15
Nǝb̃e siMoses mai seTuhsipsip
1 Beti len nǝmav noris navisian toyalyal notomaŋmaŋ lan. Ikad aŋel tomǝlevru lotokad navilesir tomǝlevru lǝb̃egǝm namǝkot. Lovi navilesir namǝkot, husur, len gail, nauman hǝn nǝlol paŋpaŋ siGot ihav.
2 Ale noris natit hum nab̃iltimetduŋduŋ hǝn nakǝlas tob̃on mai nǝhab. Ale tarhǝmetduŋduŋ ikad nǝvanuan galevis lotoil, alat lotowin sǝhor narivatǝvat katkat mai nǝlablab han mai nap̃uruŋan hǝn nahǝsan. Lukad navus beltaŋ aGot tolav gail mai galito, 3 ale lokǝkai hǝn nǝb̃e siMoses, naslev siGot, mai nǝb̃e seTuhsipsip. Luke,
“Nasub̃ aGot gotoyalyal buni,
nǝsa gotogole iyalyal, numaŋmaŋ lan.
Govi Kiŋ hǝn naluṽoh hǝn nǝvanuan naut tiltile,
naṽide sam̃ gail lunor hǝn nanoran mai nakitinan.* Exo 15.1
4 Nasub̃, nǝvanuan gail p̃isi dereh lemǝtahw len nǝyalyalan sam̃;
dereh leputsan nahǝsam̃
husur gaiug govi aGot sǝb̃om̃ gototoh a tut dan nǝsaan.
Naluṽoh hǝn nǝvanuan naut tiltile dereh legǝm
hǝn lǝb̃ilotu hǝn gaiug,
husur nǝvanuan gail p̃isi loris nanoran gotogol gail.”* Jer 10.7; Psa 86.9
Nasiloh emǝlevru mai navilesir emǝlevru
5 Nǝboŋ natgalenan lotonoŋ, nokǝta, noris naim siGot len nǝmav, naim nǝtap̃olen siGot tolo, esǝŋav.* Exo 38.21 6 Aŋel emǝlevru lototǝgau navilesir lotomǝlevru lovivile dan naim siGot. Losun nahurabat nalinen toveveu topǝhw yesyes, ale nǝhau tutuṽ nagol ibaŋis garu len nǝmabulito.* Nalinen evi nǝkaliko pǝhapǝhw tokat udud lotovaii hǝn natret gail topat len nalut nǝflaks. Nǝvanuan gail lolǝmasi husur sagol naut topud hǝn avan ideh tosun nahurabat lotosode hǝn nǝkaliko enan. 7 Beti sua len natit tovat lotomaur, ilav mai aŋel lotomǝlevru, nasiloh nagol emǝlevru lotopul hǝn nǝlol paŋpaŋ siGot, aGot totoh vi sutuai vi sutuai. 8 Ale naim siGot epul hǝn nǝbasuhab togǝm len nǝyalyalan hǝn nǝbathumǝnas siGot mai nǝdaŋan san. Ale avan ideh edǝdas b̃eb̃is len naim siGot vǝbar navilesir tomǝlevru siaŋel gail lǝb̃inoŋ.* Exo 19.18, 40.34-35; 1Ki 8.10-11; Isa 6.4
*15:3: Exo 15.1
*15:4: Jer 10.7; Psa 86.9
*15:5: Exo 38.21
*15:6: Nalinen evi nǝkaliko pǝhapǝhw tokat udud lotovaii hǝn natret gail topat len nalut nǝflaks. Nǝvanuan gail lolǝmasi husur sagol naut topud hǝn avan ideh tosun nahurabat lotosode hǝn nǝkaliko enan.
*15:8: Exo 19.18, 40.34-35; 1Ki 8.10-11; Isa 6.4