1 ऱील सछैंज़्‍याव यूहन्‍नाकिन येसुए मिँर कुधु ओल्‍योदा जैद ऱील यासछैंज़्‍याव दी लिन्‍या फरिसीराए थैकेर। 2 हैदी ब सछैंज़्‍याव ओल येसुए ते माःक, उसिसराए ची। 3 है जैद येसुए निताव पाँ सैंद यहूदियालाई ऱास्‍द ङ़ादाङाव उलिज़्‍याव गालीलदा ज़ बाके। 4 नदा बान्‍या सामरिया खन्‍दलाव घ्याँ बाव उपरिज़्‍याव। 5 नलाव घ्याँ ओबाज़्‍याक सामरियालाव तोबो सुखार यादोज़्‍याव नाखारल हुके। नो नाखार याकूबए ओज़ा योसेफलाई ओयो पो छ्योक उलिज़्‍याव।4:5 उत ३३:१९; यहो २४:३२ 6 नक याकूबए ओघोव कुवा ब उलिज़्‍याव। है जैद येसु बाद बाद बनै उथलिउए अधमर लावाक नो कुवाक ऩासिके।

7 हाःत ज़ सामरियालाव तोबो मेंमा ऱी गप्‍ना हुके। येसुए नोलाई, “ङालाई ऱी तुपुरू ओन्‍या याव ताके,” है दोक्‍यो। 8 नो बेलाक उसिसर नाखार जीदा ज़्‍यान्‍यार लँःना बाद यालिज़्‍याव। 9 नो मेंमाए येसुलाई, “नँ यहूदी ताद कै जैद ङा सामरी मेंमाए ङाकुइताव ऱी ओव नपैंज़्‍याव?” है दोक्‍यो। हाः बेलाक यहूदीर सामरीरास काता सर्‍यो ज़ यामानैज़्‍याव।*4:9 छुत बुझिन्‍या — यहूदीर स़ोनो सामरीर यामाछुसिज़्याव।4:9 एज्रा ४:१-५; नहे ४:१-२ 10 येसुए नोलाई, “परमेस्‍वरए नँलाई याव ओपैंज़्‍याव ब नमासैंए, नँस ऱी ऩिज़्‍यावलाई ब नमासरेसे। होलाई नसरेसो ताकिन नँ ची होस ऩिन्‍या नल्‍यो। होए नँलाई जींदो ऱी यान्‍या ओल्‍यो,” है ओदोक ते, 11 नो मेंमाए, “प्रभु, नँस ऱी गप्‍न्‍या जा ब माले, कुवा ब बनै पतालल लिज़्‍या। कातानी नो जींदो ऱी नयाँरिज़्‍याव? 12 आव कुवा ते गेपुर्खा याकूबए ओघोव ची। आव कुवानी ज़ ओज़ार स़ोनो ओहार बेधाराए ऱी याओज़्‍याव। काता नँ याकूबकिन ब घ्योःव नलिज़्‍याव रो?” है ओदोक ते, 13 येसुए, “आव कुवानी ऱी ओज़्‍याव फरी ब छोस्‍न्‍या ले। 14 ङा ङाराएज़्‍याव ऱी ओज़्‍यावर ते खर्क ज़ छोस्‍न्‍या मालेर। बुरू नो ऱी नोए ओक्‍याँत परीज़्याव ऱीमुल स्यासो तान्‍या ले। नोए ज़ अजम्‍बरी जुनील सकेस्‍न्‍या ले,” है ओदोक ते, 15 नो मेंमाए, “हो ची ताकिन्‍दा प्रभु, ङालाई नो ऱी याव ताके। ङा फरी खर्क ज़ ऱी ब छोस्‍न्‍या ङामाले, गप्हुव ब परिन्‍या माले,” है दोक्‍यो।

