1 Piŋɔ te yi Njambiyɛ tì pa kusɔ mbokɔ na, yɔkɔ yi ɓo jeɓa nde Lɛpi*f1* kɔ ɓa̧ kɛte. A ɓa̧ ɓenɛ Njambiyɛ. Lɛpi te ndi Njambiyɛ. 2 Yɔkɔ yi ɓo jeɓa nde Lɛpi kɔ ɓa̧ ɓenɛ Njambiyɛ piŋɔ te yi Njambiyɛ tì pa kusɔ mbokɔ na. 3 Yɔkɔ yi ɓo jeɓa nde Lɛpi kɔ kusɛ mɛyasi hɛnɛ. Kɛ mɛyasi mɛte yi ɗiyɛ kɛ́, kinɛ nyɛ na, ko ma yaŋa wɛtɛ nɛ wɛtɛ tì kusuna na. 4 A ɓa̧ njuku joŋgwɛ, ɛ joŋgwɛ te ɓɛ mɛjasi mɛte yi ɓomɔ. 5 Ma mɛjasi mɛte kɛ panɔ kɛ mɔy yitil. Yasi wɛtɛ, yitil tì jayɛ mɛjasi na.

6 Njambiyɛ tomma wɛtɛ mbam njesɛ. Ɗinɔ ɗyenɛ ɓa̧ nde Jaŋ. 7 A nja̧, na nje pel yasi te yi nyɛ ɓɛŋma nɛ̀ yi nyɛ duwa̧ kɛ kasi mɛjasi maka, nɛ́ ɓomɔ hɛnɛ kwa̧ nɛ nje yasi te yi nyɛ pelɛ kɛ́ yí tikɔ nɛ temɔ kɛ mɛjasi mɛte. 8 Ndi nde, gba nyɛ nɛ ŋguru wenɛ tì ɓɛ mɛjasi mɛte na. Yasi wɛtɛ, a njáki, na nje lɛpi yasi te yi nyɛ ɓɛŋma nɛ̀ yi nyɛ duwa̧ kɛ kasi mɛjasi mɛte. 9 Mɛjasi mɛte ɓa̧ gbate kpasa mɛjasi mɛte yi nje kɛ to mɛnɛti paniyɛ puyɛ nyɛ mumɔ hɛnɛ.

10 Yɔkɔ yi ɓo jeɓa nde Lɛpi kɔ ɓa̧ kɛ to mɛnɛti. Sendi, Njambiyɛ kwaŋma nɛ nyɛ yí kusɔ nɛ mɛnɛti. Yasi wɛtɛ, ɓotu ɓe mɛnɛti maka tì duwɛ nyɛ na. 11 A ka̧ kɛ ɗya ɗyenɛ. Ko ɗete, ɓemaŋ tì jayɛ nyɛ na. 12 Yasi wɛtɛ, ɓomɔ hɛnɛ ɓe jayma nyɛ tikɔ temɔ nɛ nyɛ, a kelma nde, ɓo njâki nje ɓɛ ɓɔnɔ ɓe Njambiyɛ. 13 Ɓotu ɓete tî njaki nje ɓɛ ɓɔnɔ ɓe Njambiyɛ nɛ nje te yi mɛmbundɔ nda yi nyari ja nɛ mɔnɔsikɛ ho nda yi mbam kwaɗyɛ ɓɛ nɛ ɓɔnɔsikɛ kɛ́ na. Yasi wɛtɛ, yo nde, yo Njambiyɛ nyɛ ɓo jɔnja joŋgwɛ.

