6
32-44 Olbonnd igurr edn, elor, errk abm aremamag, abm elgoriy ewal edn igunam ednangan, abm edn elemag ednangan, ilimb edn ognggogngg idnjirr ognggam idannag. Inchim elgoram itomiy edadelag idnjirr edn. Ilimb anen il olbonngand artirr, abm elgor ewal, ilimb il arrmirr il ednangan abm omoriy aremag. Ilimb ingin udnam elbenm il ednangan. Ugng anan alnggarr, ilimb edn abm omoriy ingin igurr edn ingun, errgel ingun: “Errk angg abm aremarr ambungan, errk ulbun an elkel. Karrey ela ednangan. Ak igun edn egng afanag, egng ijanag awiy edn.”
Ilimb il ednangan errgel, “Egng onggom ar uw urr ednangan egng ijanag.”
“Egng anganj onggom! Ilimb $200 ayin uwag anndan egng afanag anndan, ilimb abm elgorag angg uwannag awiy, egng ijanag?”
“Egng ilimb arrinjag urr algnganm? Egng ecb ayin ewann al!” Egng ewannam itom, ilimb elkel edn ingun, “Egng scone onggom erraberrab, uy angg ujir.”
Ilimb ednangan abm alkarnj elberr ategerregarr injanganj ukanantamennd inann igun edn. Ilimb afarr il egng uy errbaniy, ilimb el adniy errk angar ewann errnel il, ilimb egng itom iyarrwiyarr il ednangan ilimb ub ubmarr il, abm omoriy ingin undamag uwal il, abmag uwann igunag edn ednangan. Ijarr edn, edor ambel edn. Ilimb abm omoriy ingin undamarr egng entental uy elgay errbaniy ogngon ambarr. Abmbin errabiy ewidnndannd amb. Abm elgor idnnannd ijarr edn egng itom, abm arrkannd 5,000.
45-52 Agagwin il ednangan abm alkarnj elberr abm omoriy ingin, “Urr olbonnd ogngg igul, og abmb, anb awandag, Bethsaida-g igul.”
Ilimb abm erray errkig err elarr il ednangan. Ilimb il ednangan abm omoriy ingin ugnggirr, alkal abm ibangarr ingun undamag errgennag il ognggegamennd errmbennag igurr il adniy olwon-g. Errk anen ulbun ambel, uk olbon abm omoriy ingin undamarr og ifimennd errnenn ambarr, ilimb abm alkal elor errk anbamennd errnenn il. Ilimb ewal il ednangan orrfoyerr ikinm ambanm ednangan, ilimb anngal arem ambel edn, uk olbon ignggigngginam. Ilimb errk ugngugngal egnggenniyerr, adel il ednangan, il abm alkal, odnyol adnim igunm il. Abm idnnan il ednangan udarrw iguyenn, ilimb abm omoriy ingun undamarr ewal edn ingun, odnyornj igigunam, ilimb ambel edn ar oroleb igunm il, ilimb alkarr edn, ugnggann edn. Ilimb errgel il ednangan, “Ar ugnggay urr! Abm urr ar ekelekey adun? Abm onggom ay igigun.”
Ilimb artirr il ednangan olbon-g adniy, itodam ilimb orrfoy edndelag arrmel. Ilimb edn abm omoriy ingin orol alnggebalnggel, ilimb edn abm alkarnj egng errab itod anen abm elgor edor ambarr il. Abm edn ingun anganj aliyanm, adndur odong ambenn edn.
53-56 Ilimb edn anen orrog alnggarr, ilimb edn uk olbon adniy elebag ignggirr, errk ukal Gennesaret. Ilimb olbonngand anen artirr edn, abm alkalg ingun abm elgor elemag ambel edn. Ilimb edn idnjirr eremperemp udnal, abm adnjilg elgeniy olon agarr ilg algnganm ingun abm alkalg, anen aliyanm edn errk unggulg igunamag. Ilimb il anen adenn, abm adnjilg err kungar andand ojojenm edn errk umbuchiy awiy. Ilimb edn ingun abm adnjilg errgenn, “Anndan inun kawun egnggal inin ak arrfin, idnnan oyol ambennag anndan.” Ilimb edn arrfinam anen oyol ambenn amb edn.