1 येसुए तछा पोंखारिद ओखेमोत, उसिसरानी तोबोए, “प्रभु ऱील सछैंज़्‍याव यूहन्‍नाए उसिसरालाई पोंखारिन्‍या ओरासिऊव मिताव गेलाई ब पोंखारिन्‍या सिऊसियो,” है ओदोक ते, 2 येसुए, “जेपोंखारिक इतावनी पोंखारिच्‍यो,

5 फरी येसुए उसिसरालाई है यादोक्‍यो, “जेनी तोबोए जेनैं लिज़्याखेहो। आधा रील नो जेनैंए ल्‍योक बाद, ‘अ ङानैं, भरेस स़ोम्‍लो लोइव ताके। 6 तोबो ङानैं बनै तादानी हुद ले, ङा नोलाई यान्‍या काता ज़ माले,’ है जेदोकिन, 7 नो झ़िमलावए, ‘ङालाई दुख तायाँ, य़ामर ङागल्‍धुके, ङाज़ारास स्‍याँद गेले। ङा सोद नँलाई ङामाईंधुइ,’ है उलिकिन, 8 नोए नैं नैं नितावए ओमाएदी ब फरी ओनैंए ‘मायाद माताए’ लिद जात्त ज़ ओमाऱासोए करनी वाज़ उऩिउ भरी एक्‍यो।

9 “हिताव ज़ ङा जेलाई है ङादाचिज़्‍या, परमेस्‍वरस जेऩिकिन जेलाई यान्‍या ज़ ले, जेखिम्‍किन दैन्‍या ज़ जेले, य़ाम कोतो कोतो जेजैकिन जेजूँनी फैसिन्‍या ले। 10 जोए ऩिज़्‍याव होलाई यान्‍या ले, जोए खिम्‍ज़्‍याव होए दैन्‍या ले, जोए कोतो कोतो जैज़्‍याव होए उजूँनी फैसिन्‍या ले। 11 जेनी किताव बाबु लिके? [ओज़ाए भरेस उऩिकिन लुँ यान्‍या?] ङाँः उऩिकिन घुल यान्‍या, 12 बाज़ुरी उऩिकिन बिछी यान्‍या? 13 है जैद जे निताव पापल लिज़्‍याव मिँराए जेज़ारालाई निताव चाव चाव यान्‍या जेसैंकिन, स्‍वर्गताव जेबाबुए झन ओलस जेऩिकिन छैंव पुरूस कै जैद मायाचिउके?”

14 फरी तछा येसुए तोबो मिँए ओक्‍याँनी माचाव पुरूस पले·दिक्‍यो। नो पुरूस मापाँधुन्‍या लाता जैज़्‍याव पुरूस ओल्‍यो। नो पुरूस उपुलुसो प़ाइँना नो मिँ पाँधुन्‍या ताके। निताव रँःद नक लिज़्‍याव माहोल्‍यार अचम्‍ब ताकेर। 15 ख्‍वा ख्‍वाराए, “आवए ते माचाव पुरूसराए याघेप्‍पा बालजिबुलए उमिननी ओरापले·ज़्‍याव ची,” है लिकेर। 16 ख्‍वाराए फरी येसुलाई जाँचिन्‍याए जूँनी, “स्‍वर्गताव नसरेस तोबो सतैंके,” है यादोज़्‍याव। 17 येसुए नोराए यायुँलाव पाँ सैंद, “तोबो राज्‍यालाव मिँर या या यामाखैकिन नो राज्‍याए उमिन ज़ म़ाज़्‍या। हो मिताव ज़ तोबो झ़िमलावर या या यामाखैकिन चितराँ पुतराँ तान्‍या लेर। 18 हिताव ज़ सैतानए ओराज्‍यालावर पाला या या यामाखैकिन नोराए यामिन कातानी ओरहिरिज़्‍याव? जे ते झन ङालाई ‘बालजिबुलए उमिननी माचाव पुरूसर यापले·ज़्‍याव’ है जेदाँज़्‍या। 19 ङा ननी ङारापले·ज़्‍याव ताकिन जेसकावराए कातानी यारापले·ज़्‍याव? है जैद नो जेपाँ जेसकावराए ज़ जेङ़ैत फुलुप्‍द्यान्‍या लेर। 20 खाली ङा परमेस्‍वरए ओसक्तीनी ङारापले·ज़्‍याव ताकिन परमेस्‍वरए ओराज्‍या जेखार्ल ज़ हुद ले।

21 “तोबो ओर्सा ल्‍यो मिँए ओहत्‍यारर रैद उझ़िमलाई उगुकिन नोए उझ़िमलाव भरी सुए ज़ मालाँधुर। 22 नोकिन ओर्सा ल्‍यो हुद खप्‍द ओहारैधुकिन वाज़ ओहत्‍यारर नैंद उझ़िमलाव जा-यार हाइद लाँद भाःन्‍या ले।

