1 हाःत ज़ फरी तोबो चाकर्‍या स्‍वर्गतिन उहुज़्‍याव ङारँःके। नोए उकुइत नो सुन्‍द मुन्‍दौ भल्‍खादालाव साँचा ब उलिज़्‍याव, बनै घेप्‍पा झँए साँगल ब उलिज़्‍याव। 2 नोए नो ङ़ादाङाव अजिङ्गरलाई क्‍योःद तहजार बर्स पै किद नैक्‍यो। नो अजिङ्गर भाःकाव झुकैज़्‍याव घुल, दियाबलस यादोज़्याव सैतान ज़। 20:2 उत ३:१ 3 है जैद नोलाई भल्‍खादाल ख्याद नो भल्‍खादालाई क·द तालकुची ब झाःक्‍यो। हाःकिन नो हजार बर्स ओमायो·वा पै सैतानए मानुवाताव मिँरालाई सुलाई ज़ झुकैव दैन्‍या माले। नो ओयो·वत वाज़ छ्यावाए जूँनी तखेप ऱास्‍सिन्‍या ले।

4 हाःत ज़ फरी स्‍वर्गत सिंहासन मितावर कुधु ज़ ङारारँःके। नत च़ुसिद लिज़्‍यावरालाई फाल्‍न्‍या हक यासिउ उलिज़्‍याव। फरी ब ङाभाल्‍सिक परमेस्‍वरए ओपाँत स़ोनो येसुए ओसाची यान्‍यात याङ़ै च़म्द यारासैःवराए यापुरूसर ब ङारारँःके। नोर नो राछ्यास स़ोनो राछ्यासए उसुरूप जैसिउ अङग्‍यानी निसेवा ब दाव माभैंःकेर, स़ोनो याचाँदीत याकुइत राछ्यासए ओछाप ब झाःव माभैंःकेर। है जैद नोर सिउनी सैंसिद ओल ख्रीसस तहजार बर्स पै राज्‍या दोकेर। 20:4 दान ७:९,२२ 5 प़ाइँरानी उस॰कताव सिद सैंसिउर नोर ज़ तान्‍या लेर। उपुर्काव सिउ भरिर ते नो तहजार बर्स ओयो·वत वाज़ तखेप सैंसिन्‍या लेर।

6 है जैद नो उस॰कताव पालाकाव सिउनी सैंसिज़्‍यावर बनै असिक दैवर परमेस्‍वरए उयुँलाव मिताव छैंवर लिज़्‍यार। नोर ऩेखेप सिन्‍या मालेर। नोर परमेस्‍वर स़ोनो ख्रीसनी निसेवा दान्‍यार ताद ओल ख्रीसस तहजार बर्स भरी राज्‍या चलैन्‍या लेर।

7 नो हजार बर्स ओयो·वत सैतान किसिद उलिज़्‍यावनी ऱास्‍सिन्‍या ले। 8 ननी ऱास्‍सिद नोए आव मानुवाताव चार कोन्‍याङाव राज्‍यारालाई, अथबा गोग मागोगरालाई* 20:8 गोग मागोग है लिसिउए ओअर्थ — परमेस्‍वरकिन तँदा जैसिज़्याव राज्‍यार। फसङ्गैद लरैं दाना दुप्‍द यारैरिज़्‍याव। नोराए याफौजीर समुन्‍द्रलाव बालुवा स्‍यासो सुए ज़ मागनिधुन्‍या तारिज़्‍यार। 20:8 इज ७:२; ३८:२,९,१५ 9 नोर आव नामलाव तोबो बनै घ्योःव बाँल हुद परमेस्‍वरए मया ओदोज़्याव यरूसलेमल ज़ उमिनतावरालाई याराघिरिहुरिज़्‍यार। हाःत ज़ स्‍वर्गतिन मेंःए मुल्‍का हुद सैतानए ओरारैव फौजीर चुयाप तारिज़्‍यार। 10 नोरालाई झुकैज़्‍याव सैतान मनी गन्‍धकनी चाँःज़्‍याव मेंःल ख्यासिरिज़्‍या। नो मेंःल ज़ नो ङ़ादाङाव राछ्यास ब उलिज़्‍याव, नोए उपुरूसनी पाँद झुकैज़्‍याव ओनैं ब नल ज़ उलिज़्‍याव। नोर स़ोम्‍लो खर्क ज़ माजिप्‍तिन्‍या मेंःल लाकनी रील गाप गाप तान्‍या लेर।

11 नकिन फरी ङाभाल्‍सिक तोबो बनै घ्योःव पाल पालो सिंहासनत च़ुसिद लिज़्‍यावलाई ङारँःके। नोए ओङ़ाकिन नाम ब धोंःके, नम ब धोंःके। खाली नोनी म़ोंसिन्‍या पो ज़ मादैकिनी। 12 हाःत ज़ सिउ भरी घेप्‍पा ज़िम्‍ज़ार सिंहासन ङ़ाक च्‍याँःसिद यालिज़्‍याव ङारारँःके। नक फैसिउ पोस्‍तोकोर ब यालिज़्‍याव। नोरानी तोबो पोस्‍तोको ते अजम्‍बरी जुनीलाव पोस्‍तोको उलिज़्‍याव। हाःत ज़ नो सिउर नो पोस्‍तोको भरिल यादोव य़ेन सर्सिउनी ज़ फाल्‍सिकेर। 20:11-12 दान ७:९-१० 13 नो फाल्‍न्‍या बेलाए उजूँनी ज़ समुन्‍द्रल स़ुद सिउर ब पुलुस्‍केर, खादरल झाःसिउर ब पुलुस्‍केर, प़ाइँङाव सिउ भरी ज़ पुलुस्‍केर। नोर ओपो·स ज़ सु सु याय़ेननी ज़ फाल्‍सिकेर। 14 हाःत ज़ सिन्‍या स़ोनो नर्गनी चुयाप जैज़्‍याव मेंःल ज़ ख्यासिकिनी। नो मेंःल ख्‍यासिन्‍या ज़ ऩेखेप सिन्‍या। 15 है जैद जोए उमिन नो अजम्‍बरी जुनीलाव पोस्‍तोकोल ओमासर्सिकिन नो मेंःल ज़ ख्यासिउ परिरिज़्‍या।