1 येसुए आव भरी पोंखारिद उसिसरास किद्रोन घैरा होफताव बगैचाल बाकेर। 2 नो पो येसुलाई सूँपिज़्‍याव यहूदा इस्‍करियोतए मनी सैंद ओनैज़्‍याव। येसु उसिसरास एकतार नो पोक याबाज़्‍याव। 3 है जैद यहूदा इस्‍करियोतए फरिसीर स़ोनो मुख्या पुजारीराए यारापरींव ध्‍यान झ़िमलाव पाल्‍यार स़ोनो सिपाईंर लाँद नो बगैचाल बाकेर। नोरास हत्‍यारर, लाल्‍तिनर भाँर ब लाँद यानैज़्‍याव। 4 येसुए ओक्‍याँत हुरिज़्‍याव दुखर सैंद ओल ज़ नोराए याल्‍योक बाद, “जे सुलाई जेखिम्‍ज़्‍याव?” है ओरादोक ते, 5 नोराए, “नासरतलाव येसुलाई,” है दोकेर। नाःत ज़ येसुए, “हो ताकिन ते नासरतलाव येसु ङा ज़,” है यादोक्‍यो। येसुलाई धोका याज़्‍याव यहूदा इस्‍करियोत ब नोरास नक ज़ च्‍याँःसिद उलिज़्‍याव। 6 येसुए, “ङा हो ज़,” है ओरादोव प़ाइँना नोर प़ाइँ ज़ याछींदा सरिद पल्‍तिकेर। 7 येसुए फरी ब, “जे सुलाई जेखिम्‍ज़्‍याव?” है ओरादोक ते, “नासरतलाव येसुलाई,” है दोकेर। 8 येसुए, “जेलाई आछ्या ज़ ‘ङा हो ज़’ है ङामादाचिउ रो? साचो ङालाई वाज़ जेखिम्‍नाज़्‍याव ताकिन आव ङानैंरालाई बाव याराएचिके,” है यादोक्‍यो। 9 नो है ओरादोव ङ़ादाङाव ओपोंखारिकाव मिताव ‘तोबो ज़ कै मै तातारक’ है ओल्‍यो पाँ सयो·न्‍याए जूँनी ज़ है ओरादोव। 10 हाःत ज़ सिमोन पत्रुसए ओतरवाली हाइद प्रधान पुजारीए ओनोकोरलाई वोर्निकाव ओर्ना पल्‍द सतेदिक्‍यो। नो नोकोरए उमिन माल्‍खस ओल्‍यो। 11 येसुए पत्रुसलाई, “नतरवाली उसिपल झाःके। ङाबाबु परमेस्‍वरए गोइँद ओयाँव दुखर ङा कै जैद मासहिन्‍या?” है दोक्‍यो।

12 हाःत ज़ नक लिज़्‍याव कप्‍तान, उसिपाईंर स़ोनो यहूदीराए यास़ेरराए यारापरींव पाल्‍याराए येसुलाई क्‍योःद किद, 13 हन्‍नासए ओल्‍योक लाँकेर। नो हन्‍नास नो साललाव प्रधान पुजारी कैयाफाए ओबागे ओल्‍यो। 14 नो कैयाफाए ज़ ङ़ादा यहूदीराए यास़ेररालाई, “प़ाइँ यासिज़्‍याव देखा बुरू नोराए पोल तोबो सिन्‍या पाथ लिज़्‍या,” है दाद सल्‍ला याज़्‍याव मिँ।

15 हाः बेलाक पै सिमोन पत्रुस स़ोनो छुत तोबो उसिस येसुए उछीं उछीं निबाज़्‍याव। नो तोबो उसिस प्रधान पुजारीस ङ़ादाकिन ज़ निसरेस्‍सिज़्‍यावए नो उसिस प्रधान पुजारीए ओचतराक पै येसुस ज़ बाके। 16 सिमोन पत्रुस ते साँबिलाक च्‍याँःसिद उलिज़्‍याव। नो प्रधान पुजारीस सरेस्‍सिउ उसिस ओल्द बाद साँबिलाक पाल्‍या लिज़्‍याव ल़ुज़ालाई है दाद पत्रुसलाई ओलस ज़ चतराक लाँक्‍यो। 17 पत्रुस साँबिलाक उपसिज़्‍याक नो ल़ुज़ाए, “नँ ब नो मिँए उसिस ज़ सा?” है ओदोक ते, पत्रुसए, “अहँ, ङा माःक,” है दोक्‍यो। 18 नो चतराक नलाव य़ेन दाज़्‍यावर स़ोनो पाल्‍यार याज़्‍यूँःवए मेंः दाद यामुइँसिज़्‍याव। पत्रुस मनी नोराए ल्‍योक बाद मेंः मुइँसिनाके।

