्‍यार। 15 ननी ज़ यायुँलाव माचाव पाँए माचाव य़ेन ब जर्मैज़्‍याव। नकिन नो माचाव य़ेन ओयो·वत सिन्‍या सजाल झाःव दोज़्‍याव।

16 ङायुँलाव ङानैं ङामेंर, जे ताझुकिच्‍यो। 17 गेलाई जुरिद हुज़्‍याव चाव स़ोनो छैंव भरी खर्क ज़ मात़ोसिज़्याव चुम चुमोलाई पलाँव जैज़्‍याव स्‍वर्गताव गेबाबु परमेस्‍वरए ल्‍योनी ज़ हुज़्‍या। 18 ओरासिर्जैव भरिरानी गेलाई ‘साःरोल ङ़ाताव सै मिताव घतारक’ लिन्‍या उयुँ ओतावए ज़ साचो ओपाँनी ओल ओथोल जर्मैसिक्‍यो।

19 ङायुँलाव ङानैं ङामेंर, आव ब सैंच्‍यो, चाव पाँ थैन्‍यात झाःसिद लिच्‍यो, पाँन्‍यात तहस पाँच्‍यो, जेरिस हतप्‍त ताचोक। 20 काराव ल्‍यो ताकिन मिँए उरिसनी परमेस्‍वरए ओपैंज़्‍याव मिताव धर्मलाव य़ेन खर्क ज़ मासयो·धुव। 21 है जैद जेसकाव लिज़्‍याव कुबानी बानीर स़ोनो बले·न्‍या पाँर ऱास्‍द उघुरिउर ताद जेलाई बाँचैधुज़्‍याव जेयुँलाव वास्‍सिउ परमेस्‍वरए ओपाँ चावस सपरीव ताके।

22 खाली जे परमेस्‍वरए ओपाँ थैज़्‍यावर वाज़ माःक, दाज़्‍यावर ब जैसिउ ताके, म़ानी जेक्‍याँलाई जे ज़ धोका यान्‍या जेले। 23 जोए परमेस्‍वरए ओपाँ थैद ओमादोकिन, नो मिँ धर्पनल अइज़ उचिऊसिउ मिताव लिज़्‍या। 24 नो मिँ नल चिऊसिद ननी ओबाव प़ाइँना ‘ङा इताव ङाल्‍यो’ लिन्‍या ब मेंःज़्‍याव। 25 खाली जोए पापनी पले·ज़्‍याव ओखत माल्‍यो परमेस्‍वरए ओकानुनलाई बनै चावस चिऊद मामेंःद थैद ओदोकिन, ननी ज़ परमेस्‍वरए ओअसिक दैन्‍या ले।

26 जोए, “ङा ते धर्मी ची,” है लिज़्‍या, खाली ओसेलाई ओमाजोगोइधुकिन, नो मिँ ओलनी ज़ झुकिज़्‍या, स़ोनो ओधर्म ब अऩाकलाव ज़ ताज़्‍या। 27 गेबाबु परमेस्‍वरए ओङ़ाक साचो ओकप्‍तैं माल्‍यो धर्म इतावनी ज़ ताज़्‍या — तुहुरा तुहुरीर स़ोनो राँदी मेंमारालाई यादुखल चिऊन्‍या, स़ोनो आव मानुवाताव पापरानी अछतङ लिद छैंवस लिन्‍या लिज़्‍या।