23 “जो ङास माखैए, हो ङाकिन तँदाङाव ज़ लिज़्‍या। फरी जोए ङास मादोव, होए ज़ ङापाँ बले·ज़्‍याव।

24 “मिँनी पले·सिउ माचाव पुरूस नो मिँए ओक्‍याँनी उपुलुसोत ऱी माल्‍यो साइँसुइँवक ऩासिन्‍या पो खिम्नाज़्‍याव। लिन्‍या पो ओमादैकिन फरी ओल्‍द ङ़ादाङाव उपुलुसोए ओक्‍याँत ज़ पसिउ पैंज़्‍याव। 25 नल ओबाक स्‍यासी जैद थिक थाक जैसिउ पो रँःद, 26 ओलकिन माचाव पुरूसर सात गोता ओलस रैद नल पसिद नो मिँलाई ङ़ादाङावकिन झन ज़ माचावए क्‍योःज़्‍याव,” है यादोक्‍यो।

27 येसुए नाः ओपाँवत नो माहोल्‍यारानी तोबो मेंमाए येसुलाई, “नँलाई जर्मैद नुइँ सवैव मेंमा असिक दैव लिज़्‍या,” है ओदोक ते, 28 येसुए, “नोकिन बुरू परमेस्‍वरए ओपाँ थैद ओपाँ दोज़्‍यावर असिक दैवर लिज़्‍यार,” है दोक्‍यो।

29 माहोल्‍यार झन ज़ माहोल्‍या यातावत येसुए है यादोक्‍यो, “आव जुकलाव मिँर बनै पापीर लिज़्‍यार। ङासरेस वाज़ खिम्‍ज़्‍यार। खाली यादैरिज़्‍याव सरेस ते योनाए ओक्‍याँत ताव सरेस वाज़ दैरिज़्‍यार। 30 किताव योनाए ओक्‍याँत ताव पाँर निनवे सहरलाव मिँरालाई सरेस ओताव, हिताव ज़ ङा मिँ मिन्‍सिद हुवए ङाक्‍याँत हुरिज़्‍याव पाँर ब आव जुकलाव मिँरालाई सरेस तारिज़्‍या।11:30 योना ३:४ 31 नो दखिन देसलाव रानीए परमेस्‍वरए ओपाँ सोलोमनए ओयाःनी थैना बनै तादानी हुके। जे जेखार्ल हुद लिज़्‍याव ते सोलोमनकिन झन घेप्पा लिज़्या। है जैद परमेस्‍वरए ओराफाल्‍रिज़्‍याव छ्याम आव बेलाकाव मिँराए यागल्‍ती नो रानीए ओक्‍याँनी ज़ थ॰रिरिज़्‍या। 11:31 १ राज १०:१-१०; २ इति ९:१-१२ 32 हो मिताव ज़ नो निनवे सहरलाव मिँराए योनाए ओरासथैव पाँर थैद परमेस्‍वरए ल्‍योदा यायुँ फर्कैकेर। जेखार्ल हुद लिज़्‍याव ते योनाकिन ब घेप्‍पा लिज़्‍या। है जैद परमेस्‍वरए ओराफाल्‍रिज़्‍याव छ्याम नोराए याक्‍याँनी ब आव बेलाकाव मिँराए यागल्‍ती थ॰रिरिज़्‍या।”11:32 योना ३:५

33 “सुए ज़ ल़ोसै तैंःद मारैंःवल ब मानैव, जाए ब माकबो। बुरू ‘झ़िमल पसिज़्यावरालाई पलाँ घताक’ लिद दिउ बाल्‍न्‍यात झाःज़्याव। 34 हिताव ज़ जेक्‍याँताव बत्ती जेमी लिज़्‍या। नो जेमी चाव उलिकिन जेक्‍याँ भरी पलाँव ज़ ताज़्‍या। फरी नो जेमी ज़्याज़्या ज़िझ़िव उलिकिन जेक्‍याँ भरी ओपो·स ज़ चुम चुमोल ताज़्‍या। 35 है जैद नो जेक्‍याँताव पलाँव ताव परिन्‍या चुम चुमो ताताक। 36 पलाँवल लिज़्‍याव मिँ चुम चुमोल माताद दिउ बाल्‍न्‍या ङ़ाकाव ज़गैवल उलिज़्‍याव मिताव लिज़्‍या।”

37 येसुए नो पाँ भरी ओरासथैवत तोबो फरिसी हुद येसुलाई काँ यान्‍याए जूँनी खुल्‍क्‍यो। येसु नोए उझ़िमक बाद, 38 उकुइ माचोखोइद ज़ ज़्‍यान्‍यात थूसिके। नो फरिसीए निताव रँःद बनै हार मानिक्‍यो। 39 प्रभुए नोलाई, “जे फरिसीर, ताथीर खुरीर जेराचोखोइज़्‍याव नो पाखाताव वाज़ लिज़्या। जेयुँल ते लोभ स़ोनो माचाव वाज़ जेनैज़्‍या। 40 ए जेर्ती माल्‍योर, परमेस्‍वरए पाखाताव जेक्‍याँ वाज़ जैद ओयाचिउ माःक, जेयुँ ब जैद्याचिक्‍यो। 41 जेयुँनी माथैंव मायो·वरालाई जेराचिऊकिन जेयुँ ब चोखो तान्‍या ले।”

