1 Âgofâc-nane, Biŋebiaŋ ŋazape manambiŋ, erâ wâc bajueŋgopieŋ, irecteaŋ manasu-ŋarepe. 2 Qazu-ŋarepo irec sâckoa bajuŋgopieŋko sâcne bâpiaŋ-ŋopaocmu. Me bajuhapie biac sifucke-ŋare wiac moc ewec? 3 Miti qizecne no narekicne ijaha ŋoŋe ŋarehuc kecšiŋuc muhuc fuŋke-ŋarepo: Kristo e miti papiao mucnekicne irec sâcko erâ sâqocne-nâŋecte okacne hâmowec. 4 Erâ miti papiao mucnekicne irec sâckoa šâŋeruŋko hurâ šoaŋ jahec â moc eha ɋârerâ faharewec. 5 Faharerâ qanaŋ Kefa fuacnewec, izi motecfâcne 12 fua-jarewec. 6 Izi mitiŋic šare-jeŋic 500 jâuruwec jaŋe tumaŋnehapie fua-jareme hone-fârembiŋ. Jaŋeraonec bocjahazi ɋâricne juŋgopieŋ, â gâcnezi hâmombiŋ. 7 Izi Jakobo fuacnewec, izi aposolo mâmâc sasawa fua-jarewec. 8 Ʒâhecko ine ombâŋtâc no wâc fua-narewec. 9 No aposolo waha qaqane jâmbâŋ, no Anuture kikefuŋ guru jopa sipiric ejarepore aposolo šâŋe munarepie mi sâckeekac. 10 No aposolo epo i Anutu aki anonoc-ticnere erâ epo. Erâ aki anonoc-ticnezi norao racne mi ewec. No gie bapo i gâcne jaŋere sâc jâurukac, erâ no nahac wemo-nanezi bazapo, Anuture aki anonoc norao fowec izi bawec. 11 Eme no mecne jaŋe mecne miti iŋuc hâcne muromackeeŋgopeneŋ, eme ŋoŋe i hâcne manambiŋ bajuŋgopieŋ.

12 Kristo e hâmockonec ɋârerâ faharewec, miti iŋuc muhuc ŋazapene wemocte ŋoŋeraonec gâcnezi hâmockonec fafahare mi fokac mueŋgopieŋ? 13 Hâmockonec fafahare-nâŋec i mickehuc Kristo fafahare-ticne mâmâc mickezo. 14 Kristo mi faharezacko ine miti mumu-nâŋec fârimâc ezac â mamanasiŋ-ŋeŋic iŋuc jaha fârimâc ezac. 15 Erâ i sawa mâcne. Nâŋe Anuture mumbeŋ, e Kristo hâmockonec bafaharewec. Eme hâmockonec fafahare mi fozacko Anutuzi wemocko Kristo bafaharezac. Irec dâŋ mumbeŋ i Anutu micko itic ecnehuc burecŋicfâc-ticne eŋgopeneŋ ezac. 16 Ŋic hâmockonec mi fahareniŋmu, iŋuc murâ Kristore iŋuc jaha hâmockonec mi faharewec muzo. 17 Kristo e hâmockonec mi faharezacko ine mamanasiŋ-ŋeŋic racne ezac â kiŋŋeŋic foŋarezac, 18 â Kristo manasiŋkehuc hâmombiŋzi sipirickembiŋ ezac. 19 Nâŋâc mâreŋko šira sawa Kristore mamanac maŋgâŋ junšapeŋko, ine mamakucne fuŋmoc ehuc gâcne siric-jopa-fârenšapeŋ.

20 Erâ iŋuc mâcne, Kristo e jâmbomac hâmockonec ɋârerâ ŋic hâmokicne jaŋere micne barâ faharewec jukac. 21 Ʒiŋucte hâcne: Ŋiczi hâmoc fuŋke-nârewec iŋuc jaha ŋiczi hâmockonec fafahare fuŋke-nârewec. 22 Adamhec šušuhuc-nâŋec fokacte hâmo-fâreeŋgopeneŋ, iŋuc jaha Kristohec šušuhuc-nâŋec fokacte fahare-fârenšoŋgopeneŋ. 23 Erâ birine mukicne sâc faharezo: Micne bapazi Kristo, izi fifisi-ticnao Kristore bufuŋfâc, 24 izi dameŋ taraocmu” Kristo e fekicne â tâpirihec â šoɋac sasanaŋhec bawahac-jopame munaŋke-fârehapie Wofuŋ gie-ticne i Anutu Mamac-ticne bârisiecneme dameŋ taraocmu hâcne. 25 Ʒi ine Wofuŋ gie-ticne bahuc juocmu, juku râsifâc-ticne ro waha âte ejare-fârerâ gie-ticne bataraocmu. 26 Râsi sâko mimic qa imac ecneocmu šâŋene hâmoc. 27 Anutuzi ŋic â wiac sasawa Kristore wahamicnao râec-nâpo-fârewec hâcne. Erâ dâŋ šiŋuc fokac, “Ŋic â wiac sasawa bawahac-joparâ ere wahamicnao guruc-jopa-fârewec”, dâŋ i manapene Anuture mâmâc mukicne mi ezejec. E hâcne Kristore wahamicnao guruc-nâpoweczi rurumaŋnao mi huocmu. 28 Mamac e ŋic â wiac sasawa Ŋokâ rurumaŋnao guruc-nâpo-fâreme Ŋokâ e Mamacte wahamicnao waharâ domaocmu. Eme Anutuzi qâhuc-nâpo-fârerâ juju isiricke-fâreocmu.

