1 Nolǝŋon isa masuṽ husur na-kel-uri-an sua notosǝsǝloŋ hǝni. Na-kel-uri-an ikele ke ikad naitian tosa len gamito. Evi naitian tosa vǝsa batbat. Isa sǝhor naṽide silat lǝsǝkad nadǝlomian: aulum̃an sual ei igol naitian mai asoan atǝman.*Lev 18.8; Deu 22.30. Len nasoruan ta Kris ike: aulum̃an sual ikad asoan atǝman. Ale alitenan savi anana san matmat be evi asoan atǝman. 2 Imabe mǝtupatpat gamit mǝhat hum naten savi natideh? Mitimaslolosa! Mitimaskai hǝn atenan togol natenan dan gamito! 3 Len nibegw nǝsatoh mai gamito, be naut kǝmas nibegw satoh ei, len nanunugw nutoh mai gamito. Ale sum̃an nototoh ei, nusab̃ sǝhoti tia ke len nǝdaŋan siMasta sidato, aYesu, atenan togol natenan timaspanis. 4 Imagenan, len nab̃onb̃onan samito mai nanunugw mai nǝdaŋan siMasta sidato, aYesu, 5 mǝteriŋ atenan len navǝlan aSetan, m̃os nab̃oruan san topul hǝn nǝsaan b̃eb̃uer buni, hǝn aYesu b̃ilav kuv nanunun atenan dan nǝpanismen len Nǝboŋ siNasub̃.†1Tim 1.20. Len naut egai alat lotokad namitisau hǝn nasoruan siGot lukad nabunusian eru. Esual ike: m̃os nab̃oruan san topul hǝn nǝsaan b̃eb̃uer buni, togon ike: m̃os na-mǝdas-niben-an.

6 Na-sor-patpat-gamit-mǝhat-an samito savoi! Mǝtsalǝboii ke tohum nayis a? Nayis tokǝkereh igol nǝflaua p̃isi len nabesin itob.‡Len naṽide tomaienan, avan sua togol nǝsaan emǝdas nǝvanuan gail hǝn galit am leb̃igol nǝsaan enan. 7 Mitimasbar hǝn nayis tomatu, tohun nǝsaan, dan gamito, hǝn mǝtb̃egǝm vi flaua veveu sǝkad nayis lan. Ekitin, mǝtohum nabǝta sǝkad nayis lan. Husur aKristo imat tia hǝn b̃ilav kuv gidat dan nǝsaan sidato. Ehum natuhsipsip lototutumav hǝni len nǝPasova.§Exo 12.3, 5, 21. Nau tǝlmam hǝn nǝPasova namǝkot. AGot ikel mai alat seIsrael ke lipan natuhsipsip ale hani mai nabǝta sǝkad nayis lan. Ale ike libar hǝn nayis p̃isi dan naim salit gail, han nabǝta sǝkad nayis lan len nǝmariboŋ tomǝlevru. 8 Imaienan, datihan len nǝhanan nǝPasova sidato, nayis tomatu tob̃uer, nayis hǝn nǝsaan mai nalǝŋonian hǝn nǝsaan. Be datihan nabǝta sǝkad nayis lan, nabǝta hǝn naveveuan mai nakitinan.*Exo 13.7

9 Len nalob̃ulat napisulan nototosi van hǝn gamit a m̃o, nuke, samtitah mai alat lotogolgol naitian tosa. 10 Nǝboŋ notosor husur alat lotogolgol naitian tosa, nǝsasor husur nǝvanuan navile a pan lotogol naitian tosa. Nǝsasor husur nǝvanuan navile a pan lotolǝŋon masuṽ hǝn natite, o lotovǝnvǝnah o lotolotu hǝn nǝlablab gail. Nǝtake mǝtebulatut dan galito, gamit p̃isi mǝttǝmasgam dan navile eg a pan. 11 Be gagai nukel p̃arp̃ar hǝn namilen natosian sagw a m̃o. Imaiegai ke: samtitah mai avan ideh tokel ke tovi awawa samit len nadǝlomian be togolgol nǝsaan sal. B̃igolgol naitian tosa, b̃elǝŋon masuṽ hǝn natite, b̃ilotu hǝn nǝlablab gail, b̃isor mǝdas nahǝsan nǝvanuan gail, b̃etǝrog akis, o b̃evǝnvǝnah, samtitah maii. Nǝvanuan tomagenan, samtihan maii boŋ ideh.

12-13 Husur sǝpat len ginau hǝn nǝb̃isab̃ sǝhoti ke avan ideh sǝkad nadǝlomian tipanis. AGot dereh tike tipanis o asike ipanis. Avil gamit mǝttokad nadǝlomian, ipat len gamito hǝn mǝtb̃isab̃ sǝhoti ke gamit ideh tosa tipanis. Husur natosian siGot ike, “Mitikai hǝn nǝvanuan tosa dan gamito.”*Deu 13.5, 17.7