14 Yɔkɔ yi ɓo jeɓa nde Lɛpi kɔ nja̧ yeŋsa ɓɛ gba mumɔ nɛ mɛmbundɔ. Ɛ nyɛ ɗiyɛ kɛ njoka su. A ɓa̧ tondunate nɛ ŋgikwa nɛ̀ gbakasi. Ɛ wusɛ ɓɛŋɛ nyaŋgwɛ mɛkele mɛnɛ, nyaŋgwɛ mɛkele mɛte yi Da nya Kikɔ Mɔnɔ wenɛ ɗeti te yi kelɔ. 15 Jaŋ lɛpima yasi te yi nyɛ duwa̧ kɛ kasi nɛ, ɛ nyɛ kembiɗya lɛpɔ nde: «Yo nyɛ yi mi ɗikima lɛpɔ nde: ‹Yɔkɔ ɛ ta nje kɛ kɔŋ mbɛ kɔ kwa̧ mi, kɛto nyɛ kɛte kpo nɛ kpo. Yasi wɛtɛ, mi njáki nje mbɛ njimɛ.› » 16 Wusɛ hɛnɛ ɓoŋma kwalɔ kimɔ mɛyasi hɛnɛ te yi yo tondunate kɛ mɔy temɔ nɛ kɛ́. 17 Njambiyɛ kwaŋma nɛ Mɔyisi yí nyɛ nɛ wusɛ mɛmboŋga mɛnɛ. Yasi wɛtɛ, yí teɗye ŋgikwa nɛ̀ gbakasi nyɛ ɓomɔ, a nja̧ kwa̧ nɛ Yesus Krist. 18 Ko mumɔ wɛtɛ nɛ wɛtɛ tì ɓɛŋɛ Njambiyɛ wɛtɛ yesɔ, soŋɛ ndi Kikɔ Mɔnɔ Njambiyɛ, nyɛ ɛ ɗiyɛ ɓenɛ Saŋgwɛ nda kɔl ɓenɛ jon kɔ, yo ndi nyɛ kelma nde, ɓomɔ dûkwɛ nyɛ.

19 Wɛtɛ yesɔ ɓaŋa ɓekum Ɓeyudɛn ɓe Yerusalɛm tomma ɓaŋa ɓotu ɓe nyɛna sadaka nyɛ Njambiyɛ nɛ̀ ɓaŋa ɓotu ɓe kandɔ *Levi kɛ̀ diyɛ Jaŋ nde: «Wɛ, wɛ nda?» Ɛ Jaŋ lɛpɛ yasi te yi nyɛ duwa̧ kɛ́. 20 Ɛ nyɛ yeŋsa nɛ saŋsaŋ kinɛ sɔɗyɛ yaŋa na lɛpɔ nde: «Mi yeti mbɛ *Krist na.» 21 Ɛ ɓo nje diyɛ nyɛ nde: «Wɛ ɓa nda, wɛ Eli?» Ɛ nyɛ lɛpɛ nde: «Ko na, mi yeti Eli na.» Ɛ ɓo kɛ̀ mbɔmbu diyɛ nyɛ nde: «Wɛ mɔ punja mɛlɛpi mɛ Njambiyɛ te yi ɓo ɗikima lɛpɔ nde, a ta nje kɔ?» Ɛ nyɛ yeŋsa nde: «Ɓɛ.» 22 Ɛ ɓo nje diyɛ nyɛ ndana nde: «Wɛ ɓa nda? Lɛpɔ nyɛ wusɛ, kɛto wusɛ yâkaŋgwɛ kɛ̀ lɛpɔ nyɛ ɓotu ɓete ɓe tomma wusɛ ɓaka. Ndana, wɛ nɛ ŋguru wɔ lɛ́pi nde, wɛ nda?» 23 Ɛ Jaŋ lɛpɛ nde: «Mi mbɛ mɔ te yɔkɔ yi Esayi te mɔ punja mɛlɛpi mɛ Njambiyɛ lɛpima nde: ‹Wɛtɛ mumɔ kɛ kembiɗya kɛ mɔy koŋgor nde: Wunɛ tɛ̂mbiɗya nje Baba Mbokɔ nɛ ŋgbeŋ.› » 24 Ɓotu ɓete yi ɓo tomma ɓaka ɓa̧ kɛ njɔŋ *Ɓefarisɛ̧. 25 Ɛ ɓo diyɛ Jaŋ nde: «Ŋgɛ ɓɛ nde, we yeti *Krist ho Eli ho mɔ punja mɛlɛpi mɛ Njambiyɛ, ma kɛto ŋge yi wɛ nje tɔpɛ ɓomɔ kɛ mɔrɔku kɛ́?» 26 Ɛ Jaŋ yeŋsa nyɛ ɓo nde: «Mi tɔ́pa mbɛ ɓomɔ kɛ mɔrɔku. Yasi wɛtɛ, yo nɛ wɛtɛ mumɔ kɛ njoka yun yi wunɛ yeti kɛ duwɛ na. 27 Mɔ te ta nje kɛ kɔŋ mbɛ. Yasi wɛtɛ, mi ti yaka wunjɛ kɔl mɛnakala kɛ kol nɛ na.» 28 Mɛyasi mɛte kwáŋnaŋgwɛ kɛ wɛtɛ mbɛy nde Betani kɛ ŋginjɛ Yurdɛ̧, kɛ mbɛy te yi Jaŋ ɗikima tɔpɛ ɓomɔ kɛ mɔrɔku kɛ́.