19 नकिन नो प्रधान पुजारीए येसुलाई ओरापैज़्याव स़ोनो उसिसराए जूँनी ओखोले·क ते, 20 येसुए, “ङा ङारासिऊज़्‍याव पाँर म़ोंसिद माःक, प़ाइँए रँःन्‍याक, प़ाइँए ङ़ाक ज़ ङारापैज़्‍या। यहूदीर यादुप्‍सिज़्याव धर्मसास्‍त्र झ़िम झ़िमक स़ोनो ध्‍यान झ़िमल ज़ ङारासथैके। 21 काराव ङालाई नखोले·नाज़्‍याव? ङापाँ थैवरालाई ज़ यासुधिके, नोराए ज़ नँलाई है दान्‍या लेर,” है ओदोव प़ाइँना ज़, 22 नक लिज़्‍याव तोबो पाल्‍याए, “नँ कै जैद नाःल्‍दिउ प्रधान पुजारीस याः नदोज़्‍याव?” लिद तखेप लप्‍तैक्‍यो। 23 हाःत ज़ फरी येसुए, “ङा मापाँन्‍या ङापाँव ताकिन ङागल्‍ती सतैंके, ङा थिक ज़ ङापाँज़्याव ताकिन काराव नप़ोनाज़्याव?” है दोक्‍यो। 24 नकिन हन्‍नासए येसुलाई किसिउ ज़ प्रधान पुजारी कैयाफाए ल्‍योदा परींक्‍यो।

25 नाःपै सिमोन पत्रुस लाँःक च्‍याँःसिद मेंः मुइँसिउ ज़ उलिज़्‍याव। नक लिज़्यावराए, “नँ ब नोए उसिस ज़ सा?” है यादोक ते, पत्रुस माभैंःद, “ङा हो माःक,” है यादोक्‍यो। 26 प्रधान पुजारीए तोबो ओनोकोर, ङ़ादा पत्रुसए ओर्ना पल्‍द सतेद ओएज़्‍यावए ओक्‍याँदाङाव ब नक उलिज़्‍याव। होए मनी पत्रुसलाई, “नँलाई आछ्याक येसुस बगैचाल नलिज़्‍याव ङारँःनिउ सानी,” है ओदोक ते, 27 पत्रुसए फरी ब माभैंःद, “ङा माःक,” है ओदोव प़ाइँना ज़ भाल्या कोके।

28 नकिन छकाल्‍न्‍या घग ज़ कैयाफाए उझ़िमनी येसुलाई रोमी हाकिमए ओमहलल लाँकेर। नो लाँज़्‍याव यहूदीर ते, ‘झुथो ताद निस्‍तार पर्बत भत्‍यार ज़्याव गेमादैया’ लिन्‍या छ्यासए महलल मापसिकेर। 29 है जैद हाकिम पिलातस ओल ज़ महलनी लाँःक पुलुस्‍द नोराए ल्‍योक बाद, “जे आव मिँलाई काता ओखत पले·द जेएज़्‍याव?” है ओरादोक ते, 30 प़ाइँए ज़ तपाँ जैद, “आवए ओखत ओमाल्‍यो ताकिनी, नल्‍योक काराव गेरैरिज़्‍याव?” है यादोक ते, 31 पिलातसए, “जे ज़ लाँद जे यहूदीराए जेकानुननी ज़ फाल्‍चिके,” है ओरादोक ते, यहूदीराए यास़ेरराए, “गे गेकुइत सैःन्‍या हक माले,” है दोकेर। 32 नो पाँत ज़ येसुए ङ़ादा ‘इतावनी ङासिरिज़्‍या’ है उलिज़्‍याव पाँ यो·के।

33 नकिन पिलातस महलल पसिद येसुलाई खुल्‍द, “नँ साचो यहूदीराए याराजा ज़ रो?” है ओदोक ते, 34 येसुए, “आव पाँ नँ ज़ नसैंव सैं ङाजूँनी सुवाराए है यादींव?” है ओदोक ते, 35 पिलातसए, “ङा काता ङासैंए, ङा यहूदी माःक। नँ नजातलाव मिँर स़ोनो मुख्या पुजारीराए ज़ ङाल्‍योक रैद नैनिर। नँ मादान्‍या य़ेन काता नदोव?” है ओदोक ते, 36 येसुए, “ङा ङाराज्‍या आव मानुवाताव माःक। ङाराज्‍या मानुवाताव ताकिन, आव ङालाई क्‍योःज़्‍याव यहूदीराए कुइनी जोगोइन्‍याए जूँनी ङाधूँलावर खप्‍सिना हुखेरहो। खाली ङा ङाराज्‍या आलाव माःक,” है दोक्‍यो। 37 हाःत ज़ पिलातसए फरी, “हुकी नँ राजा ज़ रो?” है ओदोक ते, येसुए, “ङा राजा ङालिज़्‍याव नँ ज़ है नदाँज़्‍या सानी। होए उजूँनी ज़ ङा आव मानुवात जर्मिद साचो पाँए ओगोहाई याना ङाहुके। है जैद सतलाव पाँल लिज़्‍याव भरी ङापाँ थैद दोज़्यार,” है ओदोक ते, 38 पिलातसए, “सतलाव पाँ काताकी?” है दाद लाँःक यहूदीराए ल्‍योक बाद, “ङा आव जेरैव मिँए ओखत कान्‍त ज़ ङामादैए। 39 जेकानुनल निस्‍तार पर्ब छ्याम तोबो कैदीलाई ऱास्‍न्‍या चलन लिज़्‍या। है जैद सैं आथ पाला आव यहूदीराए याराजालाई ऱास्‍द ङायाच्‍यो रो?” है ओरादोक ते, 40 नोराए, “आवलाई माःक, बारब्‍बालाई ऱास्‍द्यासिके,” लिद क़िकेर। बारब्‍बा तोबो चोर दाँका ओल्‍यो।