7
Ya sanggatus aw kapatan tag upat ka malalan ya manga utaw na Isra-él
1 Aw pagkatigkas yan, kyumita' aku sa upat ya anghil: Ya sambuk nyindeg apit adti silatan, aw ya sambuk apit adti sallepan, aw ya duwa migdadipagay silan apit adti balabagan. Aw pigtagenan nilan ya samet pada dili' tumambel asini tas na lupa' aw adti dagat, aw adti pangkay unu na kawuy. 2 Aw tigkas yan, awun kyinita' ku na sambuk uman na anghil na apit adti silatan na nya-engat pasinan adti langit. Aw awun pigdala nan na lekat adti Tyumanem na gayed awun na un pagmarka sa kanan manga utaw. Aw pigtatawag nan ya upat ya anghil na pig-atagan na Tyumanem sa katundanan na un magkalat sa lupa' aw sa dagat, 3 aw law nan kanilan, “Ya-i pa mayu pag-ilabeti ya lupa' aw ya dagat aw ya manga kawuy. Tagadi pa na kamarka͡an naten una ya bayu' na manga utaw na sugu-anen na Tyumanem.”
4 Aw wala' kadugay, pigdengeg ku na ya kadég na manga utaw na kyamarka͡an da, sanggatus aw kapatan tag upat ka malalan na alag lekat adti buwadbuwad na manga mangayse' ni Isra-él na eseg.
5 Sampulu' tag duwa kamalalan ya lekat adti manga buwadbuwad ni Juda,
sampulu' tag duwa kamalalan ya lekat adti buwadbuwad ni Rubin,
sampulu' tag duwa kamalalan ya lekat adti buwadbuwad ni Gad,
6 aw sampulu' tag duwa kamalalan ya lekat adti buwadbuwad ni Asyir,
aw sampulu' tag duwa kamalalan ya lekat adti buwadbuwad ni Naptali,
aw sampulu' tag duwa kamalalan ya lekat adti buwadbuwad ni Manasis,
7 aw sampulu' tag duwa kamalalan ya lekat adti buwadbuwad ni Simyon,
aw sampulu' tag duwa kamalalan ya lekat adti buwadbuwad ni Libi,
aw sampulu' tag duwa kamalalan ya lekat adti buwadbuwad ni Issakar,
8 aw sampulu' tag duwa kamalalan ya lekat adti buwadbuwad ni Zébulun,
aw sampulu' tag duwa kamalalan ya lekat adti buwadbuwad ni José,
aw sampulu' tag duwa kamalalan ya lekat adti buwadbuwad ni Bénjamin.
Ya pagdeyen na madég na utaw dun ni asdangan na trunu na Tyumanem
9 Pagkatigkas yan, tanawa! Awun kyinita' ku na madég to-o na manga utaw na dili' mabatug iyapen. Aw pangkay unu ya batek na kindal nilan, aw kun unu ya kanilan tribu, aw ayin nasuda ya lyekatan nilan, aw kun unu ya punganan na tingeg na piglong nilan, alag silan nyan-indeg adti asdangan na trunu na Tyumanem aw asdangan na Nati na Karniro. Aw alag silan migkadégkadég sa maputi' aw nyan-awid sa manga palwa na palma. 10 Aw miglong silan sa dakula' na tingeg:
“Ya pagpaluwa' kanaten lyumekat saba adti Tyumanem na yan ya nyingkud adti trunu
aw lekat adti Nati na Karniro!”
11 Aw ya kadég na manga anghil, pigpalibedan nilan ya trunu aw ya kaluwa͡an tag upat ya maggagaday, aw ya upat ya kérubim. Aw lyumuhud ya kadég na manga anghil adti asdangan na trunu aw pigsimba nilan ya Tyumanem. 12 Aw miglong silan,
“Yeiy saba ya matinaw,
ya kanaten Tyumanem yan olo' ya umba' deyen
kay matas ya kanan dengeg,
aw umba' sakanan pasalamatan.
Umba' uman sakanan basa͡an,
asuntu na to-o dakula' ya kanan katadeng,
aw to-o sakanan matulus aw mabagseg.
Yanagaw naten deyen na wala' ya tyamanan!
Amén.”
13 Aw tigkas yan, nyusip kanak ya sambuk lekat adti kaluwa͡an tag upat ya maggagaday, law nan, “Unu, nya-ede' kaw kun singalan ya manga utaw yeiy na syumut sa mangkatas na kadégkadég na maputi'? Aw ayin silan lekat na banwa?”
14 Aw tyumubag aku kanan, “Wala' ku beg ka-ede-i, kay Sir.”
Aw miglong sakanan kanak, “Yeiy saba ya manga mangintu-uway na nyakati-is sa to-o dakula' na pamulayam. Pigbugsakan da nilan ya kanilan manga kadégkadég aw magi sa dugu' na Nati na Karniro, migkaputi' da ya manga kadégkadég nilan. 15 Yanagaw nyan-indeg silan adti asdangan na trunu na Tyumanem. Allaw aw gabi gayed nilan pig-imo' ya pagkaliman nan, aw tamengan nan silan. 16 Aw dili' da silan magetem aw talaynemen, aw dili' da mabelad na sega. 17 Kay diyaga͡an silan na Nati na Karniro na awun ni asdangan na trunu. Aw yan ya mag-allad kanilan adti selep na gayed nyiswak sa tubig na nyatag sa ginawa na wala' ya katigkasan. Aw dayaw na Tyumanem galisan ya manga luwa' na mata nilan.”