1 “Ŋmɩŋ naarɩ wɩa nan dɩ sɩɩ sɩba hɔgʋlɩaŋ baŋ dieke die dɩ nagɩna ba popolisi a ga dɩ ba ga tuoli hɔgʋ faarɩtʋ die wo. 2 Hɔgʋlɩaŋ baŋ wa sʋŋ, banʋ die yiwo gaantɩŋ, ta banʋ wa dɩaŋ dɩ yi sɩsɩbɩrɩŋ. 3 Gaantɩba die dɩ nagɩ ba popolisi ama ta die ka nagɩ kpaaŋ a gʋtɩ pɔgɩlɩ, 4 ama ta sɩsɩbɩrɩba die dɩ nagɩ kpaaŋ a siti siti a yi kɔlɩbɩsɩ ma a gʋtɩ pɔgɩlɩ aŋaŋ popolisi. 5 Die hɔgʋ faarɩtʋ wa die dɩ yʋasɩ keniŋ, die gbieŋ die dɩ yigi be, ba mana die dɩ gʋʋrɩ.

6 “Ta die tanseese die ba wʋŋ kuli; ‘Hɔgʋ faarɩtʋ wa wʋnna! Nɩ keŋ nyɩŋ a tuoli wo!’ 7 Saŋka mi hɔgʋlɩaba baŋka mana die dɩ hagɩ a ŋmɩɩlɩ ba popoli dɩ jʋalɩ. 8 Die hɔgʋlɩa gaantɩba die dɩ jʋʋsɩ sɩsɩbɩrɩba dɩ, ‘Nɩ kaaŋ yɩ tɩ nɩ kpaabʋ bɩta? Dama tɩ popolisi yaala a kpi mɩŋ.’ 9 Ta sɩsɩbɩrɩba die dɩ yiŋŋi balɩ ba dɩ, ‘Aayɩ, bʋ kaaŋ tʋgɩ tɩnɩŋ aŋaŋ nɩ mana. Nɩ gamma vuodiekemba dɩ yalla daa wa jigiŋ a daa bʋtaŋ yɩ nɩ gbaŋ.’ 10 Saŋŋa dieke hɔgʋlɩa gaantɩba dɩ benne sieŋ me a gara dɩ ba daa kpaabʋ, ta hɔgʋ faarɩtʋ wa dɩ keŋ nyɩŋ. Sɩsɩbɩrɩba banʋ wa die dɩ yine siri wo die dɩ dɩ hɔgʋ faarɩtʋ wa a ga juu tigidieke banwʋlaka die dɩ benne, ta die ba ligi sanʋarɩ.

11 “Ka kʋaŋ chaaŋ hɔgʋlɩa gaantɩba die dɩ a keŋ tʋgɩ, a zie sanʋarɩ jigiŋ a wasa, ‘Tɩ Yɔmʋtieŋ, tɩ Yɔmʋtieŋ, yuori sanʋarɩ a yɩ tɩ.’ 12 Ama ta hɔgʋ faarɩtʋ wa dɩ yiŋŋi balɩ ba dɩ, ‘Wusie maŋ bala nɩ, n ka sɩba nɩ.’ ”

13 Die Yisa dɩ bɩ balɩ ba dɩ, “Die wɩa, nɩ sɩmma, dama nɩ ka sɩba daa dieke yaa saŋŋa dieke manɩŋ nɩ Yɔmʋtieŋ dɩ bala n keŋ.

14 “Ŋmɩŋ naarɩ wɩa nan bɩ sɩɩ sɩba tigiŋ tieŋ wʋnyɩ die dɩ bala ʋ dɩa, ta wa ʋ yɔŋɩsɩ a tɩa ba ligire dɩ ba tuo a dime nyʋʋŋ. 15 Die ʋ yɩ ba wʋnyɩ mana ʋ sɩbɩna ʋ kpaŋŋɩnana ʋ gbaŋ dene; die ʋ nagɩ salɩma ligiribie tuse tuse anʋ a yɩ wʋnyɩ, ta die a nagɩ tuse tuse ale a yɩ wʋnyɩ dɩaŋ, ta die a bɩ a nagɩ tusibalɩmɩŋ a yɩ wʋnyɩ dɩaŋ. Ta die a nyɩŋ a ga ʋ dɩasɩ. 16 Die yɔmʋ dieke die dɩ tuone tuse anʋ wa die dɩ nyɩŋ lagɩ lagɩ a nagɩ ligirehe a tʋŋ tʋʋma a bɩ a ye tuse anʋ gbaŋ gbaŋ a gʋtɩ. 17 Vuodieke die dɩ tuone tuse ale wo gbaŋ die dɩ nagɩha a tʋŋ tʋʋma a ye tuse ale a gʋtɩ. 18 Ama yɔmʋ dieke die dɩ tuone tusibalɩŋka die dɩ ga a tuu vɔrɩŋ a nagɩ ʋ Yɔmʋtieŋ ligirehe a lɔbɩrɩ mi.

