1 Titus naba name! Na Paulus Allah arukna wamnangeri mome ane an sembe palilamna. Na Allah arukna wamna alamnangena, Allahri samenag Yesus webogti, “Mog so'oag nimi taulbahaimendi, saelbamsilulam,” aro poghogne Yesus yaogne sembe si Kristus aro engero yabiog. Yesus Kristusti na weplamneogti, “Ambarelamsimenba, Allahri yum-yum samenag wepsiogti, yoplamsil nimiri sik sembaukang,” aro Yesusti na pogneog. Wene aro pogneogpa na Allah arukna wamnange alamna. Eldi pogneogpa ambarelamsinne pere agha sikne eltaikti, Allahri wana yeng nenerop nimi sunsunum uro urop nimi wamukang. 2 Allahri anam im so'o sumban komag ya'ag kamag uro un yubu eneko salag pibog. Salag pibogne neneko Allahri orolenange nimiag lemnep kom ane sembe ya'ag kamag wameberi wamukap aro nang-nangaro Yesus sembe ambarelamsindi, elap nhon ya'ag wamukap aro tibogto wamap. 3 Allahri samenag seneraghognena, “Li ko'o wepnange anekoag Yesus sembe ka'ebaikti, elag sikne aro seneraglamikpa, Nanap nhon ya'ag wamukap,” sembaog. Sembaogti, salag pibogti, yubu Yesus sembe yubu eneko Allah nu talulamsilne ponekori na sa'oag piboba ambarelamsin. 4 Name Titus, nari Yesusag sikne aro seneraglamna saog uro andi babe nari ambarelangkenne nelepto sik uro Yesusag seneraglamlam ane sembe an sik uro naba name senelamna. Naba name senelamnari, an sembe Nuni Allahag “yeplamlulam,” aro mololamnaba, wana waliri walia ulangkeleri, wana aingnilangkilul. Allah Elme Yesus Kristusti nu talulamsilne ponekori babe wana waliri walia ulangkeleri, wana aingnilangkilul aro an sembe molbarelangken.

5 Nari an mag kanero longorop mog so'o Kreta laploa yaghenongena andi nuri Yesusti awe tolamnomori sirikag wamlange komopto tolamlulam aro laploa yagheno. Ane sembe andi as ni Kreta mog so'oag ubu pilamlange sunsunum uro Yesusag seneragtop nimi ambatto wembahinep nimi* Indonesia yubuag “penatua” alamang. ebahimundi, ambatkenonge sunsunum uro toro seki-seki yabihilulam. 6 Allah Elmabo wenehiro piamsinep nimi wepsilulam nimina:

ambatkenonge sunsunum uro wepsululam. 7 Allah Elmabo piamsikti kemelamsikti saelbamsukang nangna Allahri awe torop nang ane sembe,

Wamlange abini irikna phibom agha wepsinep kom. 8 Allahri mabo piamsileri Allahri awe tolamlul nimi sekitsululam nimina:

