Ya Madyaw na Ubat-ubat kan Jisu-Kristu na pigsulat ni Matiyo
1
Ya manga tyugbulan ni Jisus
1 Ini ya tultulanen sa manga tyugbulan ni Jisu-Kristu: Si Jisus lekat adti buwadbuwad na hari' na si Dabid, aw si Dabid lekat adti buwadbuwad ni Abraham.
2 Na, si Abraham, yan ya ama ni Isaak,
aw si Isaak, yan ya ama ni Jakub.
Aw si Jakub, yan ya ama ni Juda aw manga inulug nan.*1:2 Ya sampulu' tag duwa ya ise' ni Jakub na eseg, silan ya lyekatan sa kadég na utaw na Isra-él. Mabasa tadun ya kanilan manga ngalan adti Génésis 46:8-27.
3 Si Juda, yan ya ama ni Paréz aw si Zéra na pingin na alag eseg. Si Tamar ya ina nilan.
Aw si Paréz, yan ya ama ni Hézron,
aw si Hézron, yan ya ama ni Aram.
4 Si Aram, yan ya ama ni Aminadab,
aw si Aminadab, yan ya ama ni Na-asyon.
Aw si Na-asyon, yan ya ama ni Salmon.
5 Aw si Salmon, yan ya ama ni Boaz. Aw ya ina ni Boaz si Rahab. *1:5 Ya kasampetanen kan Rahab mabasa tadun adti Joswé 2:22-25.
Aw si Boaz, yan ya ama ni Obéd. Aw ya ina ni Obéd si Ruth.
Si Obéd, yan ya ama ni Jési,
6 aw si Jési, yan ya ama ni Dabid.
Aw si Dabid nya-imo' hari' na banwa na Isra-él.
Aw si Dabid, yan na ama ni Solomon magi sa ka͡ubayan ni Uriyas. *1:6 Ya ka͡ubayan ni Uriyas pigkasampetan adti 2 Samwél 11:1-27.
7 Si Solomon, yan ya ama ni Robowam,
aw si Robowam, yan ya ama ni Abiyas.
Aw si Abiyas, yan ya ama ni Asa.
8 Aw si Asa, yan ya ama ni Josapat,
aw si Josapat, yan ya ama ni Joram.
Aw si Joram, yan ya ama ni Usiyas, *1:8 Si Usiyas, yan ya sambuk na buwadbuwad ni Joram. Asini birsikulu piggamit ni Matiyo ya tingeg ‘ama’, manang ya palabet nan asini yan ya mangkabaklegay. Mabasa adti 2 Hari', aw 1 Manga Kronikas 3:10-12, aw adti 2 Manga Kronikas 20:31-26:23.
9 aw si Usiyas, yan ya ama ni Jotam.
Aw si Jotam, yan ya ama ni Akas,
aw si Akas, yan ya ama ni Hézékyas.
10 Aw si Hézékyas, yan ya ama ni Manasés,
aw si Manasés, yan ya ama ni Amon.
Si Amon, yan ya ama ni Josiyas,
11 aw si Josiyas, yan ya ama ni Jékonyas *1:11 Si Josiyas, yan ya bakleg ni Jékonyas. Mabasa tadun adti 1 Manga Kronikas 3:15-16. aw ya manga mangkangud nan. Na, dun ni manga allaw nilan, ya madég na manga utaw na sakup na Juda pigtaban na manga taga Babiloniya.
12 Aw dun ni banwa yan, si Jékonyas ya ama ni Salati-él.
Aw si Salati-él, yan ya ama ni Zérubabél.
13 Aw si Zérubabél, yan ya ama ni Abiyud.
Aw si Abiyud, yan ya ama ni Éliyakim,
aw si Éliyakim, yan ya ama ni Azor.
14 Si Azor, yan ya ama ni Zadok,
aw si Zadok, yan ya ama ni Akim.
Aw si Akim, yan ya ama ni Éliyud,
15 aw si Éliyud, yan ya ama ni Éliyazar.
Si Éliyazar, yan ya ama ni Matan,
aw si Matan, yan ya ama ni Jakub.
16 Aw si Jakub, yan ya ama ni José,
aw si José, yan ya eseg ni Maria.
Aw adti kan Maria ka͡utaw si Jisus.
Aw si Jisus, yan ya pigtawag na Misiyas.*1:16 Ya kakawasan na Misiyas: Kristu na pigpadala na Tyumanem.
