Ya pigsulat adti manga utaw na Hibriyu na nyangintu-u kan Jisus
1
Matas pa si Jisu-Kristu kay sa manga propita
1 Asini muna, madég ya manga allaw na miglong ya Tyumanem adti kanaten mangkabaklegay magi sa manga propita nan, aw madég ya pa-agi na paglong nan kanilan. 2 Manang adun na manga kamoliyan na allaw, miglong ya Tyumanem kanaten magi sa kanan Ise'. Kay magi sa kanan Ise' pig-imo' nan ya kadakula' na banwa, aw yan ya pigpatagtun nan sa kadég. 3 Dun ni kanan, pagkita-en ya kalalamdag na katulus na Tyumanem. Aw kun unu ya Ama, maynan uman ya Ise'. Aw magi sa katulus na kanan tingeg, ya kadég na pig-imo' nan asini muna, kenne' nan migpadeleg taman adun. Aw awun pa pig-imo' nan pada kalinisan ya manga utaw sa manga sala' nilan, aw tigkas yan nyingkud sakanan adti kalintu na trunu na Tyumanem na awun ni tas na langit.
Matas pa si Jisu-Kristu kay sa manga anghil
4 Aw to-o matas ya Ise' na Tyumanem kay sa manga anghil. Aw ya pig-atag kanan na ngalan to-o pa dengganen kay sa manga anghil. 5 Kay wala' ya sambuk na anghil na piglongan na Tyumanem:
“Ikaw ya kanak Ise',
aw adun, pigpakita' ku na aku ya kanmu Ama.” *1:5a Mabasa yeiy adti Salmo 2:7.
Aw dun ni kanan paglong, beke' na anghil ya pigkasampetanan nan sa maynini:
“Aku ya Ama nan, aw sakanan ya kanak Ise'.” *1:5b Mabasa yeiy adti 2 Samwél 7:14 aw adti 1 Kronikas 17:13.
6 Aw sa pagpadala na Tyumanem sa kanan tamisa na Ise' asini tas na lupa', miglong sakanan:
“Kamu na manga anghil, pagsimba͡en mayu sakanan.” *1:6 Yeiy ya pigsulat dun ni Déutéronomiyo 32:43 aw Salmo 97:7.
7 Aw ini pa uman ya piglong nan:
“Ya kanak manga sugu-anen na anghil, mabatug ku silan imo-un kasiling na samet,
aw kasiling na atulun.” *1:7 Mabasa yeiy adti Salmo 104:4.
8 Manang miglong ya Tyumanem adti kanan Ise',
“Ya trunu na kanmu pagka Tyumanem, wala' ya katigkasan.
Aw ya bangka' na gayed mu pig-awidan,
yan ya pangilala sa paghari' mu sa kanmu kasakupan.
Aw matinaw ya kanmu pagdumala.
9 To-o kaw pagkatutukan sa mangkadyaw na imo-unun,
manang dili' mu pagkaliman ya mangkalatay na imo-unun.
Yanagaw, aku na Tyumanem mu ya migpatas kanmu aw pig-atagan ta kaw na pagleya na wala' ya maka-unawa,
aw to-o pa dakula' ya kanmu pagleya kay sa kanmu manga eped.” *1:8-9 Mabasa yeiy adti Salmo 45:6-7.
10 Aw awun uman pigpasulat na Tyumanem na maglong adti Ise' nan:
“Kay Pangulu, asini muna pagkalekat, ikaw ya mig-imo' sa kadakula' na banwa,
aw ya langit pig-imo' na kanmu tullu'.
11 Dumateng ya allaw na malagak ya kadég nilan, manang ikaw, kenne' mu awun.
Ya kadég nilan alag magkadadan kasiling na kadégkadég na magkalugnas.
12 Aw kasiling uman na kadégkadég na malawig, lulunun mu silan aw dayaw mu silan sayuwan.
Manang ikaw, kenne' mu na dili' ma-uman aw wala' ya katigkasan.” *1:10-12 Mabasa yeiy adti Salmo 102:25-27.
13 Aw wala' ya anghil na piglongan na Tyumanem sa kasiling na piglong nan sa Ise' nan:
“Ingkud kaw apit asini kalintu na trunu ku,
menda' na mabus ku degen ya manga po-on mu
aw betang ku silan adti salad na siki mu.” *1:13 Mabasa yeiy adti Salmo 110:1.
14 Yanagaw unu kadi' ya manga anghil? Olo' saba silan manga sugu-anen na Tyumanem. Pangkay kun dili' silan pagkita-en manang pigpadala nan silan na un tumabang sa manga utaw na dumawat sa ginawa na wala' ya katigkasan.
*1:5 1:5a Mabasa yeiy adti Salmo 2:7.
*1:5 1:5b Mabasa yeiy adti 2 Samwél 7:14 aw adti 1 Kronikas 17:13.
*1:6 1:6 Yeiy ya pigsulat dun ni Déutéronomiyo 32:43 aw Salmo 97:7.
*1:7 1:7 Mabasa yeiy adti Salmo 104:4.
*1:9 1:8-9 Mabasa yeiy adti Salmo 45:6-7.
*1:12 1:10-12 Mabasa yeiy adti Salmo 102:25-27.
*1:13 1:13 Mabasa yeiy adti Salmo 110:1.