7
तलाख चवालीस हजार मिँर
आव भरी ओतावत आव मानुवाताव चार कोन्‍याल परमेस्‍वरए ओचाकर्‍यार चार जना च्‍याँःसिद यालिज़्‍याव ङारारँःके। नोराए नामल तादी ब, समुन्‍द्र तर्त तादी ब, सींत तादी ब, बतास ताचलिक लिद नोलाई वैंद यानैज़्‍याव। 7:1 यर ४९:३६; दान ७:२; जक ६:५ हाःत ज़ फरी तोबो चाकर्‍या पुर्ब त॰नी उहुज़्‍याव ङारँःके। नोए उकुइत जींदो परमेस्‍वरए ओछाप रैद नो चार कोन्‍याल लिज़्‍याव नाम स़ोनो समुन्‍द्र बले·ना हुव चार जना चाकर्‍यारालाई बनै चोइस है यादोक्‍यो, “गे परमेस्‍वरए उमिनताव ओबाँदाराए याचाँदीत छाप झाःद गेमाराएवा पै जे नामलाई ब ताबले·च्‍यो, समुन्‍द्रलाई ब ताबले·च्‍यो, सींलाई ब ताबले·च्‍यो।” 7:3 इज ९:४-६
हाःत ज़ इस्राएली बाह्र थरनी नो छाप दैवर तलाख चवालीस हजार ताकेर है याल्‍यो ङाथैके।
नोर यहूदाए ओथोनी बाह्र हजार,
रूबेनए ओथोनी बाह्र हजार,
गादए ओथोनी बाह्र हजार,
आसेरए ओथोनी बाह्र हजार,
नप्‍तालीए ओथोनी बाह्र हजार,
मनस्सेए ओथोनी बाह्र हजार,
सिमियोनए ओथोनी बाह्र हजार,
लेबीए ओथोनी बाह्र हजार,
इस्‍साखारए ओथोनी बाह्र हजार,
जबूलूनए ओथोनी बाह्र हजार,
योसेफए ओथोनी बाह्र हजार,
बेन्‍यामीनए ओथोनी बाह्र हजार ताकेर।
स्‍वर्गताव मागनिसिधुन्‍या प़ाइँ जातलाव मिँर
आव भरी ओतावत फरी ब ङाभाल्‍सिक सुए ज़ मागनिसिधुन्‍या प़ाइँ राज्यालावर, प़ाइँ जातलावर, प़ाइँ थोलावर, प़ाइँ खामनी पाँज़्‍याव मिँर बनै माहोल्‍या यालिज़्‍याव ङारारँःके। सिंहासनत च़ुसिद लिज़्याव राजाए ओङ़ाक स़ोनो पाथाए ओङ़ाक च्‍याँःसिद नोर प़ाइँए ज़ पाल पालो क्‍वा क्‍वाइसिद याकुइत खजुरए ओस्‍यावलार रैद, 10 प़ाइँए तोबो गा जैद,
“सिंहासनत च़ुसिज़्‍याव गेपरमेस्‍वर
स़ोनो पाथानी निल्‍योनी
अजम्‍बरी जुनी दैन्‍या ताद गेले,”
है लिद क़िउ ज़ यालिज़्‍याव। 11 हाःत ज़ सिंहासन, चौबीस जना स़ेरर स़ोनो चारता जन्‍तु स्‍यासोर यालिज़्याव घ्वाँगिल च्‍याँःसिद लिज़्‍याव चाकर्‍याराए परमेस्‍वरए ओङ़ाक फुलुप्‍सिद धो दाद है लिकेर,
12 “आमेन। गेपरमेस्‍वरलाई खर्क ज़ माखेम्‍न्‍या असिक,
ज़गै मगै, बुद्धी,
धन्‍याबाद, मान, सक्ती,
ओर्सा ल्‍यो ब ओताक। आमेन।”
13 हाःत ज़ नो चौबीस जना स़ेररानी तोबोए ङालाई, “आव पालो क्‍वा क्‍वाइसिउर सुर, कातानी हुवर, नँ नमासैंज़्‍या?” है ओदाँक ते, 14 “प्रभु, ङा ते ङामासैंए। नँ ते नसैंज़्‍याखेहो,” है ङादोक ते, नोए ङालाई, “आवर मानुवाताव घेप्‍पा जाँचरानी पुलुस्‍द हुवर ज़। नोराए याक्‍वार पाथाए छैंव उझीए छेद सपाल्‍द नैर। 7:14 दान १२:१
15 है जैद ज़ नोर परमेस्‍वरए उसिंहासन ङ़ाक ल्‍यो दैद
ओल उलिज़्‍याव छैंव पोल लाकनी रील ओसेवा दाव ज़ नैज़्‍यार।
नो सिंहासनत च़ुसिज़्‍यावए फरी नोरालाई कप्‍द पाथस नैन्‍या ले।
16 नोर खर्क ज़ करेन्‍या मालेर,
ऱी ब छोस्‍न्‍या मालेर,
निमीए ओदारए हिप्‍द घाम सोता सोता ब तान्‍या मालेर। 7:16 यसै ४९:१०
17 नो सिंहासन ङ़ाक लिज़्‍याव पाथा नोराए यार्गे गावला ताद पाथस नैद,
अजम्‍बरी जुनी याज़्‍याव ऱीमुलदा लाँद ऱी सवैन्‍या ले।
ओल परमेस्‍वरए ज़ प़ाइँराए याप़िलर सीद्यान्‍या ले।” 7:17 भज २३:१-२; इज ३४:२३; यसै ४९:१०; २५:८

7:1 7:1 यर ४९:३६; दान ७:२; जक ६:५

7:3 7:3 इज ९:४-६

7:14 7:14 दान १२:१

7:16 7:16 यसै ४९:१०

7:17 7:17 भज २३:१-२; इज ३४:२३; यसै ४९:१०; २५:८