1 गिन येसु ख्रीसए ओय़ेन दोज़्‍याव ओनोकोरनी पावल स़ोनो तिमोथीनी गिन्‍ल्‍योनी, जे फिलिप्‍पीलाव येसु ख्रीसए छैंव उमींर स़ोनो जेलोम्‍बार जेस़ेररालाई आव चिथी परींद गिन्‍याचिज़्‍या। 2 परमेस्‍वर गेबाबु स़ोनो गेप्रभु येसु ख्रीसनी जेल्‍योदा नियुँ गराँद जेयुँ होलाँ जैद ओयाचिरक।

3 ङा जेलाई ङाचेतैचिउ पती परमेस्‍वरलाई धन्‍याबाद चरैःद, 4 जेजूँनी परमेस्‍वरलाई ङापोंखारिक एकतार रेंद ज़ ङापोंखारिज़्‍या। 5 काराव ल्‍यो ताकिन जे जेयुँ उहुबो छ्यामकिन ज़ परमेस्‍वरए चाव ओथा ङारासथैक ङालाई प़ाइँनी ज़ जेसघैनाके। 6 आव तोबो पाँत ङायुँ हुप्‍द ले — परमेस्‍वरए जेयुँलाव थूद ओनैज़्‍याव चाव ओय़ेन भरी येसु ख्रीस फरी उहुन्‍या छ्याम सयो·द तुपैद्यान्‍या ले। 7 जे ङालाई जेसघैनाज़्‍यावए जेगुनर ङा खर्क ज़ मामेंःन्‍या ज़्यासो लिज़्या। ङा झ्‍यालखानाल ङालिज़्‍याक ब, पाखात ङालिज़्‍याक ब, परमेस्‍वरए चाव ओथा ङारासथैज़्‍याक परमेस्‍वरए उयुँ ओय़ालोनी ज़ जे मनी ङादैव य़ेनत ङास सिप जेदोव मिताव ज़ ताके। 8 ङा जेस खर्क गेदैसिके लिद येसु ख्रीसए ओमयानी ङायुँ थू ङाजैज़्‍याव परमेस्‍वर साची लिज़्‍या।

9 जेजूँनी परमेस्‍वरलाई ङापोंखारिक, ‘या याल तयुँ ताद झन ज़ ओखैनारक’ लिद पोंखारिउ ज़ ङानैज़्‍या। नो जेखैज़्‍याव अइज़ माःक, परमेस्‍वर किताव उलिज़्याव लिद सरेस्‍द, चाव माचाव छुतैद खैच्‍यो। 10 हो ताकिन ची चाव पाँ भरी थ·रैद ख्रीस उहुक जेखत माल्‍यो छैंवर तान्‍या जेले। 11 येसु ख्रीसनी ताज़्‍याव चाव य़ेन भरी जेक्‍याँत झन ज़ ओरैंःनाक। ननी ज़ परमेस्‍वरलाई ज़गै मगैव ताद उमिन ब झन ज़ घ्योःन्‍या ले।

12 अ ङानैं ङामेंर, ङाक्‍याँत ताव माचावरानी चाव था झन ज़ थास्‍नाके। 13 ङालाई ख्रीसए ओय़ेननी झ्‍यालखानाल याझाःनाव दरबारलाव सिपाईं भरी स़ोनो छुत मिँराए ब थैद नैर। 14 इताव ङासहिज़्‍यावनी फरी उपुर्काव गेदाज्‍यु भाइराए मनी प्रभुए ओल्‍योदा यायुँ झन ज़ सुहुप्‍द ओपाँ माछे·द ज़ यारासथैज़्‍यार। 15 ख्वा ख्वाराए ते यामी जाँ तूद ङाकिन सघ्योःसिन्‍याए जूँनी ख्रीसए ओपाँ यारासथैज़्‍यार। ख्वाराए ते सोजोनी ज़ यारासथैज़्‍यार। 16 नो सोजोनी सथैज़्‍यावराए, ‘चाव था सथैन्‍यात पावल खतैसिउ लिज़्‍या’ लिन्‍या सैंद ङालाई मया दाद ज़ दोज़्‍यार। 17 नो ख्रीसए ओपाँलाई तँनी सथैज़्‍यावराए ते छैंव युँनी माःक, झ्यालखानाल ङालिज़्याक झन ङायुँ सुहुर्द्यान्‍याए जूँनी यातिर वाज़ दोज़्‍यार। 18 हैदी ब ख्रीसए ओपाँ जो मितावनी यारासथैदी ब ङायुँ माचाव मादोव, रेंव ज़ ङालिज़्‍या। सोजोनी तादी ब, सघ्योःसिन्‍यानी तादी ब, ख्रीसए उमिन ओथास्‍किन, हो ज़ प़ाइँरानी घेप्‍पा लिज़्‍या।