19 “Die dɩ wana a yʋasɩ pam, tigiri tieŋ wo die dɩ yiŋŋi a keŋ, ta wa ʋ yɔŋɩsɩ dɩ ba keŋ aŋ ʋ biisi, ta ʋ ye ba yene nyʋarɩ a mʋ die. 20 Ta vuodieke die dɩ tuone tuse anʋ wa die dɩ a keŋ a juu saŋka mi, a nagɩ tuse anʋ dieke ʋ bɩna a ye wo, ta baarɩ, ‘N Yɔmʋtieŋ, die yɩ mɩŋ wa salɩma ligiribie tuse anʋ, ama n bɩ ye wo nyʋarɩ tuse anʋ a gʋtɩ.’ 21 Die ʋ Yɔmʋtieŋ dɩ balɩ wa, ‘Kpaŋŋɩ fʋ gbaŋ, fʋnɩŋ yiwo yɔmʋvɩɩnɩŋ, ta bɩ tʋma vɩɩnɩŋ; mɩŋŋɩ pɔgɩlɩ wa nyinti bɩta wa gie, die wɩa n nan nagɩ pam a yi fʋ nuusi me. Sʋgɩfɩalɩ dieke n yalla, yiwo manɩŋ aŋaŋ fʋ sɩɩtɩ.’ 22 Ta die vuodieke dɩaŋ die dɩ tuone tuse ale wo die dɩ keŋ a juu a baarɩ, ‘N Yɔmʋtieŋ, ye, die fʋ yɩ mɩŋ wa salɩma ligire bie tuse ale, ama n dii wo nyʋʋŋ a ye nyʋarɩ tuse ale a gʋtɩ.’ 23 Ʋ Yɔmʋtieŋ wo dɩ balɩ wa, ‘Kpaŋŋɩ fʋ gbaŋ, fʋ yiwo yɔmʋvɩɩnɩŋ ta bɩ tʋma vɩɩnɩŋ, mɩŋŋɩ pɔgɩlɩ wa nyinti bɩta wa gie, die wɩa n nan nagɩ pam a yi fʋ nuusi me. Sʋgɩfɩalɩ dieke n yalla, yiwo manɩŋ aŋaŋ fʋ sɩɩtɩ.’ 24 Die yɔmʋ dieke dɩaŋ dɩ tuone tusibalɩŋka die dɩ keŋ a juu a baarɩ, ‘N Yɔmʋtieŋ, n sɩba dɩ fʋnɩŋ yiwo nyɩnyɩrɩtʋ, a gobe jigidieke fʋ kana a ka bʋrɩya, ta bɩ lagɩsa nyindiike jigidieke die fʋ kana a ka jatɩ nyɩŋbʋra. 25 Die wɩa ŋmaamɩŋ die yalla mɩŋ die maŋ nyɩŋ a nagɩ fʋ ligirebu a lɔbɩrɩ tɩŋgbaŋ. Die wɩa, ka wʋnna, tuo fʋ jaaŋ.’ 26 Die wɩa ʋ Yɔmʋtieŋ wo die dɩ yiŋŋi a balɩ wa dɩ, ‘Fʋnɩŋ yɔmʋtɔgʋ aŋaŋ walɩnkpɩatieŋ; sɩba baarɩ n yiwo vuodieke dɩ gobinene jigidieke n kana ka bʋrɩya ta lagɩsa nyindiike jigidieke n kana ka jatɩ nyɩŋbʋra, 27 die nɩŋ bɩa yine ta fʋ ka nagɩ n ligirebu a paŋŋɩ aŋ ba yiŋŋi tuŋ mɩŋ aŋaŋ nyʋarɩ? N tɩnna a keŋ naa wa n tɩŋ nan tuo n jaabʋ ta nyʋarɩ diisi ka ma. 28 Die wɩa nɩ tuo ligirebu a nyɩŋ ʋ jigiŋ a nagɩ ka yɩ vuodieke dɩ yalla tuse baŋ wa. 29 Dama vuodieke mana dɩ yalla nyinti, ba nan ye nyinti pam a gʋtɩ amʋ ba faasɩ yallɩma pam. Ta vuodieke dɩaŋ dɩ wone jaaŋ ba nan tuo bɩta gbaŋ ʋ yalla wa a nyɩŋ ʋ jigiŋ. 30 Ama yɔmʋtɔgʋ wa nɩŋ, nɩ nagɩ wa a vigi taaŋ yeŋ me lɩmɩŋ ma, jigidieke ʋ baaŋ nan kʋŋ ta ŋɔba nyɩna.’

