1 Tessalonika
Nalob̃ulat napisulan na-vǝha-sual-an aPol totosi van hǝn alat a Tessalonika
Ase itos nalob̃ulat napisulan egai?
APol itosi.
Itos nalob̃ulat napisulan egai hǝn nǝsa?
Itosi hǝn b̃ikel mai alat siYesu len naut a Tessalonika naṽide hǝn lǝb̃igol aGot b̃ehǝhaṽur.
Itos nalob̃ulat egai m̃os ase?
Nalob̃ulat egai evi napisulan aPol totosi van hǝn alat siYesu len naut a Tessalonika.
APol itos nalob̃ulat egai ŋais mai len naut a be?
APol itosi pǝpadaŋ hǝn nasihau A.D. 51 nǝboŋ totoh len naut a Korint.
1) Na-ke-ivoi-an (1.1)
2) Nasipaan vi tǝban aGot hǝn gamit mǝttodǝlom na-kel-uri-an tovoi. Nohǝhaṽur husur mǝtukad nadǝlomian enan sal (1.2–3.13)
3) Nǝmauran togol aGot tohǝhaṽur (4.1-12)
4) Nagǝmaian siNasub̃ (4.13–5.11)
5) Nakelean namǝkot (5.12-24)
6) Nǝ-maris-kotovi-an (5.25-28)
1
Na-ke-ivoi-an
1 Ginau aPol mai aSilas*Len nasoruan ta Kris ike Silvanus, sake Silas, be evi naulum̃an sua ŋai. mai aTimoti, namtutos nalob̃ulat napisulan egai. Namtutosi van hǝn alat a Tessalonika, lotovi siGot mai siNasub̃, aYesu Kristo. AGot teviol kǝmas hǝn navoian mai gamito, tigol nǝlomit tikad natǝm̃at tabtab.†Silas: Uman 15.22; Timoti: Uman 16.1; Alat a Tessalonika: Uman 17.1
Nasipaan tovi tǝban aGot hǝn alat lotodǝlom na-kel-uri-an tovoi
2 Nǝboŋ p̃isi namttosor husur gamito len na-sor-tuṽ-an sinamito, namtosipa vi tǝban aGot tabtab. 3 Nǝboŋ namttosor tuṽ len nǝhon aGot aTǝmadato, namtunau tǝlmam hǝn nauman samito hǝn nadǝlomian, nauman samito hǝn na-lǝmas-buni-an mai nǝ-daŋ-b̃uri-an mǝttokade bathut nǝ-vatvat-viri-an len aMasta sidato, aYesu Kristo.*1Kor 13.13 4 Bathudud nadǝlomian aGot tolǝmas bun gamit p̃isi, namtolǝboii ke ilekis hǝn gamito hǝn mǝtb̃evi esan. 5 Namtolǝboii, husur na-kel-uri-an sinamito husur aYesu sagǝm hǝn gamito len nasoran ŋai, be egǝm len nǝdaŋan, egǝm len aNunun aGot, egǝm len na-lǝboi-sǝhoti-an hǝn nakitinan. Mǝtolǝboi nab̃oruan namttokade nǝboŋ namttotoh mai gamito. Namtutoh maienan hǝn namtb̃evi tarhǝt samito. 6 Ale mǝtosǝsǝloŋ sǝhot nasoruan len nakemkeman togǝm len aNunun aGot, naut kǝmas na-lǝŋon-isa-masuṽ-an mǝttokade. Len naṽide tomaienan, mǝtugol tǝtoṽ hǝn ginamito mai mǝtugol tǝtoṽ hǝn Nasub̃.*Uman 17.5-9 7 Husur natenan, galit p̃isi lotokad nadǝlomian len navile p̃isi len naprovens Masetonia mai a Akaia, lolǝboi lǝb̃eris gamito, gol tǝtoṽ hǝn gamito.‡Masetonia: 2Kor 1.16; Akaia: 2Kor 1.1 8 Husur nasoruan siNasub̃ evivile dan gamito, ikai van hǝn naut p̃isi a Masetonia mai a Akaia, ale na-kel-uri-an husur nadǝlomian samit vi tǝban aGot, ibar naut p̃isi, gol ke sǝkad natideh am hǝn namtb̃ikel husuri. 9 Alat galenan lukel husur nahǝhaṽuran mǝttokade nǝboŋ namttotoh mai gamito, lukel uri ke mǝttopair dan nǝlablab gail van hǝn aGot nǝkadun nǝmauran, van hǝn aGot kitin hǝn mǝtb̃evi esan hum naslev. 10 Lukele am ke mǝttotoh vir natǝlmaman siYesu, aNatun aGot, aGot togol tole mǝhat dan nǝmatan. Evi aYesu egaii b̃ilav kuv gidato dan nab̃iltilol paŋpaŋ siGot b̃egǝmai.