18
Ya pagkalat na Babil
1 Pagkatigkas yan, kyumita' aku uman sa sambuk na anghil na nyanog lekat adti tas na langit. Aw dakula' ya katundanan na pig-atag kanan. Aw kya-ilawan ya kadakula' na banwa asuntu na nyinag sakanan. 2 Aw migtatawag sakanan sa dakula' na tingeg, law nan:
“Wala' da! Wala' da ya dengeg na Babil asini tas na lupa'.
Nya-imo' da eya-anan na manga busaw
aw patagu-anan sa kadég na manga malatay na ispiritu,
aw katipunanan na kadég na malipa' na langgam aw malyaw na mannanap.
3 Aw nyagagad na Babil ya kadég na nasud adti pag-imo' sa to-o malatay.
Aw migkasala-enen kanan ya madég na manga hari' asini tas na lupa'.
Aw ya manga magbalikwatay asini tas na lupa' nya-imo' silan makabatug asuntu na to-o sakanan magkalim sa manga ka-unan na dakula' ya alaga'.”
4 Aw awun pa uman dyengeg ku na tingeg na lyumekat adti tas na langit, law nan:
“Kamu na kanak manga utaw, luwa' kamu pagaw makasambuk kamu adti manga sala' na Babil
aw pagaw makasambuk kamu uman sa un pagamak kanan.
5 Kay ya manga sala' nan gayed da mig-ilantulantu menda' na syumangku' adti langit.
Dili' kalingawan na Tyumanem ya madég na pigpan-imo' nan na malatay.
6 Imo-a adti kanilan ya kasiling na pig-imo' nilan adti manga eped.
Kun unu ya pagpamulayam nilan sa eped, dobliya ya pamulayam kanilan.
Yanagaw to-o dakula' ya pagpa-emel-emel na Tyumanem kanilan.
7 Kun sangunu ya pagpatastas nilan sa kanilan pagka-utawun
aw ya kanilan pagkamayaman aw ka-unan na dakula' na alaga',
imo-a kanilan ya umba' sa manga sala' nilan.
Yanagaw atagan silan na manga pagamak aw kakalatan na ginawa,
kay ya Babil kasiling na ka͡ubayan na migpalibantug miglong adti anenganeng nan,
‘Aku ya rayna!
Nyingkud aku adti kanak trunu na un magdumala.
Dili' aku kasiling na balu na migkalat ya ginawa.’
8 Manang asuntu na pagpalibantug nilan, dumateng adti kanilan ya madég na pagamak seled na sangallaw.
Lemenen nilan ya pagkamatay aw ya kageteman aw ya kakalatan na ginawa.
Aw ya datengan nilan ya masangab silan.
Kay to-o matulus si Tyumanem, aw yan ya mag-ukum kanilan.”
9 Aw ya manga hari' asini tas na lupa', kita-en nilan adti mawat na mullut ya ebel na pagkasangab na Babil. Aw magpansisugaw aw magpansi-ulangag silan asuntu sa kakalatan na ginawa nilan, kay nyakasambuk silan kanan adti pagkasala-enen aw pagkamayaman. 10 Magpakawat silan aw tandawan nilan ya laga na atulun na maglagablab. Aw magteneb silan pagaw kasaban silan uman na pagpa-emel-emel aw pagpati-is. Aw maglong silan,
“Syapadan! Syapadan ya syudad iyan!
Wala' da ya ka-unan nan.
Wala' da ya dengeg nan.
Aw wala' da ya katundanan nan asini tas na lupa'.
We...kay Babil, seled na sangka-udas dyumateng da kanmu ya pagpa-emel-emel na Tyumanem.”
11 Pagpansasugaway aw mag-ulangag ya manga magbalikwatay asuntu sa kakalatan na ginawa nilan. Kay wala' da ya manga utaw na un mandata aw mambayad sa kanilan manga paninda na pig-akut nilan. 12 Wala' da ya un mayad sa manga bulawan, aw bulawan na maputi', aw batu na dakula' ya alaga', aw manga pérlas, aw téla, aw kadégkadég na tapel ya batek aw mapula, aw téla na pig-imo' na sinulib na sida. Aw wala' ya un mayad sa manga kawuy na to-o manimbo', aw manga pametang na pig-imo' lekat adti tangu na élipanti. Aw manga pametang na pig-imo' lekat adti kawuy na dakula' ya alaga', aw bronsi, aw putaw, aw batu na to-o magsalinang. 13 Aw wala' uman ya mayad sa sinamon, aw manga anagay, aw insénso, aw mira, aw uliban,*18:13 Ya uliban, yan ya tagek na kawuy na libanos. Kun sunugun ya tagek yeiy, to-o manimbo' ya ebel. aw bino, aw mantika' aw lana na olibo, aw harina, aw trigu. Aw wala' da uman ya un mayad sa manga baka, aw manga karniro, aw manga kuda' aw manga kalisa, aw manga allang. 14 Maglong ya manga magbalikwatay,
“Ya kadég na pametang na kaliman galu na manga utaw tagtunun, nyalanas da baling.
