8
Si Jisus ya To-o Matas na Magdadugsu-ay na pigpakang na Tyumanem
1 Na, ini ya tengteng puntu na piglong nami kamayu: Awun saba To-o Matas na Magdadugsu-ay na migpatenga' kanaten na adtu la ni tas na langit. Nyingkud sakanan apit adti kalintu na trunu na Ama na yan ya Tyumanem na to-o pagdeyen. 2 Aw pig-imo' nan ya kanan manga imo-unun dun ni tengteng pagsimba͡an sa Tyumanem. Aw ya pagsimba͡an yeiy, wala' na manga utaw imo-a manang Tyumanem ya mig-imo'.
3 Asini tas na lupa', ya pigpamalli' na ma-imo' pangulu na manga magdadugsu-ay, yan ya mag-atag sa manga dugsu' adti Tyumanem. Yanagaw ya kanaten uman To-o Matas na Magdadugsu-ay, ka-ilangan na awun uman kanan atag na dugsu'. 4 Na, kun kenne' ni Jisus asini tas na lupa', dili' sakanan ma-imo' magdadugsu-ay kay awun da manga magdadugsu-ay na dyumalug sa Uldin na pig-atag na Tyumanem kan Moysis. *8:4 Dun ni manga allaw ni Jisus, kenne' pa na manga magdadugsu-ay migdugsu' adti Témplo dun ni Jérusalim. Pangkay mig-imo' ya Tyumanem sa bagu na pakang magi kan Jisus, manang lekat na pagkamatay ni Jisus, kapatan ya umay na migpadeleg silan migdugsu', menda' na pigkalat na manga sundalu na Roma ya Témplo dun ni umay na 70. 5 Aw ya pagsimba͡an nilan sa Tyumanem, olo' yeiy alung sa adti tas na langit. Kya-ede-an tadun kay piglongan na Tyumanem si Moysis, “Sa pag-imo' mayu sa un pagsimba͡an kanak, magpakatadeng kaw na dayaw mu madalug ya kadég na pigpakita' ku kanmu adti buntud.”*8:5 Mabasa adti manga kapitulu 25-26 na Éxudo ya manga piglong na Tyumanem kan Moysis sa pag-imo' sa un pagsimba͡an kanan asini tas na lupa'.
6 Manang to-o pa madyaw ya imo-unun ni Jisus na migpatenga' adun kay sa manga magdadugsu-ay na migpatenga' adti Témplo. Kay to-o pa madyaw ya bagu na pakang na Tyumanem, asuntu na pigpaligena' nan dun ni kanan manga pigpakang na to-o pa madyaw. 7 Kun nyalingeb pa na muna pakang ya palpa na Tyumanem, dili' da ka-ilangan ya bagu. 8 Manang kyinita' na Tyumanem na awun pa pagsala' sa pagdalug na manga utaw na Isra-el sa muna pakang. Yanagaw miglong ya Tyumanem:
“Dumateng ya allaw na mag-imo' aku sa bagu na pakang adti manga utaw na Isra-él aw sa manga utaw na Juda.
9 Aw dili' da kasiling na tagna' na pakang ku idtu muna na pig-imo' ku adti manga tyugbulan nilan
dun ni pag-agak ku kanilan lekat adti nasud na Ihiptu.
Wala' nilan padelega ya pagdalug sa manga sugu' ku,
yanagaw pigpabaya-an da ku silan.
10 Manang ini ya bagu na pakang na un ku imo-un sa manga buwadbuwad ni Isra-él sa manga allaw na dumadateng pa:
Betang ku ya kanak manga sugu' dun ni anenganeng nilan
aw dayaw ku tanemen adti seled nilan.
Ma-imo' aku Tyumanem nilan,
aw silan uman ma-imo' kanak manga utaw.
11 Aw dili' da nilan ka-ilangan palna-uwan ya kanilan manga eped kun singalan aku,
kay alag da silan maka-ede' kanak,
pangkay ya manga tagitu' aw manga utaw na dengganen.
12 Kay kallatan ku silan,
aw kalingawan da ku ya manga malatay na imo-unun nilan,
aw dili' da ku anenganengen ya manga sala' nilan.’ ” *8:8-12 Mabasa yeiy adti Jérémiyas 31:31-34.
13 Yanagaw, sa paglong na Tyumanem na awun bagu na pakang, dun da nan pa-ede-an na wala' da ya katukanan sa muna pakang, aw dili' madugay malagak da.
*8:4 8:4 Dun ni manga allaw ni Jisus, kenne' pa na manga magdadugsu-ay migdugsu' adti Témplo dun ni Jérusalim. Pangkay mig-imo' ya Tyumanem sa bagu na pakang magi kan Jisus, manang lekat na pagkamatay ni Jisus, kapatan ya umay na migpadeleg silan migdugsu', menda' na pigkalat na manga sundalu na Roma ya Témplo dun ni umay na 70.
*8:5 8:5 Mabasa adti manga kapitulu 25-26 na Éxudo ya manga piglong na Tyumanem kan Moysis sa pag-imo' sa un pagsimba͡an kanan asini tas na lupa'.
*8:12 8:8-12 Mabasa yeiy adti Jérémiyas 31:31-34.