18
Babiloni tɩŋ chʋʋsɩŋ wɩa
1 Die n yene hɔgʋ wa dɩ kala haagɩŋ dɔmbɩakʋ ma wa kʋaŋ chaaŋ, die maŋ bɩ ye malaka wʋnyɩ dɩ nyɩnna arɩzanna a keŋ sʋʋna. Ta die yaa yiko pam, ta ʋ chaanɩŋ dɩ faasɩ chaaŋ tɩŋgbaŋka lʋga lʋga mana. 2 Ta die natɩ aŋaŋ lɔlɩkpɩɩŋ dɩ,
“Babiloni tɩgɩkpɩɩka nan chʋʋsɩ mɩŋ.
Vuoŋ bɩ wo ka ma,
ta lele jɩmbɩatɩ aŋaŋ haalɩbɩatɩ wana bie ka ma
aŋaŋ nembibɩatɩ yiri yiri mana wana bie ka ma.
3 Dama tɩŋgbaŋka gie vuosi mana nyu wo
ʋ lɔlɩbɩatɩ tʋʋmaha dɩ sɩna sɩba daahagɩrɩbʋ a bugi.
Ta tɩŋgbaŋka gie naalɩba mana dɩ yi dɩgɩntɩ tʋʋma aŋaŋ wa
ta nyugidiilibe mana dɩ yese ba ligire
a nyɩnna ʋ lɔlɩbɩatɩ ma.”
4 Womi maŋ wʋŋ Ŋmɩŋ dɩ balala a nyɩnna arɩzanna ma dɩ,
“N vuosi, nɩ keŋ nyɩŋ Babiloni tɩka ma
amʋ nɩ kaaŋ gʋtɩ juu ʋ wʋbɩatɩ ma,
ta gʋtɩ ye ʋ tɩbɩdatɩkʋ.
5 Dama ʋ wʋbɩatɩ faasɩ dala mɩŋ a dʋa a ga tʋgɩ ŋmɩŋsikpeŋ,
ta n ka daaŋ ʋ wʋbɩatɩtɩ.
6 Nɩ yiŋŋi yi wo wudiekemba gbaŋ gbaŋ die ʋ yine vuosi bataŋ wa,
ta yiŋŋi yi wo wudiekemba die ʋ yine wo jigiŋ bule.
Ta vaa ʋ nyaaŋchibike suuli aŋaŋ daaŋ dieke dɩ hagɩrɩna a tɩaŋ ʋ daabʋ
ʋ nagɩna a yɩ vuosi dɩ nyu wo jigiŋ bule.
7 Ta vaa ʋ dii wahala aŋaŋ zɔɔlɩŋ pam,
sɩba die ʋ benne ʋ dʋŋŋʋ ta kɔta ʋ gbaŋ dene wo
Dama ʋ ŋaaŋ bala a yɩa ʋ gbaŋ dɩ:
‘Manɩŋ hɔgʋnaaŋ kala naa!
N ka yiwo kpihɔgʋ
die wɩa n kaaŋ daansɩ ye sʋgɩchʋʋsɩŋ!’
8 Naa wɩa wahala nan keŋ keŋ ʋ ma bʋnyɩ
ta yʋagɩtɩ aŋaŋ sʋgɩchʋʋsɩŋ aŋaŋ kɔŋ nan haarɩ wa,
ta boliŋ dɩaŋ nan dii wo,
dama tɩ Yɔmʋtieŋ Nabidie Ŋmɩŋ vuodieke dɩ bala ʋ dii wo ʋ
sarɩyaka yiwo hagɩrɩtieŋ.”
9 Tɩŋgbaŋka gie naaŋ diekemba dɩ dʋagɩna aŋaŋ wa ta die ʋ nansɩbʋ aŋaŋ wa wa dɩ keŋ ye ʋ bolibu diile nyusi dɩ nyɩna wa, ba nan faasɩ kʋma ʋ wɩa. 10 Ba nan dɩ zie saasaa, dama ba chɩga ŋmaamɩŋ dɩ ba nan gʋtɩ dii ʋ wahala ka. Ba nan dɩ bala dɩ,
“Wʋbɩaŋ, wʋbɩaŋ, Babiloni tɩgɩkpɩɩŋ,
Ŋmɩŋ chʋʋsɩ fʋ bʋnyɩ.”
11 Tɩŋgbaŋka gie nyugidiilibe gbaŋ nan dɩ kʋma ta die zɔɔlɩŋ ʋ wɩa, dama vuoŋ wori a baaŋ daa ba nyintiti bɩbra, 12 vuoŋ kaaŋ bɩ a daa ba nyindiekemba ba nagɩna salɩma aŋaŋ ligiriyɩala a wʋnsɩ wa aŋaŋ ba leetiti aŋaŋ ba garɩyɩala ha aŋaŋ garɩ diekemba dɩ faasɩna yaa ligirehe aŋaŋ ba garɩ diekemba dɩ faasɩna nyɩgɩsa aŋaŋ garɩŋmɩnaha aŋaŋ ba tɩɩ diekemba daatɩ dɩ faasɩna vɩɩna aŋaŋ ba nyindiekemba ba nagɩna yɔbɩŋ nyɩna a wʋnsɩ aŋaŋ ba nyindiekemba ba nagɩna tɩɩŋ daa diekemba dɩ faasɩna yaa ligire a wʋnsa aŋaŋ kʋʋŋmɩna aŋaŋ ba kʋʋtɩ aŋaŋ ba taŋ vɩɩnaha, 13 aŋaŋ ba kakaduro sinamoni tɩɩsɩsɩ aŋaŋ ba tulaarisisi aŋaŋ ba tulaari diekemba dɩ yine miri aŋaŋ firankensisi wo, aŋaŋ daaŋ aŋaŋ kpaaŋ aŋaŋ zɔŋ aŋaŋ zaaha aŋaŋ ba niigehe aŋaŋ yiisehe aŋaŋ ba duune aŋaŋ duuŋ diekemba dɩ datɩnana torikusi aŋaŋ yɔŋɩsɩ aŋaŋ vuota mɩsɩ gbaŋ. 14 Nyugidiilibe nan balɩ dɩ, “Nyɩnvɩɩna diekemba mana fʋ yaalɩnana wa baya mɩŋ, ta fʋ nyinti aŋaŋ fʋ vɩɩnɩŋ mana dɩ ga ta va fʋ, ta kaaŋ bɩ yehe bɩbra.” 15 Ta banɩŋ nyugidiilibe mi dɩ yene ligire a nyɩŋ kanɩŋ tɩka ma wa nan dɩ zie saasaa, dama ba chɩga ŋmaamɩŋ dɩ ba nan gʋtɩ dii ʋ wahalaka. Ba nan dɩ kʋma ta die zɔɔlɩŋ, 16 ta bala dɩ,
“Wʋbɩaŋ, wʋbɩaŋ haarɩ tɩgɩkpɩɩka.