29 Misi pupɛ Jaŋ ɓɛ́ŋa Yesus kɛ nje kɛ yenɛ. Ɛ nyɛ lɛpɛ nde: «Nɛ ɓɛ̂ŋa *Mɔnɔ Sam Njambiyɛ ɛ soŋɛ mɛɓeyɔ mɛ ɓotu ɓe mɛnɛti maka kɔ! 30 Yo nyɛ yi mi ɗikima lɛpɔ mbɛ kasi nɛ nde: ‹Kɛ kɔŋ mbɛ, wɛtɛ mumɔ ta nje, nyɛ kwa̧ mi, kɛto nyɛ kɛte kpo nɛ kpo. Yasi wɛtɛ, mi njáki nje mbɛ njimɛ.› 31 Kɛ yembɛ, mi tì ɓɛ kɛ duwɛ tɛri nɛ na. Yasi wɛtɛ, mi nja̧ kɛ mɛsay mɛ tɔpuna ɓomɔ kɛ mɔrɔku, nɛ́ ɓotu ɓe kandɔ Isarayɛl duwɛ nɛ nyɛ.» 32 Ɛ Jaŋ kɛ̀ mbɔmbu lɛpɔ nɛ saŋsaŋ nde: «Mi ɓɛŋma Kimɔ Sisiŋ nɛ misi mɛmbɛ kɛ piyɛ wulɛ ɗyoɓɔ nda pepɔ nje ɗiyɔ kɛ yotu nɛ. 33 Kɛ yembɛ, mi tì ɓɛ mbɛ kɛ duwɛ tɛri nɛ na. Yasi wɛtɛ, yɔkɔ ɛ tomma mi nde, mi njâki tɔpɛ ɓomɔ kɛ mɔrɔku kɔ lɛpima nyɛ mi nde: ‹Mɔ te yi wɛ ta ɓɛŋɛ Kimɔ Sisiŋ kɛ piyɛ nje ɗiyɔ kɛ yotu nɛ kɔ, yo nyɛ ta tɔpɛ ɓomɔ kɛ Kimɔ Sisiŋ.› 34 Mi ɓɛŋma mbɛ nyɛ nɛ gba misi mɛmbɛ, ɛ mi lɛpɛ nde: Yɔkɔ Mɔnɔ Njambiyɛ!»

35 Ya tu wɛtɛ kɛ kɔŋte, ɛ Jaŋ ɓɛ ndi kɛ kiya mbɛy te yi nyɛ ɗikima kɛ̀ kɛte kɛ́ ɓenɛ ɓaŋa ɓejekɛ ɓenɛ yiɓa. 36 Ndana, kɛ nyɛ ma kaŋɛ misi ɓɛŋɛ Yesus kɛ kwa̧ kɛ́, ɛ nyɛ lɛpɛ nde: «Nɛ ɓɛ̂ŋa, *Mɔnɔ Sam Njambiyɛ kɔ!» 37 Ɓejekɛ ɓenɛ ɓenɔri yiɓa wokuma yasi te yi nyɛ lɛpima kɛ́, ɛ ɓo tɛmɛ ɓeŋgwɛ Yesus. 38 Kɛ Yesus ma yeŋsa kɛ́, a ɓɛ́ŋa, ɓo kɛ ɓeŋgwɛ nyɛ. Ɛ nyɛ diyɛ ɓo nde: «Wunɛ sáŋ ŋge?» Ɛ ɓo yeŋsa nyɛ nyɛ nde: «Rabi,» yite nde yekele, «wɛ ɗíy ɗiyɔ we?» 39 Ɛ nyɛ lɛpɛ nyɛ ɓo nde: «Wunɛ njâki ɓɛŋɛ.» Ɗete, ɛ ɓo kɛ̀ kɛ ɓɛŋɛ mbɛy nɛ. Ɛ ɓo kwaŋɗye ɓukwɛ yesɔ te ɓenɛ ɓe Yesus. Yo ɓa̧ kɛ pɔku ŋgimɔ yini te yi ɓekoko.

