1 ऩासिन्‍या छ्याम येसु तोबो फरिसीराए याघेप्‍पाए उझ़िमक काँ ज़्‍युना बाके। नक छुत फरिसीर पाला येसुए उचिवार्‍या यालिज़्‍याव। 2 नल गोन्‍या बेथाए क्योःद ओनैज़्‍याव तोबो मिँ ब येसुए ओङ़ाक च़ुसिद उलिज़्‍याव। 3 हाःत ज़ येसुए नलाव लिज़्‍याव फरिसीर स़ोनो कानुनलाव यागुर्बारालाई, “ऩासिन्‍या छ्याम याजोरो हुवरालाई मासगराँन्‍या कानुन उलिज़्‍याव रो?” है ओरादोक ते, 4 सु ज़ यामापाँधुवए येसुए नो ओजोरो हुवलाई छाप्‍द याङ़ाक ज़ सगराँद ननी परींद, 5 नलाव लिज़्‍यावरालाई, “जे ऩासिन्‍या छ्याम जेज़ा तादी ब जेघें तादी ब भल्‍खादाल ओतेकिन होल ज़ जेनैज़्‍याव सैं जेहाइज़्‍याव?” है ओरादोक ते, 6 येसुस सु ज़ मापाँधुकेर।

7 नकिन येसुए नो भत्‍यारल खुल्‍सिउ पाहुनाराए ओमान ल्‍यो पो याखिम्‍ज़्‍याव रँःद अइ लिद घर्ती तोबो झाःद याएक्‍यो, 8 “बिह्‍यालाव भत्‍यारल जेलाई सुवाराए याखुल्‍चिकिन ओमान ल्‍यो पो ताखिम्‍च्‍यो। नँकिन घेप्‍पा मिँलाई ब खुल्‍द ओनैज़्‍याव ताकिन, 9 नो भत्‍यारल खुल्ज़्यावए, ‘नँ आवलाई पो ऱास्‍द्याव ताके,’ है दान्‍या ले। ननी मेकसै ओसारैनिकिन लाज मोर्नो तान्‍या नले। 10 बुरू ङ़ादा ज़ प़ाइँरानी ओछ्योङाव पोङ च़ुसिउ ताके। हो ताकिन ची भत्‍यारल खुल्ज़्यावए, ‘अ ङानैं, जाँ रोकसै हुन्‍के,’ है उदींकिन प़ाइँराए ङ़ाक नइज्‍यात रहिन्‍या ले।14:8-10 हितो २५:६-७ 11 है जैद जो ओलनी सघ्‍योःसिज़्‍या, हो ज़िम्‍रिज़्‍या। फरी जो ओलनी सज़िम्‍सिज़्‍या, हो घ्‍योःरिज़्‍या।”

12 नकिन येसुए ओललाई काँ ज़्‍युना खुल्‍ज़्‍यावलाई ब है दोक्‍यो, “नँ भत्‍यार जैद मिँरालाई नराखुल्‍क नक्‍याँदाङावर, नदाज्‍यु भाइर, ननैं मेंर स़ोनो घेप्‍पा मिँर वाज़ ताराखुल्‍यो। म़ानी नोराए फरी नँलाई ब भत्‍यारल खुल्‍द नलोइ फो·न्‍या लेर। 13 बुरू भत्‍यार नजैक काता ज़ माल्‍योर काना दूँदारालाई दुप्‍द याज़्‍यास्‍के। 14 नोराए नलोइ यामाफो·धुवए नोए ओपोल असिक दैन्‍या नले। धर्मीर सैंसिद यासोव छ्याम परमेस्‍वरए ल्‍योनी नलोइ दैन्‍या नले।”

