3
परमेस्वरए उयुँलाव मिताव तान्या
1 ङानैं ङामेंर, गेप्रभुस तोबो ताद रेंद ज़ लिचिके। ङासरो पाँर दोहोरैन्यात ङार्च्या मासिए, जेलाई माचावनी जोगोइन्याए जूँनी ज़ लिज़्या। 2 नो परमेस्वरए ओपाँ बले·ज़्यावरास जोगोइसिद लिच्यो। नोर काः स्यासोर लिज़्यार। नोराए, ‘क्याल्न्या सरेस जैसिउर वाज़ परमेस्वरए ओथोल ताज़्यार’ है यारादोज़्यार। 3 खाली परमेस्वरए साचो ओसरेस दैवर ते गे ज़ गेलिज़्या। गे परमेस्वरए उपुरूस दैद उयुँलाव मिताव ओसेवा दाद येसु ख्रीसए ओक्याँत ख्यासिद गेलिज़्यावए गेलाई पाखाताव सतैंन्या सरेस माचाही।
4 हैदी ब ङा मनी, ‘ङानी ज़ परमेस्वरए ओथोलाव ङाताके’ है लिन्या ताकिन उपुर्कावराकिन ङा झन ज़ है ङालिधुखेहो। 5 ङा हिब्रू जातलाव, बेन्यामीन थरल जर्मिउ मिँ ज़। यहूदीराए याचलन मिताव ङाजर्मिउ आथ दिनत क्याल्न्या सरेस ब ताके। है जैद जातनी सघ्योःसिन्या ताकिन प़ाइँरानी घेप्पा जातलाव ङा ज़। मोसाए ओकानुन दान्यात फरिसी ज़ ङाल्यो। 6 ‘इतावनी ज़ परमेस्वर खुसी ताए सैं’ लिन्या ङम्सिद मन्दलीलावरालाई क्योःए क्योःए झ्यालखानाल ब ङाराझाःज़्याव। मोसाए ओकानुन भरी ब माबिरैद ज़ ङादोज़्याव।
7 हिताव य़ेन ङादोज़्यावत ज़ ख्रीसलाई दैन्याए जूँनी नो ङ़ादाङाव ङाकमैव धर्म भरी अऩाकलाव थ·रैद ङाऱास्के। 8 होकिन झन ङाप्रभु येसु ख्रीसस सरेस्सिद ओलस सखैसिन्याकिन उपुर्काव य़ेन भरी अऩाकलाव ज़ थ·रैद, नो ङ़ादाङाव ङाकमैव धर्म भरी की सीद याख्याज़्याव मिताव ज़ ङाख्याके। 9 ङा है ङालिज़्या, तछा परमेस्वरए ओङ़ाक ङाच्याँःसिक नो मोसाए ओकानुननी ङाकमैव धर्मनी तारँःनावक। बुरू ख्रीसलाई ङायुँ उहुबोनी ज़ उयुँलाव मिताव उरँःनावक। 10 ङा ङायुँ ख्रीसस सरेस्सिन्यादा वाज़ लिज़्या। ङा ङाजूँनी दुखस सिन्या पै सहिद ओयाँव मिताव ङा ब होए ओय़ेनत ङासहिधुक, स़ोनो, परमेस्वरए ओल ओसक्तीनी ख्रीसलाई सिउनी ओसोचोइव मिताव ङालाई ब साःरो ओजैनावक। 11 इतावनी ज़ ओल सिद सैंसिदकाव ओदैव जुनी ङा ब ङादैधुक।
ङा ङादोज़्याव मिताव दोव ताके
12 ङा चबनै ख्रीस स्यासो साःरो ताद ङाखत माल्यो ङाताधुके है ङामालिधुइ। हैदी ब ङा येसु ख्रीसए ओपैंज़्याव मिताव कातानी ङासयो·के लिद सैःसिवा जैसिद ङादोज़्या। 13 ङानैं ङामेंर, परमेस्वरए ओपैंज़्याव मिताव आःपै ते ङामासुदुम्ताए। खाली आव तोबो वाज़ ङादोज़्या, ताधुव भरी मेंःद हुन्यादा वाज़ ङाताकिज़्या। 14 किताव बाजी दैन्याए जूँनी धोंःन्यात यादाँजिसिज़्याव, हिताव ज़ ङा मनी स्वर्गताव बाजी दैन्याए जूँनी परमेस्वरए येसु ख्रीसनी ओराखुल्ज़्यावदा धोंःनाव ज़ ङालिज़्या।
15 है जैद जे परमेस्वरए ओपाँत थ॰रिद लिज़्यावर मनी जेयुँ नदा ज़ थू जैव ताके। जेनी ख्वा ख्वार निताव युँ ओमालिकिन परमेस्वरए ओल ज़ जेलाई सम्जैन्या ले। 16 खाली गे परमेस्वरए ओय़ेन खा पै गेसैंज़्याव, हाःपै ज़ दाव ताके।
17 जे ङानैं ङामेंर, ङा ङादोज़्याव मिताव जे ब दोव ताके। गेपैचिउ मिताव य़ेन दोज़्यावराए ल्योनी मनी सिऊसिउ ताके। 18 कुधुए ख्रीस क्रुसत उसिउ है लिन्या पाँलाई सोद बाऱिज़्यार। निताव बाऱिज़्यावराए जूँनी ङ़ादाकिन ज़ है दाव ज़ ङानैचिज़्याव। फरी ब ङायुँ घर्द है ङादाचिज़्या। 19 नितावरालाई नोक्सान वाज़ तान्या ले। नोराए परमेस्वरए ओपोल झन जो यायुँनी हुज़्या, हो ज़ खिम्ज़्यार। लाज हुन्या य़ेनत झन ज़ खुसी ताज़्यार, आव मानुवाताव पाँरादा वाज़ यायुँ थू जैज़्यार। 20 खाली गे साचो गेझ़िम ते स्वर्गत लिज़्या। हुनी ज़ गेलाई बाँचैज़्याव कींद गेनैज़्याव गेप्रभु येसु ख्रीसए च़िहुसिरिज़्याव। 21 उहुव छ्याम नो नाम नमलाव लिज़्यावरालाई उधूँल ओराझाःव ओसक्तीनी ज़ आव गमे जैसिउ गेक्याँर मनी त़ोद्याद ज़गैव ओक्याँ मिताव ज़ जैद्यासिरिज़्याव।