40 Kɛ njoka ɓejekɛ ɓaka yiɓa ɓe wokuma yasi te yi Jaŋ lɛpima, ɛ ɓo tɛmɛ ɓeŋgwɛ Yesus ɓaka, Andere te maŋ nɛ Simɔn Piyɛr ɓa̧ kɛ njokate. 41 Kɛ kɔŋte, ɛ Andere kwa̧ nɛdɔ kɛ dolɔ maŋ wenɛ Simɔn lɛpɔ nyɛ nyɛ nde: «Wusɛ ɓɛŋma Mɛsi,» yite nde *Krist. 42 Ɛ nyɛ ɓu̧ Simɔn kɛ̀ nɔ kɛ yi Yesus. Ɛ Yesus kaŋɛ misi ɓɛŋɛ Simɔn lɛpɔ nde: «Ɗinɔ ɗyɔ nde Simɔn, ɗinɔ sɔŋgwɛ nde Jaŋ. Ɓo ta jeɓa wɛ nde Sefas, yo Piyɛr, yite nde tari.»

43 Misi pupɛ ɛ Yesus pɛsɛ nde, a kɛ kwa̧ kɛ̀ Galile. Ɛ nyɛ saŋgwa nɛ wɛtɛ mbam nde Filip. Ɛ nyɛ lɛpɛ nyɛ nyɛ nde: «Ɓeŋgwɛ mi.» 44 Filip ɓa̧ mɔ ɗya Betsayda, ɗya ɓe Andere ɓenɛ Piyɛr. 45 Kɛ kɔŋte, ɛ Filip kwa̧ saŋgwa ɓenɛ Nataniyɛl. Ɛ nyɛ lɛpɛ nyɛ nyɛ nde: «Wusɛ ɓɛŋma mɔ te yi Mɔyisi kɛtima yasi kɛ kasi nɛ kɛ mɛkana mɛ mɛmboŋga mɛ Njambiyɛ te yi nyɛ kɛtima kɛ́. Ɓotu ɓe punja mɛlɛpi mɛ Njambiyɛ lɛpima sendi kasi nɛ. Mɔ te, yo Yesus te mɔnɔ Yosɛp, ɗya ɗyenɛ kɛ Nasarɛt.» 46 Ɛ Nataniyɛl yeŋsa nyɛ nyɛ nde: «Kimɔ yasi te nda yakama wulɛ kɛ Nasarɛt kɔ?» Ɛ Filip nje yeŋsa nyɛ nyɛ nde: «Inja nje ɓɛŋɛ.»

47 Yesus ɓɛŋma Nataniyɛl kɛ kɛ̀ kɛ yenɛ. Ɛ nyɛ lɛpɛ kɛ kasi nɛ nde: «Yɔkɔ gba mɔnɔ kandɔ Isarayɛl nɛ yotu. Ko mɔnɔ yekambiyɛ te yi seɓila mumɔ yeti kɛ yotu nɛ na.» 48 Ɛ Nataniyɛl diyɛ nyɛ nde: «Wɛ dúkwɛ mi we?» Ɛ Yesus yeŋsa nyɛ nyɛ nde: «Piŋɔ te yi Filip tì pa jeɓa wɛ na, kɛ ŋgimɔ te yi wɛ ɓa̧ kɛ nji̧ *figiye kɛ́, mi ɓɛŋma wɛ.» 49 Ɛ Nataniyɛl yeŋsa nyɛ nyɛ nde: «Yekele, wɛ Mɔnɔ Njambiyɛ, wɛ Kumande Isarayɛl.» 50 Ɛ Yesus lɛpɛ nyɛ nyɛ nde: «’Yo kɛto mi lɛpima nyɛ wɛ nde, mi ɓɛŋma wɛ kɛ nji̧ *figiye, yori yi wɛ tikɛ nɛ temɔ ndana nɛ mi kɛ́? Ma wɛ ta ɓɛŋɛ yiŋa nyaŋgwɛ mɛkele kwa̧ yikɛ.» 51 Ɛ Yesus kɛ̀ mbɔmbu lɛpɔ nyɛ nyɛ nde: «Gbakasi yi mi lɛpɛ nyɛ wunɛ kɛ́: Wunɛ ta ɓɛŋɛ ɗyoɓɔ nyasɛ, ɓɛŋɛ ɓejaki ɓe Njambiyɛ kɛ kɛ̀ kwey piyɛ yaka nɛ to *Mɔnɔ mumɔ.»