31 “Manɩŋ vuota Bʋa dɩ keŋ keŋ aŋaŋ n hagɩrɩŋ aŋaŋ n malakasisi n nan dɩ kalɩ n naara gbanɩŋ ma aŋaŋ jɩlɩma pam. 32 Saŋka mi dʋnɩa vuosi mana mana nan lagɩsɩ n nɩŋŋa, mi n nan puo be bule, sɩba yiyagɩrʋ dɩ ŋaana a puo yiise a nyɩŋ bie sʋŋ die wo. 33 N nan nagɩ yiisehe a zieŋ n nuudiigiŋ chaaŋ, ta nagɩ biehe a zieŋ n nuugalɩ chaaŋ. 34 Saŋka mi manɩŋ naaŋ wa nan balɩ yɩ vuodiekemba dɩ benne n nuudiigiri chaakʋ dɩ, ‘Nɩnɩŋ vuodiekemba n Chʋa Ŋmɩŋ dɩ yine alibarika yɩ, nɩ keŋ a juu naarɩ dieke ta Ŋmɩŋ die dɩ naanna a gbarɩ nɩ a nyɩŋ dʋnɩa piiliŋ me, 35 dama kɔŋ die yalla mɩŋ die nɩ yɩ mɩŋ nyindiike; ta nyanyuule die dɩ yalla mɩŋ, die nɩ yɩ mɩŋ nyaaŋ maŋ nyu. Die n yiwo chaanʋ ta nɩ mɩŋŋɩ a tuo mɩŋ nɩ tige me a yi mɩŋ chaantɩ. 36 Die n chʋŋ wa yɔrɩ die nɩ yɩ mɩŋ garɩtɩ, ta die maŋ yʋagɩ ta nɩ suŋŋi mɩŋ, die maŋ juu dansarɩka sʋŋ ta nɩ keŋ kaagɩ mɩŋ.’ 37 Womi ŋmɩŋchɩgɩrɩba gie nan yiŋŋi a pɩasɩ mɩŋ dɩ, ‘Tɩ Yɔmʋtieŋ, saŋŋa bɩa die tɩ ye fʋ ta kɔŋ yallɩ fʋ ta tɩ yɩ fʋ nyindiike? Yaa saŋŋa bɩa die tɩ ye fʋ ta nyanyuule dɩ yallɩ fʋ ta tɩ yɩ fʋ nyaaŋ fʋ nyu? 38 Saŋŋa bɩa die tɩ ye fʋ ta fʋ yi chaanʋ die tɩ tuo fʋ tɩ tige me a yi fʋ chaantɩ? Yaa saŋŋa bɩa die tɩ ye fʋ ta chʋŋ yɔrɩ ta tɩ yɩ fʋ garɩtɩ? 39 Saŋŋa bɩa die tɩ ye fʋ ta yʋagɩ ta tɩ suŋŋi fʋ? Yaa fʋ benne dansarɩka sʋŋ tɩ keŋ kaagɩ fʋ?’ 40 Ta manɩŋ Naaŋ wa nan yiŋŋi balɩ ba dɩ, ‘Wusie maŋ bala nɩ, wudieke die nɩ yine a yɩ vuodieke dɩ yine zɔɔlɩntieŋ nɩ nɩmballɩ sʋnsʋŋ wʋnyɩ wa die nɩ yi a yɩ wa manɩŋ.’

41 “Ka kʋaŋ chaaŋ n nan yiŋŋi a balɩ a yɩ vuodiekemba dɩ benne n nuugalɩ ka chaakʋ, ‘Nɩnɩŋ vuobɩatɩ gie, nɩ vɩɩna aŋaŋ tɩbɩdatɩŋ, nɩ chʋnna ga ta va mɩŋ. Nɩ gamma a ga juu boli dieke dɩ kana a ka kpise ta Ŋmɩŋ dɩ wʋnsɩna a gbarɩ Sitaani aŋaŋ ʋ vuosi wo. 42 Dama kɔŋ die yallɩ mɩŋ ta die nɩ mʋŋ mɩŋ nyindiike, ta nyanyuule die dɩ yallɩ mɩŋ ama die nɩ mʋŋ mɩŋ nyaaŋ. 43 Die n yine chaanʋ, ta nɩ ka saagɩ a tuo mɩŋ nɩ tige me, ta die maŋ chʋŋ yɔrɩ ta nɩ mʋŋ mɩŋ garɩtɩ, ta die yʋagɩ ta nɩ ka suŋŋi mɩŋ, die maŋ juu dansarɩka ta nɩ ka keŋ kaagɩ mɩŋ.’ 44 Saŋka mi ba nan yiŋŋi a pɩasɩ mɩŋ dɩ, ‘Tɩ Yɔmʋtieŋ, saŋŋa bɩa die tɩ ye fʋ ta kɔŋ die dɩ yallɩ fʋ, yaa nyanyuule die dɩ yallɩ fʋ, yaa fʋ yi chaanʋ, yaa fʋ chʋŋ yɔrɩ, yaa fʋ yʋagɩ, yaa fʋ bie dansarɩka sʋŋ ta tɩ ka suŋŋi fʋ?’ 45 Saŋka mi n nan yiŋŋi a balɩ ba dɩ, ‘Wusie n bala nɩ, die nɩ zetine nɩ suŋŋi zɔɔlɩntieŋ nɩ nɩmballɩ sʋnsʋŋ wʋnyɩ wa, die manɩŋ nɩ zeti suŋŋiŋ dene.’ 46 Vuosi gie nan ga juu tɩbɩdatɩ dieke dɩ wone kpatɩŋ ma, ama ŋmɩŋchɩgɩrɩba nan ga juu miivoli dieke dɩ wone kpatɩŋ sʋŋ.”