Die ʋ ŋaaŋ yeegi wo nyiŋyeekiyɩala aŋaŋ nyiŋyeeki diekemba dɩ faasɩna yaa ligire aŋaŋ nyiŋyeekiŋmɩna ta yeegi salɩma nyinti
aŋaŋ nyindiekemba ba nagɩna tanvɩɩna a wʋnsɩ
aŋaŋ leeti.
17 Ta bʋnyɩ nyinti gie mana dɩ bɩa.”
Die haarɩkpeŋkpɩɩkʋ nyɩŋkʋraha aŋaŋ vuodiekemba mana dɩ bene ka sʋkʋ aŋaŋ haarɩdɔŋtɩba aŋaŋ vuodiekemba dɩ dinene nyʋŋ mʋgɩkpɩɩkʋ ma wa die dɩ zie saasaa, 18 ta faasɩ nata ʋ wɩa die ba yene bolibu dɩ dinene tɩka ta nyusi dɩ haga wa. Ta balɩ dɩ, “Tɩgɩkpɩɩŋ ye wori a yaa hagɩrɩŋ sɩba tɩka gie.” 19 Ta die yɔɔra tantɩ a yie ba sikpigile me aŋ ka dagɩ dɩ ba sʋŋ chʋʋsɩya mɩŋ ta kʋma ta die zɔɔlɩŋ ta bala dɩ,
“Wʋbɩaŋ, wʋbɩaŋ
haarɩ tɩgɩkpɩɩka, ʋ yine tɩgɩkpɩɩŋ dieke vuodiekemba dɩ yalla haarɩkpɩɩma ta dɔma mʋgɩkpɩɩrɩ ma a daa ta yalla wa dɩ ye ligire.
Ta bʋnyɩ nyinti gie mana dɩ bɩa.”
20 Nɩnɩŋ vuodiekemba dɩ bene arɩzanna ma, nɩ yallɩma sʋgɩfɩalɩŋ, dama Ŋmɩŋ chʋʋsɩ wa Babiloni tɩka. Ta nɩnɩŋ Ŋmɩŋ vuosi aŋaŋ Ŋmɩŋ naazʋalɩŋ aŋaŋ Masia tʋntʋntɩba, nɩ yallɩma sʋgɩfɩalɩŋ, dama Ŋmɩŋ chʋʋsɩ wa Babiloni tɩka yaa gamma wudiekemba ʋ yine nɩ wo wɩa.
21 Womi die malaka hagɩrɩtieŋ die dɩ kɔtɩ taŋkpeŋkpɩɩŋ ka mʋ sɩba nɩɩkpeŋkpɩɩŋ a nagɩ a taaŋ mʋgɩkpeŋkpɩɩkʋ ma ta baarɩ dɩ,
“Naa Ŋmɩŋ dɩ nan nagɩ Babiloni tɩgɩkpɩɩka
a taaŋ aŋ ka chʋʋsɩ,
ta vuoŋ kaaŋ bɩ ye ke bɩbra.
22 Ta vuoŋ kaaŋ bɩ wʋŋ ta goojinɩgɩrɩŋ aŋaŋ yɩlɩchɩarɩŋ chɩa yɩla fʋ tɩka sʋŋ bɩbra,
ta vuoŋ kaaŋ bɩ wʋŋ wɩwɩɩrɩŋ aŋaŋ kantaŋ wɩɩrɩŋ ta ba chɩa yɩla fʋ tɩka sʋŋ bɩbra.
Ta fʋ tʋntʋntɩba mana nan bɩa,
ta vuoŋ kaaŋ bɩ wʋŋ nɩaha dɔmɩŋ bɩbra.
23 Ta popoli kaaŋ bɩ chaaŋ fʋ ma,
ta hɔgʋ faarɩŋ aŋaŋ dembiŋ yallɩŋ kaaŋ bɩ bie mi bɩbra.
Fʋ nyugidiilibe die faasɩna yaa ligire aŋaŋ hagɩrɩŋ tɩŋgbaŋka gie mana ma,
ta fʋ tɩka vuosi die dɩ yallɩ tɩɩŋ a gaama tɩŋgbaŋka gie vuosi mana.
24 Ŋmɩŋ datɩ wa Babiloni tɩŋ tɩbɩŋ
dama ka kʋʋ wa Ŋmɩŋ naazʋalɩŋ
aŋaŋ ʋ vuosi aŋaŋ vuodiekemba mana vuosi dɩ kʋnana
tɩŋgbaŋka gie mana mana wɩa.”