15 हाःत ज़ नो भत्‍यारल लिज़्‍यावरानी तोबोए, “साचो ज़ प्रभु, परमेस्‍वरए ओराज्‍यालाव भत्‍यारल ज़्‍याव दैज़्‍याव ओभागी ल्‍यो ज़,” है ओदोक ते, 16 येसुए अइ लिद घर्ती तोबो झाःक्‍यो, “तोबो मिँए तछा बनै घ्‍योःव भत्‍यार जैद कुधुलाई याखुल्‍क्‍यो दी। 17 ज़्‍याव भरी ओतावत तोबो ओनोकोरलाई नो है ओरादोव भरिलाई खुल्‍नाव परींक्‍यो दी। नो बाद, ‘ज़्‍याव भरी ताधुके, हुचिके दी,’ है ओरादोक ते, 18 नोराए तोबो तोबो निउँ जैद, उस॰कतावए, ‘ङा एँः तोथो लँःद ङानै, नो एँः ङाचिऊनारिज़्‍या। है जैद ‘माधाःए दी’ है दोयो।’ 19 हुकिनकावए, ‘ङा घेंर पाँच हल लँःद ङारानै, नोरालाई बिचारिना ङाबारिज़्‍या। है जैद ‘माधाःए दी’ है दोयो।’ 20 प़ाइँरानी छींनीकावए, ‘ङा भर्ज़ा ज्‍या रैद ङानै, है जैद ‘माधाःए दी’ है दोयो।’

21 “है जैद नो ओय़ेन दाज़्‍याव ओघरपतीए ल्‍योक बाद किताव है यादोव हिताव ज़ है दोक्‍यो। नो घरपती रसिद, ‘हो ची ताकिन्‍दा नँ चाँदो बाद सहरलाव दोहा जीलाव गरीब गुरूवा, काना दूँदारालाई खिम्‍द यारैके,’ है ओदोक ते, 22 नो ओय़ेन दाज़्‍यावए ओघरपतीए है ओदोव मिताव मिँर रैद, ‘है नदाँव मिताव मिँर रैद ङारानै। हैदी ब पो लिज़्‍या,’ है ओदोक ते, 23 ओघरपतीए फरी, ‘येम जीलावर काना कुनी जीलावर काचाबुल घरारैयो, ङाझ़िमल घब्‍याल्‍रक,’ है दाद, 24 ‘ङ़ादाङाव खुल्‍सिउराए ङाभत्‍यारल तके ब दारो तादैरक,’ है दोक्‍यो।”

25 हाः बेलाक येसुस ल्‍यो माल्‍यो मिँर उछीं उछीं याबाज़्‍याव। येसु नोराए ल्‍योदा भाल्‍सिद अइ लिद यासथैक्‍यो, 26 “जो ङास हुव पैंज़्‍याव, होए ओबाबु ओआमा, ओज्‍या ओज़ा, ओदाज्‍यु भाइ, ओनाना बैंनीर स़ोनो उजिउलाई ङाकिन कोसै मया ओरादोकिन, हो ङासिस तान्‍या माले। 27 ङाजूँनी क्रुसत सिन्‍या मिताव दुखर सहिउ माभैंःद ङाछींत ओमाहुकिन हो ब ङासिस तान्‍या माले। 28 हिताव ज़ जे झ़िम तोबो जेजैक ‘आः लागिरिज़्‍या’ लिद ङ़ादा ज़ हिसाप जेदोज़्‍या। 29 हिसाप मादाद गज वाज़ थालिद ओमातुपैधुकिन मिँराए नोलाई हसैद, 30 ‘मातुपैधुन्‍यालाई ज़ काराव ओथालिउ?’ है लिन्‍या लेर। 31 हिताव ज़ तोबो राजाए ब छुत राजास लरैं ओताकिन ङ़ादा हुनी हुज़्‍याव बीस हजार मिँरालाई दस हजार मिँरास गेमाराखेपैधुके लिद, उधूँलाव घेप्‍पा घेप्‍पारास सल्‍ला दोज़्‍याव। 32 नोरालाई माहारैधुन्‍या मिताव ताकिन नोर तादाङ यालिज़्‍याक ज़ सखैन्‍या मिँर यापरींज़्‍याव। 33 है जैद जे ब जेस लिज़्‍याव भरी जेमाऱास्‍धुकिन ङासिस तान्‍या जेमाले।

34 “सापी चाव ज़ लिज़्‍या, खाली ओदार ओमालिकिन नोलाई कै जैद ची ओदार ल्‍यो जैन्‍या। 35 नोलाई एँःल झाःद ब माताए, मलल झाःद ब माताए, ख्‍यान्‍या वाज़ ताज़्‍या। आव ङापाँ जोए थैन्‍या उयुँ लिज़्‍या, चावस ओथैवक।”