17 Yanagaw awun sampulu' tag upat ka alintuwad ya buwadbuwad lekat kan Abraham menda' adti kan Dabid. Aw awun sampulu' tag upat uman ka alintuwad ya buwadbuwad lekat kan Dabid menda' sa allaw na pigtaban na manga taga Babilonya ya manga utaw na Juda. Aw awun sampulu' tag upat ka alintuwad lekat na allaw na pagtaban menda' sa pagka͡utaw na Misiyas.
Ya pagka͡utaw ni Jisus
18 Ini ya nya-imo' dun ni pagka͡utaw ni Jisu-Kristu: Ya ina nan si Maria na tawas ni José. Manang sa wala' pa silan pag-ipid, kya-ede-an da ni Maria na nyabdes sakanan magi sa Ispiritu Santo. 19 Na, si José gayed sakanan dyumalug sa Uldin na manga Judiyu. *1:19a Ya Uldin yan ya manga sugu' na Tyumanem sa manga utaw na Isra-él. Aw dili' sakanan malim na mulamula͡en ya tawas nan adti asdangan na manga utaw. *1:19b Dun ni Uldin awun sugu' kun unu ya imo-un adti ka͡ubayan na bagu nyangugnan na migkasala-enen adti eped na eseg. Mabasa yeiy adti Déutéronomiyo 22:23-24. Yanagaw migpalpa sakanan na atagan nan na papilis sa pag-ayaw na wala' ya utaw na maka-ede'. 20 Manang sa gayed pa nan yeiy pig-anenganeng, awun anghil na Tyumanem na migpakita' kanan magi sa tagaynep aw law nan, “We... José na buwadbuwad ni Dabid. Dili' kaw magduwaduwa magpanga͡ubayan kan Maria. Kay ya pagkabdes nan, magi saba sa Ispiritu Santo. 21 Aw ka͡utawan sakanan sa ise' na eseg. Aw ngalanan mu ya ise' na ‘Jisus’ kay un nan paluwa-en ya kanan manga utaw lekat adti manga sala' na mig-allang kanilan.” *1:21 Ya kakawasan na ngalan Jisus: Magpaluwa-ay.
22 Na, dun ni kadég yeiy na nya-imo', nyatuman da ya pigpasulat na Tyumanem magi sa propita nan asini muna: 23 “Pakanyegi! Awun sambuk na dalaga na mabdes pangkay wala' pa ka-ilabeti, aw mag-ise' sakanan sa ise' na eseg aw pagtawagen nilan sakanan na Imanwél na ya kakawasan: Ya Tyumanem asini sayid tadun.” *1:23 Mabasa tadun adti Isayas 7:14.
24 Sa pagmata ni José, pigtuman nan ya piglong kanan na anghil, aw pigpanga͡ubayan nan si Maria. 25 Manang wala' pa nan ipidi menda' na kya͡utawan da si Maria sa ise' nan na eseg. Aw pigngalanan ni José ya ise' yeiy na “Jisus.”
*1:2 1:2 Ya sampulu' tag duwa ya ise' ni Jakub na eseg, silan ya lyekatan sa kadég na utaw na Isra-él. Mabasa tadun ya kanilan manga ngalan adti Génésis 46:8-27.
*1:5 1:5 Ya kasampetanen kan Rahab mabasa tadun adti Joswé 2:22-25.
*1:6 1:6 Ya ka͡ubayan ni Uriyas pigkasampetan adti 2 Samwél 11:1-27.
*1:8 1:8 Si Usiyas, yan ya sambuk na buwadbuwad ni Joram. Asini birsikulu piggamit ni Matiyo ya tingeg ‘ama’, manang ya palabet nan asini yan ya mangkabaklegay. Mabasa adti 2 Hari', aw 1 Manga Kronikas 3:10-12, aw adti 2 Manga Kronikas 20:31-26:23.
*1:11 1:11 Si Josiyas, yan ya bakleg ni Jékonyas. Mabasa tadun adti 1 Manga Kronikas 3:15-16.
*1:16 1:16 Ya kakawasan na Misiyas: Kristu na pigpadala na Tyumanem.
*1:19 1:19a Ya Uldin yan ya manga sugu' na Tyumanem sa manga utaw na Isra-él.
*1:19 1:19b Dun ni Uldin awun sugu' kun unu ya imo-un adti ka͡ubayan na bagu nyangugnan na migkasala-enen adti eped na eseg. Mabasa yeiy adti Déutéronomiyo 22:23-24.
*1:21 1:21 Ya kakawasan na ngalan Jisus: Magpaluwa-ay.
*1:23 1:23 Mabasa tadun adti Isayas 7:14.