Aw ya kadég uman na manga ka-unan na kanaten pigpalibantug, alag da nyalagak.
Ya kadég yeiy, dili' da kita-en salut!”
15 Aw ya manga magbalikwatay na migkayaman asuntu sa balikwat dun ni syudad yan, magsasugaway aw mag-ulangag silan adti mawat. Kay magteneb silan pagaw maka-eped silan pa-emel-emelen na Tyumanem. Aw to-o magkalat ya ginawa nilan aw maglong silan:
16 “Syapadan! Syapadan ya syudad iyan na dengganen aw manga sakup nan.
Pangkay syumut ya manga utaw sa kadégkadég na to-o manenggeya, aw
kadégkadég na tapel ya batek aw mapula,
aw pangkay syumut silan sa manga pagkana' na bulawan, aw manga batu na dakula' ya alaga' aw manga pérlas,
17 manang seled na sangka-udas, wala' da ya kadég yan.”
Aw ya manga kapitan na manga barko aw ya kanilan manga magtalabahuway aw ya kadég na syumakay, magtandaw uman adti mawat dala ya manga mangisda-ay. 18 Aw talana nilan magtandaw sa ebel na mullut lekat adti syudad, magsi-ulangag silan na maglong,
“Wala' ya maka-unawa sa syudad yan na matas ya dengeg!”
19 Aw sabugan nilan na kutu na lupa' ya kanilan ulu asuntu sa kakalatan na ginawa nilan. Aw magpansisugaw silan aw maglong sa dakula' na tingeg:
“Syapadan! Syapadan ya syudad iyan na dengganen!
Migkamayaman ya kadég na manga tagtun sa barko.
Manang seled na sangka-udas migkalat ya kadég!”
20 Manang ya kadég na awun ni tas na langit, pagleya kamu asuntu sa nya-imo' sa syudad. Pagleya kamu uman na manga apostolés aw propita aw kasakupan na manga utaw na nyangintu-u kan Jisus. Kay pig-ukuman da na Tyumanem ya syudad aw ya manga sakup nan asuntu sa pig-imo' nilan kamayu.
21 Pagkatigkas yan, awun anghil na to-o kesegan na nyulut sa dakula' na batu na kasiling na kabegat na gilingan sa harina. Aw buntugan nan adti dagat ya batu, aw law nan:
“Kasiling na maynini ya ma-imo' sa syudad na Babil na to-o madengeg.
Aw dili' da kita-en ya syudad yan salut.
22 Aw dili' da dengegen lekat adti syudad ya uni na manga arpa aw ya dalangan na manga utaw,
aw maynan uman, dili' da dengegen ya uni na manga plawta aw trumpita.
Aw ya manga magtalabahuway, dili' da uman silan pagkita',
aw dili' da dengegen ya uyaget na manga gilingan dun ni seled na syudad.
23 Aw dili' da uman kita-en ya siga na saleng dun ni manga bintana'.
Aw dili' da uman dengegen ya pagleya na bagu mangugnanay.
Alag yeiy un ma-imo' sa syudad asuntu na to-o migpalibantug ya manga magbalikwatay,
kay magi sa manga talagamutan dun ni syudad kyagawayan baling ya kadég na nasud.
24 Aw beke' na yan da olo'. Pigpa-emel-emel ya syudad yan asuntu na dun pataya ya manga propita na Tyumanem aw manga utaw na nyangintu-u kan Jisu-Kristu,
aw ya kadég na pigpamatay asini kadakula' na banwa.
*18:13 18:13 Ya uliban, yan ya tagek na kawuy na libanos. Kun sunugun ya tagek yeiy, to-o manimbo' ya ebel.