29 Ŋoŋeraonec gâcnezi hâmokicne jaŋere erâ Miti Opâ ruaeŋgopieŋ, i hâmockonec fafahare mi fokacko wemocte iŋuc eeŋgopieŋ? 30 Erâ wâc nâŋe ine wemocte šârâ hâriŋ faio gâbâmâc qâmâc jumbeŋzi jueŋgopeneŋ? 31 Âgofâc-nane, Kristo Jesu Wofuŋ-nâŋeczi eri-nane râec-ŋopawec ŋoŋere maio mukopac: No šoaŋ gie bapa sâc hâmoczi bâmbeŋnuha juekopac. 32 No Efeso haeo qowi mimicne jaŋehec juju gie bapo i ŋicdâŋko siŋkehuc epoo wemo fârine mo fua-nareocmu? Hâmockonec fafahare mi fokacko šiŋuc mupene sâckezac: “Tomâcko moc hâmonšipeŋte miŋecgac jaha nânâ qowi ro nâc qânâc enaŋ.” 33 Moczi moc ba qâsoric eŋarenšipiŋ ine¡ Kosa jujune jaŋerao qohotaocmu e eebapa biaŋne sifuckecneocmu. 34 Ŋoŋe maŋŋeŋic ɋâreme pectâc juhuc sâqocne geŋkenšepieŋ. Ŋoŋeraonec gâcnezi Anuture kâuc baŋgopieŋ, i manarâ mimieniŋte mukopac.

35 Gâcnezi šiŋuc mecne muniŋmu: Hâmokicne jaŋe weniŋuc erâ fahareniŋmu â sahac hawari-jeŋic weniŋucnehec fuaniŋmu? 36 I dâŋ mutucne” ŋoŋe wiac saraeŋgopieŋ i mâc mi wefuekac, mimiŋne šaŋkeha bâpâŋne wefuekac. 37 Á wiac saraeŋgopieŋ, i borâcne mi saraeŋgopieŋ, hândâŋne sawa saraeŋgopieŋ, jacgoŋ me wiac gâcnere hândâŋ, eme borâcne â rehacne šâhec fuaekac. 38 Eme Anutu e mana tararâ hawari mucnewec ijaha wefurâ fuaekac, hândâŋne sâc hawari fuŋne fuŋne fuaekac.

39 Sahacte fuŋne iŋuc jaha mocjaha mi fokac, ŋic nâŋâcne sahac i moc â bec qowi jaŋere sahac i moc â wipe jaŋere moc â opâ qowi jaŋere moc. 40 Sambâŋko wiac fâri ŋerakac â mâreŋko wiac fâri ŋerakac. Erâ sambâŋko ŋerakac i eri-ticne moc, â mâreŋko ŋerakac i eri-ticne moc. 41 Ʒoaŋ e tatamacne moc, mosa e tatamacne moc, bâpiŋ jaŋe tatamac-jeŋic moc, erâ bâpiŋ tatamac-jeŋic mocjaha mâcne, fuŋne fuŋne fokac.

42 Hâmockonec fafahare irec fuŋne ijaha fokac. Sarakicnezi sisirowene, fahareocmuzi mi sisirowene” 43 sarakicnezi joŋtawekicne, fahareocmuzi erinehec” sarakicnezi weweaŋne, fahareocmuzi tâpirinehec” 44 sarakicnezi mâreŋ sahachec, fahareocmuzi sambâŋ sahachec. Mâreŋ sahac fokac, iŋuc jaha sambâŋ sahac fokac.

45 Dâŋ šiŋuc hâcne qâreŋkekicne fokac: “Ŋic mârâc fufua Adam e maŋ qâqâtâchec erâ ɋârewec.” Ʒâhec Adam e ine Mârohec ehuc juju bâbâfua irec rune ewec. 46 Sambâŋte wiaczi mi bâniewec, mâreŋte wiaczi bânieha sambâŋte wiaczi šâhec ewec. 47 Mâreŋŋic e mâreŋzi bakicnere mâreŋkonec ŋic ewec â šâhecŋic e ine sambâŋkonec. 48 Mâreŋkonec ŋic juwec sâc ijaha mâreŋkonec ŋicfâc-ticne jueŋgopeneŋ, â sambâŋkonec juwec sâc ijaha sambâŋte biŋefâc-ticne nâŋâc junaŋmu. 49 Eme mâreŋkonec ere hawari rombeŋ, iŋuc jaha sambâŋkonec ere hawari ronaŋmu.

50 Âgofâc, dâŋ moc ši mupe mananiŋ: Mâreŋ sahac-nâŋeczi Anuture uucmaŋ sâcne mi rauckeocmu, â wiac gârecke šaŋ eenezi wiac fofo sanaŋ mi wâc rauckeocmu. 51 Manaŋgopieŋ, ši dâŋ soŋne moc mufua-ŋarepe: Nâŋâc mi hâmo-fârenaŋmu, hetikierâ hawari moc ee ine šeŋgoma efârenaŋmu. 52 Qeŋ mimic dâŋeme ututuŋ, ɋeŋfâfâc jaha iŋuc hâcne enaŋmu. Qeŋ dâŋeme hâmokicnezi faharerâ gârecke šaŋ tâmiric juniŋmu, â ɋâricne junaŋmuzi wâc hetikierâ hawari moc enaŋmu. 53 Sahac ši gârecke šaŋ eenezi juju saric i ŋaqi iŋucne  heme huzejec, â hâmocte biŋe ekicnezi juju sanaŋ heme huzejec.

54 Eme gârecke šaŋ eenezi juju saric heme huocmu, â hâmocte biŋe ekicnezi juju sanaŋ heme huocmu, dameŋ ira dâŋ kecšiŋuc qâreŋkekicne i deŋkeocmu: