1 येसु यर्दन भैल ओसछैंसिउत छैंव पुरूसए ब्याल्‍द ननी पुलुस्‍द ओबाज़्‍याक नो पुरूसए तोबो साइँसुइँव पोङ लाँक्‍यो। 2 नल चालीस दिन भरी सैतानए येसुलाई झुकैन्‍याए जूँनी जाँचिउ ज़ नैक्‍यो। नाः भरिल येसु काता ज़ माज़्‍याद लिके। चालीस दिन ओतावत ओकरेए माधुनाक्‍यो। 3 हाःत ज़ सैतान ओल्‍योक हुद, “नँ साचो ज़ परमेस्‍वरए ओज़ा ताकिन आव लुँलाई भरेस जैके,” है ओदोक ते, 4 येसुए, “धर्मसास्‍त्रल अइ लिद सर्सिउ लिज़्‍या, ‘मिँलाई ज़्‍यावए वाज़ माङाव,’ ”4:4 ब्य ८:३ है दोक्‍यो। 5 नकिन सैतानए तोबो झेंःव पोत लाँद संसारलाव राज्‍या भरी तोचोइत ज़ सतैंद्याद, 6 “नो नरँःज़्‍याव राज्‍या भरी ज़गै मगैवस नमीं ज़ जैद ङाईंरिज़्‍या। आव भरी ङाकुइत ज़ लिज़्या, जोलाई ङा याव ङापैंज़्‍या होलाई ज़ ङाएधुइ। 7 है जैद नँ ङाङ़ाक फुलुप्‍सिद धो नदाँकिन नो भरी नमींर ज़ तान्‍या लेर,” है दोक्‍यो। 8 नाःत ज़ फरी येसुए, “धर्मसास्‍त्रल अइ लिद सर्सिउ लिज़्‍या, ‘नप्रभु परमेस्‍वरए ओङ़ाक फुलुप्‍सिद होए ओसेवा वाज़ दान्‍या ताए,’ ”4:8 ब्य ६:१३ है दोक्‍यो। 9 सैतानए फरी येसुलाई यरूसलेमल लाँद ध्‍यान झ़िमए उतुपात बैद, “नँ साचो ज़ परमेस्‍वरए ओज़ा ताकिन आतिनी मेल ज़ो·निके। 10 धर्मसास्‍त्रल अइ लिद सर्सिउ लिज़्‍या,

14 हाःत ज़ येसु छैंव पुरूसए ओसक्ती दैद गालीलदा ज़ ओल्‍द बाके। हाःकिन येसुए ओय़ेन नयाल प़ाइँदा ज़ थास्‍नाके। 15 धर्मसास्‍त्र झ़िम झ़िमक बाद परमेस्‍वरए ओपाँ ब प़ाइँलाई ज़ यासथैक्‍यो। नो पाँ थैद प़ाइँए ज़ येसुए उमिन सघ्‍योःदिकेर।

16 नकिन येसु ओल ओघ्‍योःव नाखार नासरतल ज़ हुके। एकतारकाव ओदोज़्‍याव मिताव ज़ ऩासिन्‍या छ्याम धर्मसास्‍त्र झ़िमल बाद परमेस्‍वरए ओपाँ प़रिन्‍याए जूँनी च्‍याँःसिके। 17 नलावराए यसैया अगमबक्ताए ओसरो पोस्‍तोको एकेर। येसुए नो पोस्‍तोको फैद नल ओल उजूँनी सर्सिउलाई पले·क्‍यो। नलाव सर्सिउ आव ज़,

20 हाःत ज़ येसुए नो पोस्‍तोकोलाई बन जैद नो याज़्‍यावलाई सोवोल्‍द्याद च़ुसिके। नलाव दुप्‍सिद लिज़्‍याव भरिराए यामी येसुए ओक्‍याँत ज़ उलिज़्‍याक, 21 येसुए नोरालाई, “आछिमकाव प़रिद ङायाचिउ धर्मसास्‍त्रलाव पाँ जेथैज़्‍याक ज़ यो·के,” है यादोक्‍यो।

22 नलाव लिज़्‍याव भरिए येसुए ओपाँ बनै चाव थ·रैद अचम्‍ब ताद, “काता आव योसेफए ओज़ा माःक रो?” है लिद जाँ मापतिकेर। 23 है जैद येसुए नोरालाई, “जे ङालाई प़ाइँए याझाःज़्‍याव घर्ती स्‍यासो जेजैनाज़्‍याखेहो। नो घर्ती आव ज़ — ‘ए सगराँज़्‍याव, ङ़ादा नक्‍याँलाई नसगराँधुज़्‍याव सतैंके।’ जे कफर्नहुमल ङादोव जेथैव मिताव ‘आव ननाखारल ब दोके,’ है जेदाँज़्‍याखेहो। 24 है जैद ङा जेलाई साचो है ङादाचिज़्‍या, अगमबक्तालाई ओल ओनाखारलावराए खर्क ज़ ओमान नैद माएर। 25 जे आव ब चेतैच्‍यो, एलियाए ओपालाक ब स़ोंरिम छ मैना पै नम मावाद बनै घ्‍योःव अनिकाल उलिज़्‍याक ओल उलिज़्‍याव इस्राएल देसल राँदी मेंमार कुधु ज़ याल्‍यो।4:25 १ राज १७:१ 26 हितावत ब परमेस्‍वरए एलियालाई नोराए ल्‍योक मापरींद झन सीदोन खन्‍दलाव सारपत नाखारलाव राँदी मेंमाए ल्‍योक वाज़ परींक्‍यो।4:26 १ राज १७:८-१६ 27 फरी एलीसा अगमबक्ताए ओपालाक ब इस्राएल देसल कुऱीर बनै ज़ याल्‍यो। हितावत ब नोरालाई सुलाई ज़ मासगराँद झन सिरिया देसलाव नामानलाई वाज़ सगराँक्‍यो,”4:27 २ राज ५:१-१४ है यादोक्‍यो।