16 नकिन येसुए नोलाई, “नँ नझ़िमक बान्‍केदा, नरेलाई खुल्‍द रैके,” है ओदोक ते, 17 नो मेंमाए, “ङा ङारे ज़ माले,” है ओदोक ते, येसुए, “ ‘ङारे माले’ है नलिज़्‍याव ते साचो ज़। 18 नरेर पाँच जना ताधुकेर। आज्‍याल नँस लिज़्‍याव ब नरे माःक। नो नपाँ ते साचो ज़,” है दोक्‍यो। 19 नो मेंमाए, “प्रभु, नँ ते अगमबक्ता ची नल्‍यो लिद ङासरेस्‍निके। 20 गे सामरीराए गेसाखा पुर्खाराए भाःकिन ज़ आव दाँदात पुजा दोहुकेर। जे यहूदीर ते ‘परमेस्‍वरए उपुजा यरूसलेमल वाज़ दान्‍या ताए’ है जेलिज़्‍या,” है ओदोक ते, 21 येसुए नोलाई, “अ माँ, ङालाई पतिनायो, तछा स्‍वर्गताव ङाबाबुए ओसेवा आव दाँदात स़ोनो यरूसलेमल वाज़ तान्‍या माले। 22 जे सामरीराए परमेस्‍वरए ओसेवा मासैंद ज़ जेदोज़्‍या, गे ते सैंद ज़ गेदोज़्‍या। बाँचिन्‍या येम यहूदीराए ल्‍योनी वाज़ ताज़्‍या। 23 खाली तोबो बेला हुज़्‍या, नो हुद ब ले। नो बेलाक साचोस परमेस्‍वर बाबुए ओसेवा दोज़्‍यावर साचो युँनी ज़ दान्‍या लेर। परमेस्‍वर बाबुए ओसेवा दान्‍यार नितावर ज़ याखिम्‍ज़्‍याव। 24 परमेस्‍वर ते पुरूस ज़। है जैद ओसेवा दोज़्‍यावराए साचो युँनी ज़ दोज़्‍यार।” 25 हाःत ज़ नो मेंमाए, “ख्रीस यादोज़्‍याव मसीह हुरिज़्‍या लिन्‍या ङासैंज़्‍या। हो हुद आव पाँ भरी ओपो·स ज़ गेलाई पलास्‍द्यान्‍या ले,” है ओदोक ते, 26 येसुए नोलाई, “नँस पाँज़्‍याव ङा हो ज़,” है दोक्‍यो।

27 हाःत ज़ येसुए उसिसर नाखारनी केस्‍हुकेर। येसु तोबो मेंमास ओपाँज़्‍याव रँःद अचम्‍ब ताकेर। खाली येसुलाई, “काता नखिम्‍ज़्‍याव, काताए जूँनी जिन्पाँज़्‍याव?” सुए ज़ है मादोधुकेर। 28 हुकिन नो मेंमाए ओघागरीर ख्यानैद नाखारदा बाद नलाव मिँरालाई, 29 “हुचिके, तोबो मिँलाई गेचिऊना। होए ङादोव य़ेन भरी ज़ है दाँक्‍यो। सैं ख्रीस नो ज़ ओताव?” है ओरादोक ते, 30 नो नाखारलाव मिँर ननी पुलुस्‍द येसुए ल्‍योक बाकेर।

31 नो मिँर येसुए ल्‍योक यामाकेस्‍हुद ज़ उसिसराए, “गुर्बा, आव गेरैव ज़्‍यावर ज़्‍युके,” है यादोक ते, 32 येसुए, “जे जेमासैंज़्‍याव ज़्‍यावर ङास ज़ लिज़्‍या,” है ओरादोक ते, 33 उसिसर या याल, “सुवाराए ओललाई ज़्‍यावर रैद यायो सैं?” है यालिज़्‍याव थैद, 34 येसुए नोरालाई, “ङा ङाज़्‍याव ते ङालाई परींज़्‍यावए उयुँलाव मिताव य़ेन दाद, ओय़ेन सयो·न्‍या ची। 35 जे है जेलिज़्‍या, ‘एँःलाव गेझाःव धुर चार मैना छींनी वाज़ क्‍या·न्‍या ताज़्‍या।’ ङा ते है ङादाचिज़्‍या, एँःदा भाल्‍सिचिके, क्‍या·न्‍या बेला ताद ले। 36 आख मनी नो क्‍या·ज़्‍यावए ओजेला दैज़्‍याव, ओदोव य़ेन मनी अजम्‍बरी जुनी पै रहिन्‍या ले। है जैद वास्‍ज़्‍याव स़ोनो क्‍या·ज़्‍यावनी तछा सिप ज़ रेंन्‍या लिनी। 37 याझाःज़्याव आहाती साचो ज़ थ॰रिज़्‍या — ‘तोबोए वास्‍ज़्‍याव, तोबोए क्‍या·ज़्‍याव।’ 38 हिताव ज़ ङा मनी जेलाई जे काता ज़ जेमादोव पोल क्‍या·ना परींद ङानैचिए। छुतराए यादोव य़ेननी जेजुँ दैन्‍या जेले,” है यादोक्‍यो।

