KORINTI I
Korinti i Helene ŋic jaŋere hae sâko moc, hâwecmecko ŋewec. Woke bocjahazi ira raʒi wefuc ehuc jumbiŋ. Hae rune jaŋe moneŋ mafa ɋâfoŋne jâmbâŋ fojarewec. Juju‐jeŋic ine mi sâckewec. Jaŋe wiac nâ areŋ â boe sau mâretec ejumbieŋ. Paulo e miti kiŋaŋ hata rame jajahec ewec, dameŋ ira raku Korinti haeo fisiwec. Fisirâ ira mosa 18 miti gie bahuc jume ŋic ŋokac bocjahazi miti manarâ Jesure kikefuŋfâc embiŋ. Eme gie iŋuc baku Paulo e Jerusalem haeo risiehame mitiŋic moc, ʒâŋene Apolo, eki Korinti haeo rarâ Paulore gie soŋaŋkewec. Ŋic e Johane Miti Opâ fufuŋke ere motec juwec. Eme Korinti haeo miti gie bahame ŋic gâcne jaŋe ere boc aŋac‐jopame mumbiŋ: Nâŋe Apolo ere ŋicfâc. Ehame gâcne jaŋe mumbiŋ: Mâcne, miti i Paulozi fuŋkerâ bawarewec, irec nâŋe ere ŋicfâc. Eme fâuckerâ juhapie Jerusalem haeonec Judaŋic opâ ruac jaŋeraonec gâcnezi fisirâ ʒiŋuc jazambiŋ: Ŋoŋe Paulo me Apolo wemocte boc mana‐jactepie feekac, mitire jâcne mocjaha jukac, Petoro. Mupie gâcne jaŋe dâŋ irec manapie fârine eme mumbiŋ: Nâŋe Petorore ŋicfâc. Ehame wâc guru moc fuarâ mumbiŋ: Nâŋe ine Kristore ŋicfâc, irec nâŋe mitiŋic fârine. Fâfâuc sâko iŋuc fuawec. Erâ bahac i sawa mâcne, Korinti haeonec opâ ruac guru jaŋe fific guguriŋ tâmiric wamao juhuc âgofâc‐jeŋic qâpuc jaŋehec iiqic gâbâ â wiac nareŋ gareŋ ekupie bâbâsifuc fuŋne fuŋne ŋondeŋ‐jeŋicko fuawec. Ŋic moczi mamac‐ticnere ŋokac bawec. Iŋuc eme opâ ruac âgofâcne jaŋe erao bâbâtiŋ gie mi bapa, mâc qâoma erâ jumbiŋ. Erâ moc esâqorembiŋ ine ʒiŋuc: Ŋondeŋ‐jeŋicko dâŋ bahac wiac fuame mitio mi mufâsâehuc qâpuc jaŋere kia me soŋaŋfâc jaŋerao barapie mutara‐jarembiŋ. Wiac iŋuc ehuc juhapie Paulo e Antiokia â Jerusalem haeo piticne jumanaku miti kiŋaŋ hata moc fuŋkeme jahec â moc ewec. Ehuc Asia mâreŋ masunao kikefuŋ guru jumbiŋ jaŋe honec‐jopa raku Efeso haeo fisirâ ira dameŋ ʒora juwec. Ira juha ŋokac moc ʒâŋene Koloe ere wiacfâc jaŋe fisirâ dâŋ binaŋ ecnembiŋ (1:11). Erâ jaŋe sawa mâcne, Korintinec ŋicsoŋaŋ jahec â moc jaŋe Paulorao papia bafisihuc dâŋ binaŋ wâc ecnembiŋ (16:17). Ine Korinti ŋic jaŋe wiac gâcnere, iŋuc me iŋuc epene sâckeocmu, muhuc maŋguru embiŋ. Ehuc Paulo papia qâreŋkecnehuc wiocembiŋ. Ŋowe ŋonâŋ juju irec wiocnembiŋ, erâ wâc qâpuc tiwâ ʒepec‐jeŋicte mâmâc indiŋkembiŋ. Eme Paulo e Efeso haeo ŋehuc dâŋ sasawa i manarâ papia ʒi hâcne Korinti ŋic qâreŋke‐jarewec. Qanaŋ juwicnao moc qâreŋkerâ râe‐jareme rame wose manac embiŋ (5:9). Eme papia izi ʒâhec sifuckewecte papia kecʒirec, Korinti jaŋere papia I iŋuc mueŋgopeneŋ.
Papia maŋnao dâŋ birine birine forakac ine kecʒiŋuc:
Gaŋ 1—4. Kikefuŋzi fâuckeme gurune gurune jumbiŋ.
Gaŋ 5—6. Juju â eebapa‐jeŋic mi sâckewec.