28 नो धर्मसास्‍त्र झ़िमलाव मिँराए येसुए ओपाँर थैद बनै ज़ रसिद, 29 थर च्‍याँःसिद नोलाई नाखारनी पले·द यानाखारलाव दाँदातिन हाँदा ख्‍याव पैंकेर। 30 खाली येसु नोराए खार्नी सिउःसिद बाके।

31 छींनी येसु फरी गालीललाव कफर्नहुम सहरल झरिद ऩासिन्‍या छ्याम मिँरालाई परमेस्‍वरए ओपाँ ओरासथैज़्‍याव। 32 नलावर येसुए ओपाँ थैद अचम्‍ब ताकेर, काराव ल्‍यो ताकिन होए बनै हकस ओरापैज़्याव।

33 नो बेलाक ज़ दुप्‍सिद यालिज़्‍याव धर्मसास्‍त्र झ़िमल बो·लैज़्‍याव पुरूसए क्‍योःद ओनैज़्‍याव तोबो मिँ उलिज़्‍याव। नो पुरूस बनै चोइस क़िद, 34 “अ नासरतलाव येसु, गेस नखै काता उलिज़्‍याव? गेलाई खेम्‍ना नहुव रो? ङा नँलाई ङासरेस्‍निज़्‍या। नँ परमेस्‍वरए छैंव उमीं ज़,” है लिके। 35 हाःत ज़ येसुए नोलाई हप्कैद, “झ्याउँ तालिनी, आवए ओक्‍याँतिन पुलुस्‍द बान्‍के,” है ओदोव प़ाइँना ज़ नो माचाव पुरूसए नो मिँलाई याखार्ल पछारिद कैज़ माजैद पुलुस्‍द बाके।

36 निताव रँःद नलावर अचम्‍ब ताद या याल, “आवए ओपाँ किताव ओताव? नाः ओसक्ती ल्‍यो, नाः ओहक ल्‍यो। माचाव पुरूसरालाई ओराहप्‍कैक मनी ओपाँर यादोज़्याव ची ओल्‍यो,” है लिकेर।

37 हाःकिन येसुए ओदोव य़ेन भरी नजीलाव पो पोङ प़ाइँदा ज़ थास्‍नाके।

38 नकिन येसु नो धर्मसास्‍त्र झ़िमनी पुलुस्‍द सिमोनए उझ़िमक बाके। नल सिमोनए उमुइँज्‍यु ओजोरो हुद घ्याँसिद उलिज़्‍याव। नलावराए नो ओजोरो हुवए उजूँनी येसुलाई है दोकेर। 39 है जैद येसु नो ओजोरो हुज़्‍यावए ल्‍योक बाद नो जोरोलाई उसिङारो प़ाइँना ज़ जोरोए ऱास्‍द नो मेंमा सोद नोरालाई ज़्‍यावर जैद याएक्‍यो।

40 निमी ओफेरनाव बेलाक नजीलाव याजोरो हुज़्‍याव भरी येसुए ओल्‍योक यारारैकेर। येसुए नोरालाई उकुइए छाप्‍द प़ाइँलाई ज़ यासगराँक्‍यो। 41 कुधु मिँराए याक्‍याँतिन माचाव पुरूसर ब चिर चिर क़िद, ‘नँ परमेस्‍वरए ओज़ा ज़’ लिद पुलुस्‍द बाकेर। नोराए येसुलाई ‘ख्रीस ज़’ लिद यासरेसोए येसुए नोरालाई हप्कैद पाँव ज़ ओमाराएज़्‍याव।

42 हो पराःती नम उसँवत येसु तोबो साइँसुइँव पोक बाके। माहोल्‍याराए येसुलाई खिम्‍द दैद यास नैन्‍याए जूँनी छुतदा बान्‍या वैंव पैंकेर। 43 येसुए फरी नोरालाई, “ङा परमेस्‍वरए ओराज्‍यालाव पाँ छुत नाखार नाखार, सहर सहरल ब सथैव ज़ परिके। नोए उजूँनी ज़ परमेस्‍वरए उपरींनाव,” है यादोक्‍यो।

44 है जैद येसुए यहूदिया खन्‍द भरिलाव धर्मसास्‍त्र झ़िम झ़िमक परमेस्‍वरए ओपाँ यासथैनाक्‍यो।