9 Wamnep nimi sekitsilulamnena, Yesus yubu sik uro ambarelamsiapne sunsunum uro sikne aro seneraglamikti mikip saelbamik nimi agha sekitsilulam. Sekitsimenba eldi nimi yubu walinge agha el babe elwamleri nimi wembamsilul. Wembamsileba orolena yubu lerop nimiri “Andi yubu sikne komne,” aro yubu lelamik nimiag babe tangoro ambatsileba, “Eldinge sikne agha lepla,” aro ali sembaukang. 10 Sa'a sembe el elwamleri nimi wembamsileri, elag, “Andi yubu sik komne,” aro yubu lerop nimiag tangoro ambatsilul sen, tamna ane sembe: Nengabo kon tepnange† Yahudi nimi sikin mabo kon kareplamsiek nena sikin mabo mangalamsieka ik lin sum ae kwelekto palamog sum eneko kere kon kareplamsiek. Allahri Abrahamag ambarogne sunsunum uro sindi senelamekti, Nu Yahudi nimi Allahap ma'aptangto wamap aro kere kon sirikag kareplamekpa, kekneba ya'ag taog. (Sumbaogha 17:10-14). Kere kon teplamekti sin Yahudi nimiri senennena nu Yahudi nimi nengabo wamapne Allahringe wamap aro ulamek. sembe mikip saelba urop nimi, nimi sisa Yahudi nimi taneko maikno orolenange agha lelamang. Orolena lelamangnena, “Paulusti Yesus sembe ambarelamsilne mombolag wamukap kom,” alamang. “Yesusag sikne aro seneragtop nimi nengabo kon karebel talamik taneogna, Yesusti sin taulbahilul,” aro yubu kamola parektop yubu lelamang. Ane sembe wepsululam nimi tanekori Allah Elmabo piamsikti, kemelamsikti, saelbamsukang. Allah Elmabo piamsikti, orolenange lelamik nimiag tangoro ambarelamsukang. 11 Sin kon tepnange sembe orolenange ambatsirop nimiri ora nimiri ae lomag taneko wa'ina “Kal ma'al tatsiseng” aro moloropne alinge ulamangdi, sik komne ambarelamsiang. Sindi orolena ambarelamsiangdi, “Yesusag sikne aro seneragtop nimi nengabo kon karebel talamik taneogna, Yesusti sin taulbahilul,” aro ambarelamsiangdi, wana samsamolamsiang. Orolena ambarelamsiangba, Yesusag seneragtop nimiri orolenange sembe sik senelamang ane sembe orolenange ambatsiropnang pam lepsilulom. Nen ekel ina ambatto wana samsamomna nenelopsukang kom. 12 Samenag nimi nubunge nhon sin Kreta nimi agha sindam nimi wameka sembe anabiag wamogneri babe sin Kreta nimi sembe lebognena, “Kreta nimi nimiag yubu orolenange lero, paikam yonge saog uro ua nia mangkina uan koma aboap sembe agha tena aboap uro urop nimi,” seog. 13 Kreta nimi eneri lebognena sik andagha lebog. Ane sembe andi sin yubu mikip uro wembamsilulam. Wembamsimenba sindi Yesusag seneragtopne sembe sikne agha saelbamikti seneraglamukang. 14 Wene Kreta nimiri orolenange seneraglamangne lipsukang aro ambarelangken. Yahudi nimiri nimi yana sembe lelero neplamangdi, unualulom-unualulom aro nimiri wanaag agha ambarelamsiangba, Kreta nimiri ka'elamangdi, sik senelamang. Sik senelamang aghana lelero neplamangneap, saelba ulamangneap yubu sikne sunsunum uro lelamang kom. Ane sembe sik komne Kreta nimiri lipsukang aro wembamsululam aro ambarelangken. 15 Nimi etneri Yesusag sikne aro seneraglamikne, Allah Eldamne Yame Walingeri malinge nimi enekori wanaag ua ulamlange a'elero yag lanalamsildi, Titus 3:5 nimi eneko Allah whingag wali nenelamsil. Ane sembe sa'a nia ulamnange, tenaba telamnange sembe Allahri nimi Yesusag seneragtop nimi wa'epto toboghainep kom. Aghana Yesusag anam sikne aro seneragtop kom nimina sindi wanaag Allah Eldamne Yame Walingeri malinge wamlange yag lanalamsil kom, ane sembe Allahri sindi ulamangne sembe nimi sikne sembahinep kom. Nimi undop nimi, sindi usoghag seneragna babe sindi wanaag seneragnange babe sindi malingeog uro seneragtop ane sembe sin sembe Allahri wali sembahainep kom. 16 Sindi lelamangdi, “Nu Allah sembe yabo telekto elwamapti, Elap sae tiptangto wamap,” alamang aghana sindi wanaag agha ulamangneri Allahap sae tiptangto wamang kom aro el nenelamsil. Sin sembe popmagha sirikti, sindi wanaag agha walinge nhon babe uanep kom saog wamlaba, Allahri senerop komneog ulamang.