42 “जे फरिसीरालाई थैए माँतकन ज़ लिज़्‍या। जे तके दँ जरार घोद दस भा जैद तभा भितील जेझाःज़्‍या। नो जेदोज़्‍याव ते चाव ज़, खाली नत वाज़ जेयुँ थू जैद झन ओचाहित ल्‍यो सतस दान्‍या स़ोनो परमेस्‍वरए ल्‍योदा युँ थू जैन्‍या भरी जेऱास्‍के। जे झन नो ओचाहित ल्‍योलाई ब ऱासो मापरिन्‍या।11:42 लेबी २७:३०

43 “फरी ब जे फरिसीरालाई थैए माँतकन ज़ लिज़्‍या। जे सघ्‍योःसिद धर्मसास्‍त्र झ़िमराल प़ाइँराए रँःन्‍या पोक च़ुसिउ जेपैंज़्‍या। बजार जीदा ब ‘मिँराए धो घदासिरक’ लिद जेदुलिरिज़्‍या।

44 “जेलाई थैए माँतकन ज़ लिज़्‍या, जे मारैंःव खादर स्‍यासोर जेलिज़्‍या। जेल्‍योदा हुज़्‍यावर मासैंद ज़ बलेस्‍ज़्यार,”*11:44 यहूदीराए याचलनल खादर तर्त बाज़्‍याव मिँ उछुसिज़्‍याव — गन्‍ती १९:१६। है यादोक्‍यो।

45 आव भरी थैद कानुनलाव तोबो यागुर्बाए येसुलाई, “गुर्बा, इताव नपाँए ते गेइज्‍यात ब खुलिद नयासिके,” है ओदोक ते, 46 येसुए, “जे कानुनलाव यागुर्बारालाई ब थैए माँतकन ज़ लिज़्‍या। जे सुए ज़ यामासयो·धुज़्‍याव कानुनर जैद छुतरालाई वाज़ दाव जेरापरींज़्‍या, जे ताकितर तोबो ओछ्यो ब जेमाछुए।

47 “जेलाई थैए माँतकन ज़ लिज़्‍या, जेसाखा पुर्खाराए अगमबक्ता भरिरालाई यारासैःकेर। जे फरी नोराए याखादरर जेराबनैज़्‍या। 48 है जैद जेसाखा पुर्खाराए यादोव य़ेन जे ज़ जेथ·रैज़्‍या। यारासैःवराए यापो जेबनैक फरी नोरास झन खदेप ब जेलिज़्‍या। 49 है जैद जे मितावराए जेजूँनी परमेस्‍वरए ङ़ादा ज़ थिक है लिद ले। नो पाँ आव ज़, ‘ङा नोराए ल्‍योदा अगमबक्तार स़ोनो ङापाँ सथैन्‍यार ङारापरींज़्‍या। नोरानी ख्‍वारालाई यारासैःरिज़्‍यार, ख्‍वारालाई याखिरी पसिद्यान्‍या लेर।’

50 “है जैद आव संसार सुरू ओतावकिनकाव अगमबक्तारालाई यारासैःव भरिराए याझी आज्‍यालकाव मिँराए याक्‍याँत ज़ तारिज़्‍या। 51 ओदाज्‍युए ओसैःव हाबिलए ओपालाकिन, नो थान स़ोनो ध्‍यान झ़िमनी निखार्लाव यासैःव जकरिया पैकावराए याझी आव बेलाकाव मिँराए याक्‍याँत लागिस्‍रिज़्‍या।11:51 उत ४:८; २ इति २४:२०-२१

52 “जे कानुनलाव यागुर्बारालाई थैए माँतकन ज़ लिज़्‍या। जे धर्मसास्‍त्रलाव सर्सिउ परमेस्‍वरए ओराज्‍याल पसिन्‍या साँचा जेम़ोंके। है जैद जे ननी ज़ परमेस्‍वरए ओराज्‍याल पसिउ जेमाभैंःए, पसिउ पैंज़्‍यावरालाई ब जे ज़ जेरावैंके,” है यादोक्‍यो।

53 येसु ननी पुलुस्‍द ओबाज़्‍याक नो फरिसीर स़ोनो कानुनलाव यागुर्बार येसुकिन तँदा जैसिद बनै कुधु पाँर सुधिकेर। 54 नोराए यायुँल ‘ओल ओयाःनी पुलोसो पाँनी ज़ गेक्‍योःया’ लिन्‍या उलिज़्‍याव।