हैज़, ङा रेंव ज़ लिन्‍या ङाले। 19 काराव ल्‍यो ताकिन जे ङाजूँनी पोंखारिद जेयाँज़्यावए स़ोनो येसु ख्रीसए उपुरूसए ब ङालाई ओसघैनाज़्‍यावए ङा तछा आनी पुलुस्न्‍या ज़ ङाले है ङालिज़्‍या। 20 हैदी ब आव तोबो पाँत वाज़ ङायुँ थू ताद आस ङादोज़्‍या — ङा कातानी ब लाज मोर्नो ङामाताक लिद आथ पाला मनी एकतारकाव ङादोज़्‍याव मिताव माछे·द ज़ ङादोधुक। हो ताकिन ची ङाबाँचिदी ब, ङासिदी ब, ख्रीसए उमिन ङाक्‍याँत घ्योःन्‍या ले। 21 ङाबाँचिदी ब ख्रीसए जूँनी ज़ ङाबाँचिज़्‍या। ङासिदी ब ङालाई झन पाथ ज़ लिज़्‍या। 22 खाली आव ङाक्‍याँत जाँवा पै लिद ओय़ेन दाव ङादैकिन हो ब चाव ज़ लिज़्‍या। आव ऩेब्‍लोनी काताकाव रूजिन्‍या ङा ङामासैंए। 23 ङायुँ ऩेथोदा ज़ लिज़्‍या। आव मानुवात लिज़्‍यावकिन ख्रीसए ल्‍योदा बान्‍या ङायुँ लिज़्‍या, नदा बान्‍या पाथ लिज़्‍या। 24 खाली जे जेजूँनी ङा आव मानुवात लिन्‍या ओचाहित लिज़्‍या। 25 नो पाँ ङा पक्‍का ङासैंज़्या। ङालिकिन जेलाई पाथ पारैद परमेस्‍वरलाई जेयुँ हुप्‍न्‍यात झन ज़ रेंद लिन्‍या ङाजैचिरिज़्‍या। 26 हो ताकिन ङा जेल्‍योक फरी ङाहुक जे येसु ख्रीसए ङाक्‍याँताव ओदोव रँःद जेसुनी झन ज़ च्‍याँःसिन्‍या ले।

27 खाली जे ख्रीसए ओपाँत लिज़्‍यावरालाई उसहिज़्‍याव मिताव दोच्‍यो। हो ताकिन ची जेल्‍योक हुद ङामीए ङारँःदी ब, आनी जेल्‍योक हुव ङामादैदी ब, ‘परमेस्‍वरए ओपाँत यायुँ हुप्‍द तयुँ जैद थ॰रिद लेर दी’ लिन्‍या थैन्‍या ङाले। 28 स़ोनो, ‘याखिरी पसिज़्‍यावरालाई रँःद माछे·द परमेस्‍वरए ओपाँए जूँनी धामा दाव ज़ नैज़्‍यार दी’ लिन्‍या ब थैन्‍या ङाले। नो खिरी यापसिज़्‍यावत ऩेथो सरेस लिज़्‍या — खिरी पसिज़्‍यावरालाई परमेस्‍वरनिकाव सजा दैन्‍या सरेस लिज़्‍या, जे मिताव सहिज़्‍यावरालाई फरी परमेस्‍वरनी बाँचिन्‍या सरेस लिज़्या। 29 ख्रीसलाई युँ हुप्‍न्‍या वाज़ माःक, जेलाई होए उजूँनी दुख सहिन्‍या असिक ब याद नैचिउ। 30 आव ङादुखल जे ब ङास ज़ जेलिज़्‍या। नो ङादुखर ङ़ादाकिन ब जेरँःज़्‍याव, आज्‍याल मनी जेथैज़्‍या।