4
अब्राहामए उयुँ उसुहुबोनी ज़ धर्मी थ॰रिके
1 हो ताकिन यहूदीराए गेपुर्खा अब्राहामए उजूँनी काता पाँन्या? 2 अब्राहामए ओदोव य़ेननी परमेस्वरए उयुँलाव मिताव उथ॰रिउ ताकिन, ‘ङानी ज़ धर्मी ङाथ॰रिके’ है लिखेहो। खाली परमेस्वरए ओङ़ाक ते है मालिधुइ। 3 धर्मसास्त्रल ब नोए उजूँनी इताव सर्सिउ लिज़्या,
“अब्राहामए परमेस्वरए ओपाँत उयुँ उसुहुबोनी ज़
परमेस्वरए नोलाई धर्मी ज़ थ·रैक्यो।”4:3 उत १५:६
4 य़ेन दाज़्यावए ओजेला ते दयानी मादैव, ओय़ेनए ओपाकैवनी वाज़ दैज़्याव। 5 ओय़ेननी काता ज़ मापाकैव मिँए ते यागल्ती क्याल्द्याज़्याव परमेस्वरलाई उयुँ उसुहुप्किन, नो ज़ झन परमेस्वरए ओङ़ाक धर्मी थ॰रिज़्या। 6 दाऊदए पाला परमेस्वरए याय़ेन चिऊद मायाद धर्मी ओराथ·रैव असिकए जूँनी अइ लिद सर्द नैव,
7 “मादान्या यादोव य़ेनलाई चिऊद मायाद,
यापाप क्याल्द ओराएकिन,
नोर याभागी ल्योर लिज़्यार।
8 परमेस्वरए यापाप ओलेखा नैद ओमाराएकिन,
नोर ब असिक दैवर लिज़्यार।”4:7-8 भज ३२:१-२
9-10 नो परमेस्वरए ओराएज़्याव असिक क्याल्न्या सरेस जैसिउरालाई वाज़ माःक, प़ाइँलाई ज़ यासिउ लिज़्या। परमेस्वरए अब्राहामलाई पाला क्याल्न्या सरेस ओमाजैसिद ङ़ादा ज़, उयुँ उसुहुबोनी वाज़ धर्मी थ·रैक्यो। 11 उयुँ सुहुप्द परमेस्वरए ओङ़ाक धर्मी उथ॰रिउ छींनी वाज़ परमेस्वरए, ‘ङामीं ज़’ लिद थामिन्याए जूँनी नो सरेस य़ाकाए जूँनी एक्यो। है जैद अब्राहाम क्याल्न्या सरेस माजैसिउ यायुँ हुप्ज़्याव छुत जातलाव मिँराए याबाबु मनी ज़। नोर मनी यायुँ यासुहुबोनी ज़ परमेस्वरए उयुँलाव मिताव उमींर ताज़्यार। 12 फरी क्याल्न्या सरेस जैसिउ यहूदीराए याबाबु मनी लिज़्या, खाली नोर मनी यापुर्खा अब्राहामए उसिलत बाद नोए ओदोव मितावनी ज़ यायुँ यासुहुप्किन वाज़ साचो नोए ओथोर ताज़्यार।
अब्राहामए उयुँ उसुहुबोनी ज़ परमेस्वरए ओय़ाका दैक्यो
13 परमेस्वरए अब्राहाम स़ोनो ओथोरालाई, ‘आव मानुवाताव राज्या जेमीं ज़ जैद ङायाचिरिज़्या’ है ओरादोव य़ाका अब्राहामए कानुनलाव य़ेन ओदोवनी ओदैव माःक, उयुँ हुप्द परमेस्वरए उयुँलाव मिताव उथ॰रिउनी ओदैव ची।4:13 उत १७:४-६; २२:१७-१८ 14 परमेस्वरए नोरास ओनैधुव य़ाका, छींनी कानुनलाव य़ेननी दैन्या ओजैव ताकिन, युँ हुप्न्या भरी अऩाकलाव ज़ ताद परमेस्वरए ओय़ाका ब मातान्या ज़ ताखेहो, 15 काराव ल्यो ताकिन कानुननी ज़ मिँराए परमेस्वरनी सजा दैज़्यार। कानुन ओमालिकिन सजा ब माताखेहो।
16 है जैद ज़ परमेस्वरए ‘नो य़ाका ङायुँ गराँवनी ज़ ओताक’ लिद अब्राहामए ओथोरालाई नो य़ाका दैन्या यायुँ यासुहुबोनी ज़ जैद याएक्यो। ननी वाज़ नोरालाई दैन्या फिस्को माताए। नो य़ाका कानुन धूँलाव यहूदीराए जूँनी वाज़ माःक, प़ाइँए गेबाबु अब्राहामए ओदोव मितावनी ज़ यायुँ सुहुप्ज़्याव भरिराए जूँनी ब लिज़्या 17 धर्मसास्त्रलाव सर्सिउ मितावनी ज़, “परमेस्वरए अब्राहामलाई प़ाइँ राज्यालावराए याबाबु ज़ जैद नैद यायो।”4:17 उत १७:५ नो य़ाका उयुँ उसुहुप्ज़्याव परमेस्वरए ओङ़ाक थ॰रिउ ज़ ताके। नो परमेस्वर सिउरालाई ब याजागैज़्याव, ताज़्याव भरी ब ओपाँनी ज़ यासिर्जैज़्याव। 18 आस मालिज़्यावत ब अब्राहामलाई, “नथोर मागनिसिधुन्या तारिज़्यार,”4:18 उत १५:५ है ओदोव पाँत उयुँ हुप्के। है जैद अब्राहाम कुधु जातलावराए याबाबु ताके। 19 ज़ार मादैद सय बर्सवा ताद फ्या·न्याल गनिसिद उलिज़्यावत ब, ओज्या सारा जूचास्द ओबेथ रूःम्द उलिज़्यावत ब उयुँ मासतेद परमेस्वरए ओपाँत उयुँ हुप्के।4:19 उत १७:१७ 20 है जैद परमेस्वरनिकाव ओदैव य़ाकात अब्राहामए उयुँ आदा होदा माजैद, उयुँर झन ज़ हुप्द, परमेस्वरलाई ओमानर नैद्याद, 21 ‘ङालाई है ओदाँव भरी जुनी ब सयो·द्याँवा ज़’ लिन्या सैंक्यो। 22 ननी ज़ परमेस्वरए अब्राहामलाई धर्मी थ·रैक्यो।
23 खाली नोलाई धर्मी ओथ·रैव पाँ ओललाई वाज़ माःक, 24 गे गेजूँनी ब लिज़्या। गे ब गेप्रभु येसुलाई सिउनी सोचोइज़्याव परमेस्वरलाई गेयुँ गेसुहुप्किन नोए गेलाई मनी धर्मी ज़ थ·रैन्या ले। 25 परमेस्वरए गे गेपापए जूँनी येसुलाई ज़ सिउ एक्यो। फरी परमेस्वरए ओङ़ाक गे धर्मी थ॰रिन्याए जूँनी येसुलाई सिउनी सोचोइक्यो।4:25 यसै ५३:४-५