39 नो सामरी मेंमाए नो नाखारलाव मिँरालाई, “येसुए ङा ङादोव य़ेन भरी प़ाइँ ज़ पाँद्याँक्‍यो,” है ओरादोवए नलाव सामरीर कुधुए ज़ येसुलाई यायुँ हुप्‍के। 40 है जैद येसुए ओल्‍योक हुद, “नँ गेस ज़ ल्‍यो ताके,” है यादोक ते, येसु यास ज़ ऩेला लिके। 41 नोर येसुए ओपाँ थैद झन कुधुए ज़ यायुँ हुप्‍के। 42 नो मेंमालाई, “अब ते नँ नपाँ थैद वाज़ माःक, आव गेर्नाए ज़ ओपाँ थैद, ‘आव ज़ ओल्‍यो मानुवाताव मिँरालाई बाँचैना हुव ख्रीस’ लिन्‍या थ·रैद गेयुँ हुप्‍के” है दोकेर।

43 येसु नल ओल्‍यो ऩेला ओतावत ननी पुलुस्‍द गालीलदा बाके। 44 ओल येसुए मनी है उलिज़्‍याव, “अगमबक्तालाई ओनाखारलाव मिँराए सुए ज़ ओमान नैद माएर।” 45 येसु गालीलल उहुवत नलावराए ओमान नैद्याद चावस नैकेर। नलावराए ङ़ादा यरूसलेमलाव पर्बत येसुए ओदोव य़ेन भरी रँःद यानैज़्‍याव।

46 येसु फरी गालीललाव काना यादोज़्‍याव नाखारल हुके। नल ज़ ङ़ादा ऱीलाई दाखमद्य ओजैव। नाः बेलाक ज़ राजाए तोबो ओकर्मचारीए ओज़ा कफर्नहुम सहरल ओजोरो उहुज़्याव। 47 है जैद नो कर्मचारीए, ‘येसु यहूदियानी गालीलल हुद ले दी’ लिन्‍या थैद, येसुए ल्‍योक बाद सिउ पैंज़्याव ओज़ालाई सगराँन्‍याए जूँनी ओलस लाँव ओपैंज़्‍याक, 48 येसुए नोलाई, “जे सरेसर स़ोनो अचम्‍बलाव य़ेनर जेमारँःवा जेमापतिए,” है ओदोक ते, 49 नो कर्मचारीए, “प्रभु, ङाज़ा उस॰ ओमाफ्या·द तखेप हुद्याव ताके,” है दोक्‍यो। 50 नाःत ज़ येसुए नोलाई, “बान्‍के, नज़ा गराँधुके,” है ओदोव प़ाइँना नो मिँ उयुँ हुप्‍द उझ़िमदा बाके। 51 नो ओबाज़्‍याक ज़ ओनोकोरर झ़िमनी ओलस दैसिहुद, “नज़ा गराँधुके,” है यादोक ते, 52 होए, “नो खा बेलाकिन ओगराँव?” है ओरादोक ते, “आझ्‍यो लाकाव एक बजेकिन ओजोरोए ऱास्‍क्‍यो,” है दोकेर। 53 नाःत ज़ नो कर्मचारीए, “येसुए ङालाई ‘नज़ा गराँधुके’ है ओदाँव बेला ब नाःक ज़ ओल्‍यो,” लिन्‍या सैंक्‍यो। है जैद ओल स़ोनो उझ़िमलावरास येसुलाई यायुँ हुप्‍के। 54 येसु यहूदियानी हुद गालीलल अचम्‍बलाव य़ेन ओदोव आवस ऩेखेप ताके।