फिलेमोनलाई
पावलए परींद ओयो चिथी
आव चिथी फिलेमोनलाई पावलए झ्‍यालखानानी परींद ओयो ज़। फिलेमोन परमेस्‍वरलाई उयुँ हुप्‍ज़्याव कलस्‍सी सहरलाव तोबो धनी मिँ ओल्‍यो। नोए ओबाँदा ओनेसिमस यादोज़्यावए कातार हाइद धोंःद ओबाव ओल्‍यो (फिलेमोन १५,१८)। धोंःद ओबाव छींनी परमेस्‍वरलाई उयुँ हुप्‍द, झ्‍यालखानाल लिज़्याव पावललाई ओसघैज़्याव (१०,१३)। है जैद आव चिथील ओनेसिमस फरी ओसाहुए उधूँल ल्‍यो भैंःद, नोलाई फिलेमोनए बाँदा वाज़ माःक, उयुँ हुबो भाइ मिताव सम्‍जिद सुमो ताके लिन्‍या सरैंःसिउ लिज़्या (१६-१७)।
1
ङा पावल, येसु ख्रीसए ओय़ेनए जूँनी झ्यालखानाल लिज़्‍याव स़ोनो ङास लिज़्‍याव तिमोथीस गिन्‍ल्‍योनी नँ गिनस परमेस्‍वरए ओय़ेनताव खतैसिउ गिनयुँलाव गिनभाइ फिलेमोनलाई आव चिथी परींद गिन्‍ईंज़्या। आव चिथी परमेस्‍वरए ओपाँताव गेबैंनी अप्‍फिया, गेस सिप सिप परमेस्‍वरए ओय़ेन दाज़्‍याव अर्खिप्‍पस, स़ोनो नझ़िमक दुप्‍सिज़्‍याव मन्‍दलीए जूँनी पाला ज़। परमेस्‍वर गेबाबु स़ोनो गेप्रभु येसु ख्रीसनी नियुँ जेल्‍योदा ओगराँक, जेयुँ होलाँ जैद ओयाचिरक।
पावल फिलेमोनस खुसी ओताव
नँ फिलेमोनए नजूँनी परमेस्‍वरलाई ङापोंखारिक एकम्न्‍या नमिन हाइद धन्‍याबाद चरैःव ज़ ङानैज़्या, काराव ल्‍यो ताकिन नँ गेप्रभु येसु ख्रीसलाई नयुँ हुप्‍द परमेस्‍वरए छैंव उमींरालाई मया दाद नरासमारिज़्याव ङाथैज़्या। नो परमेस्‍वरए उमिनत नयुँ हुप्‍द नदोज़्‍याव य़ेननी ख्रीसए ओयासिउ चाव पाँर बुझिन्‍या युँ झन ज़ उईंवक लिद ङापोंखारिज़्या। अ ङाभाइ, नँ परमेस्‍वरए छैंव उमींरालाई समारिद यायुँ होलाँ जैद नराएज़्‍यावनी ङा ब ङायुँ होलाँ ताद रेंव ज़ ङालिज़्‍या।
ओनेसिमसए जूँनी पावलए उबिन्‍ती
ङा नँलाई ‘आव दोयो’ है दान्‍या ख्रीसनी ङाहक उलिदी ब नँलाई कर मालैद, ङाल्‍योदा नस॰ तरा नचींज़्यावनी ज़ नदोकिन ताखेहो लिद ङाबिन्‍ती लिज़्‍या। ङा पावल इताव सेरो मिँ येसु ख्रीसए उमिनत कैदी तावए, 10 नँस ओनेसिमसए उजूँनी तोबो बिन्‍ती ङादोज़्‍या। नो मिँ आव झ्‍यालखानाल परमेस्‍वरए ओपाँत ङाजर्मैव ङाज़ा ज़। 11 नो मिँ ङ़ादा नजूँनी कान्‍ल ज़ काम मालागिउ ओल्‍यो। अब ते नजूँनी स़ोनो ङाजूँनी ओचाहित ल्‍यो ताद ले। 12 है जैद नो ङायुँ स्‍याताव मिँलाई नल्‍योदा ङापरींज़्‍या। 13 ङा चाव था ङारासथैवए झ्यालखानाल ङालिज़्‍याक नो मिँए नँ नपोल ङासेवा घदोवक लिद ङास नैव ते ङापैंव। 14 खाली नँ ‘ताए’ है नमाल्‍योवा पै ङामानैके। नँ ङाल्‍योदा जो मिताव नदोदी ब करनी माःक, नयुँ स्‍यानी वाज़ ओताक है ङालिज़्‍या। 15 नो मिँ आल धोंःद उहुव तोबो ओअर्थ ल्‍यो लिज़्‍या। जाँवाए जूँनी नल्‍योनी ओधोंःदी ब, आकिन ते सग्‍याको नँस ज़ एकम्‍न्‍या लिन्‍या ले। 16 आकिनी आव नबाँदा वाज़ माःक, साचो नयुँलाव नभाइ स्‍यासो ब तारिज़्‍या। ङा ङाभाइ ते ताधुके। नँलाई ते झन नबाँदा ब ताके, प्रभुए उमिनताव नभाइ ब ताके।
17 नँ ङालाई ननैं मिताव नसम्‍जिनाकिन ङाङाः रँःद नोलाई नैव ताके। 18 नोए नउपर्त मादान्‍या य़ेनर ओदोव ताकिन, स़ोनो कातार हाइद उईंव ताकिन, ङा ज़ नँलाई ओलोइ ङाईंया। 19 ङा पावलए ज़ ‘ङाफो·या’ लिद ङासही छाप ब झाःद ङाईंके। खाली नँलाई ङाबाँचैनिउ ङागुन उलिदी ब ङागुन लिज़्‍या है ङामादींए। 20 है जैद नँ ङाभाइ, प्रभुए उमिननी ङाबिन्‍तीर थैद, ख्रीसलाई य़ाका दाद ङायुँ होलाँ जैद्याव ताके। 21 आव ङासरोलाव है ङादींवकिन झन कुधु ज़ नदोया लिद ङायुँ हुबो ज़ लिज़्‍या।
तुपैन्‍या पाँर
22 फरी ब नँस तोबो ङाबिन्‍ती लिज़्‍या, नझ़िमक जाँवा पै लिन्‍याए जूँनी पो तोबो जैद्याव ताके। ङाजूँनी जेपोंखारिज़्‍याव मिताव आनी पुलुस्‍द ङाहुइ सैं लिन्‍या मिताव ब लिज़्‍या।
23 येसु ख्रीसए उमिननी ङास झ्यालखानाल लिज़्‍याव इपाफ्रासए ल्‍योनी जेरो है दींज़्‍याव। 24 ङास सिप य़ेन दाज़्याव ङानैंर, मर्कूस, अरिस्‍तार्खस, देमास स़ोनो लूकाराए ल्‍योनी ब जेरो है दींज़्‍यार।
25 गेप्रभु येसु ख्रीसए उयुँ गराँद जेयुँल बास ओदोवक।