Gaŋ 7—10. Jesure kikefuŋzi mâreŋko weniŋuc juha sâckeocmu irec dâŋ.
Gaŋ 11—14. Anutu mai eecnere dâŋ.
Gaŋ 15. Hâmockonec fafahare irec dâŋ.
Gaŋ 16. Dâŋ tatarane.
1
Jambuŋdâŋ
Anuture micte Jesu Kristore aposolo epo Paulo no hâcne â âgo‐nâŋec Sostene nâhe Korinti haeonec Anuture kikefuŋ ŋoŋere papia ʒi râekoperec. Ŋoŋe Jesu Kristozi jambuŋ‐ŋoparâ tirimoc juniŋte hefârec‐ŋopawec. Iŋuc eŋareme ine hae sâc opâ ruac ʒira â gâcnao Wofuŋ Jesu Kristo ʒâŋe‐ticne riwaseckehuc jueŋgopieŋ jaŋehec mocjaha embiŋ. Kor I 6:11; Apo 9:14 Mamac‐nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec. Rom 1:7
Korinti ŋic jaŋerao miti fârine fua‐hâmowec
Anutu e Jesu Kristore erâ aki anonoc sesic‐ŋopawecte no ŋoŋere manasuhuc daŋge berec jaha âzâcneekopac. E miti mumure aafec â mamana fuŋne fuŋne aameo tahac‐ŋopawec. I Kristore mumutaniŋ dâŋzi ŋondeŋ‐ŋeŋicko gâtâ bawecte iŋuc fuawec. Eme mitire wiac moc mi basaeŋgopieŋ. Mâc Wofuŋ‐nâŋec Jesu Kristo fua taniŋkeocte woŋec mocjaha jueŋgopeneŋ. Luk 17:30; Tes II 1:7; Tit 2:13 Eki hâcne Wofuŋ‐nâŋec Jesu Kristore fifisi dameŋko kiŋfâsâc domaniŋte hefârec‐ŋopame juhapie dameŋ‐ŋeŋic taraocmu. Fil 1:6; Tes I 3:13; 5:23 Anutu e Ŋokâ‐ticne Jesu Kristo, Wofuŋ‐nâŋec hâcne, erao ʒuhuckeniŋte hefârec‐ŋopaweczi mocmu mocmu‐ticne mi fokac. Tes I 5:24; Joh I 1:3
Korinti ŋic jaŋerao mitire fâfâuc fuawec
10 Âgofâc‐nane, no Wofuŋ‐nâŋec Jesu Kristo ʒâŋe‐ticnere erâ uŋdâŋ ʒi mupe mananiŋ: Ŋoŋe dâŋ fuŋne fuŋne â fâfâuc mi bâfuanʒepieŋ, aricne. Maŋ mamanasu‐ŋeŋic bâturepie mocjaha eha junʒepieŋ. Fil 2:2; 3:16 11 Âgo bureŋ, no ŋondeŋ‐ŋeŋicko dâŋ fuawec fokac i Koloe ere wiacfâc mupie manapo. 12 Dâŋ kecʒiŋucte mukopac: Ŋoŋeraonec moczi muekac “no Paulore ŋic”, â moczi muekac “no Apolore ŋic”, â moczi muekac “no Kefare ŋic”, â moczi muekac “no Kristore ŋic.” Apo 18:24, 27; Kor I 3:4; Joh 1:42 13 Hâc, i weniŋuc, Kristozi fâuckewec me? Me Paulo noni ŋoŋere erâ maripoŋko hâmopo? Me Paulo nore ʒâŋezi hucŋopaha Miti Opâ ruambiŋ? 14 Sowine no nahac Miti Opâ mi rua‐ŋarepo, Krisipo â Gaio jahe sawa rua‐jactepo. Apo 18:8; Rom 16:23 15 Ŋoŋe ʒiŋuc munʒipiŋte: “Ere ʒâŋezi hucnâpoha Miti Opâ ruambeŋ.” 16 Mâcne, ʒi moc manasukopac, Stefana ere wiacfâc jaŋe wâc rua‐jarepo, gâcne jaŋere ine mi manakopac. 17 Kristozi ŋic Miti Opâ rua‐jarepemurâ mâcne, Biŋebiaŋ jaza qazuc epemurâ munarewec. Erâ Kristo maripoŋ‐ticnere dâŋ tâpirimâc ezacte maŋɋârâŋ dâŋ ericke bâpiaŋ ehuc mi muekopac. Joh 4:2; Mat 28:19
Miti tâmiriczi Jesu dâŋticnere manapie racne eekac
18 Maripoŋte dâŋ i sisipiric hata âteeŋgopieŋzi manapie racne eekac, â bâbâpiaŋ hatao jueŋgopeneŋzi ine manapene Anuturaonec tâpirihec eekac. Kor II 4:3; Rom 1:16 19 Dâŋqâreŋ moc ʒiŋuc hâcne fokac:
“No maŋɋârâŋhec jaŋere dâŋ qape wahaocmu
â mamana‐jeŋichec jaŋere mamana batackepemu.” Jes 29:14
20 Eme maŋɋârâŋhec jaŋe weni? Â mana gufu koparic ŋic jaŋe weni? Â dameŋ ʒirec fuŋne mamana jaŋe weni? Anutu e maŋ mamana‐jeŋic bahameŋkewec hâcne. Hio 12:17; Jes 19:12; 33:18 21 Eme Anuture maŋɋârâŋ dâŋbiri fua‐bipieha ŋic jaŋe jaŋacne mamanazi Anuture fuŋne ʒâŋitaniŋte emâmâŋkembiŋ, irec Anutuzi maname sâckeme mitidâŋ mutucne i manarâ biaŋkenaŋte muwec. Mat 11:25; Luk 8:12 22 Judaŋic jaŋe fuŋne qaqa mâsire qizec qaeŋgopieŋ â Grikŋic jaŋe maŋɋârâŋhec eniŋte fotarieeŋgopieŋ, Mat 12:38; Joh 4:48; Apo 17:18, 32 23 nâŋe ine Kristo maripoŋko qakicne irec dâŋ mupene Judaŋic jaŋe manapie quŋke sâqoreekac â qâpuc jaŋe manapie dâŋ mutucne eekac, Kor I 2:14; Rom 9:32 24 ehame hefârec‐jopakicne, Judaŋic mecne Grikŋic mecne, jaŋe ine Kristore manapie Anutu tâpiri‐ticnere â maŋɋârâŋ‐ticnere hozine eekac. Kol 2:3 25 Ŋic jaŋe Anuture mutucne muhapie mutuc‐ticnezi ŋic jaŋere mamana jâuruekac â Anuture dodocne muhapie dodocne‐ticnezi ŋic jaŋere tâpiri sirickeekac. Kor II 13:4
Fekicne afecne, omane bocjaha hefârec‐jopakicne
26 Âgofâc‐nane, ŋic weniŋucne hefârec‐ŋopakicne i mana honeniŋ: Sahackopec wiacte maŋɋârâŋhec bocjaha mâcne, tâpirihec bocjaha mâcne, ŋicbomboŋ guruonec bocjaha mâcne. Mat 11:25; Joh 7:48; Jak 2:1–5 27 Ŋic maio mutucne jueŋgopieŋ jaŋe Anutuzi hefârec‐jopahuc maŋɋârâŋhec mimi qaqa ejareekac, â ŋic maio gegec dodocne jueŋgopieŋ jaŋe Anutuzi hefârec‐jopahuc tâpirihec mimi qaqa ejareekac, 28 â ŋic maio omane â hujukicne jueŋgopieŋ jaŋe Anutuzi hefârec‐jopaekac, â ŋic maio bebekâne jueŋgopieŋ jaŋe Anutuzi hefârec‐jopahuc ʒai ʒonʒoŋ‐jeŋichec jaŋe siŋ qatara‐jareekac. 29 Mâreŋŋic moczi Anuture maio sahac‐ticne bafezacte iŋuc hâcne ewec. Rom 3:27; Efe 2:9 30 E mitio juju‐ŋeŋicte bâbâfua i Kristo Jesu râe‐nârewec. Kristo e hâcne Anutuzi maŋɋârâŋ dâŋte rowaŋ‐nâŋec â kiŋroro‐nâŋec â maŋɋaɋac bâbâfua‐nâŋec â kikitâc‐nâŋec râe‐nârewec. Jer 23:5, 6; Kor II 5:21; Joh 17:19 31 Irec dâŋqâreŋ ʒiŋuc fokac i sanaŋkezejec: “Moc e mumuteŋ dâŋ muzo murâ Wofuŋtao muzejec.” Jer 9:23, 24

1:2: Kor I 6:11; Apo 9:14

1:3: Rom 1:7

1:7: Luk 17:30; Tes II 1:7; Tit 2:13

1:8: Fil 1:6; Tes I 3:13; 5:23

1:9: Tes I 5:24; Joh I 1:3

1:10: Fil 2:2; 3:16

1:12: Apo 18:24, 27; Kor I 3:4; Joh 1:42

1:14: Apo 18:8; Rom 16:23

1:17: Joh 4:2; Mat 28:19

1:18: Kor II 4:3; Rom 1:16

1:19: Jes 29:14

1:20: Hio 12:17; Jes 19:12; 33:18

1:21: Mat 11:25; Luk 8:12

1:22: Mat 12:38; Joh 4:48; Apo 17:18, 32

1:23: Kor I 2:14; Rom 9:32

1:24: Kol 2:3

1:25: Kor II 13:4

1:26: Mat 11:25; Joh 7:48; Jak 2:1–5

1:29: Rom 3:27; Efe 2:9

1:30: Jer 23:5, 6; Kor II 5:21; Joh 17:19

1:31: Jer 9:23, 24