JOHANE I
Asia mâreŋ masunao Jesure kikefuŋ gurune gurune jurambiŋ. Eme Paulo â Petoro jahe hâmohapire Johanezi Efeso haeo ra juwec. Ira juhuc hae sâc mitiŋic ŋokac jurambiŋ jaŋe mamac ejarewec. Mamac ejarehuc juhame jara 23 tarawec. Eme papia I qâreŋkewec i ŋic i jaŋere biŋe qâreŋkewec hâcne. Petorozi qanaŋ jaha ŋic ijaha papia jajahec râe‐jarewec. Eme papia‐ticnezi mitire mumusifuc â bâbâsifuc fowec i hehâmowec. Hehâmohame ʒâhec moc fuawec. Ine ŋic moc ʒâŋene Kerinti eki kecʒiŋuc muwec: Kristo â Jesu jahere fuŋne bârâwiŋ. Kristo e ŋic sahachec mi fuawec. Ŋic omane moc juwec ʒâŋene Jesu, e Johanezi Miti Opâ ruacneme erao Kristozi hapâ hawari iŋucne wahawec. Erâ Jesuhec juhame maripoŋko qazo ehapie Kristo e beherâ sambâŋko risie fewec. Burecdâŋ i hâcne haŋ bazo eme Johanezi hehâmoocte papia ʒi râe‐jarewec.
Dâŋ qizecne kecʒiŋuc qâreŋkewec: Wofuŋ e tatamac rune, irec naru motecfâcne tatamackoa juhuc dâpâckonec wiac qikiŋnezo (gaŋ 1 â 2:1–17). Erâ dâŋ qizecne moc: Kristore râsifâc juŋgopieŋ jaŋe Anutu Mamac â Ŋokâ‐ticne bârâwiŋ‐jofazo muŋgopieŋ, jaŋere sawaŋ qahuc juzo (gaŋ 2:18–29 â 4:1–6). Dâŋ qizecne moc: Anutu e maŋjauŋ sokawec jâmbâŋ eŋarewecte sâqocne geŋkehuc maŋjauŋ eec ezo (gaŋ 3). Erâ moc: Anutu e maŋjauŋ irec fuŋqizecne jukac, eme nâŋâc âgofâc‐nâŋec maŋjauŋ ejarepene Anuturao qacneocmu (gaŋ 4:7–21 â 5:1–4). Erâ moc: Jesu e Anuture Ŋokâ muhuc e manasiŋkenaŋmuo ine sisipiric hatao mi rahuc juju sanaŋ rauckenaŋmu (gaŋ 5:5–21).
1
Mumuʒâwe dâŋ
Fuŋnaonecteaŋ fowarehuc juwec, eme hazeczi manambeŋ â ʒâŋe‐nâŋeczi honembeŋ, erâ hone dendeŋnehuc mezi ba bâuac ecnembeŋ, i juju sanaŋte Micdâŋ hâcne. Joh 1:1, 14 Juju fârine fua tâcneme honembeŋte juju sanaŋte biŋedâŋ hâcne mufuarâ ŋazaeŋgopeneŋ. Juju sanaŋ i Mamactao fowarehuc juku nâŋerao fomârâŋkewec. Joh 1:4 Ine hâcne wiac hone manac embeŋ ijaha ŋoŋe wâc ŋazaeŋgopeneŋ. Ŋazapene manapie miriŋ‐nâŋec fuame mocjaha junaŋte hâcne mueŋgopeneŋ. Eme miriŋ babac‐nâŋec i Mamac â Ŋokâ‐ticne Jesu Kristo erao qâsiŋnerâ foekac. Iŋuc fuame bubiaŋ‐nâŋec fua ɋârâŋke taraocte papia ʒi hâcne qâreŋke‐ŋarekopac. Joh 15:11; 16:24
Tatamacko juhuc sâqocnere hehesoŋ mi bajuzo
Dâŋ biŋe Jesuraonec kecʒiŋuc manambeŋte ŋazaeŋgopeneŋ: Anutu e tatamac, dapâc i erao moc mi fohuŋgaŋkekac. Jak 1:17 Nâŋâc dapâcko juhuc Anuturao qohotaŋgopeneŋ mupene burec eocmu â dâŋ fâri qizecne mi bajunaŋmu. Joh I 2:4; Joh 3:21 E jahacne tatamacko jukac iŋuc jaha wâc nâŋâc tatamacko junaŋmu, ine miriŋ babac sâcne enaŋmu, eme Ŋokâ‐ticne Jesu Kristo ere soczi sâqocne‐nâŋec ʒureme ɋaɋackenaŋmu. Heb 9:14; Bar 1:5; 7:14 Nâŋâc sâqocne‐nâŋec mi fokac, iŋuc munaŋmuo maŋnâŋec eatuckenaŋmu â dâŋ fâri qizecne maŋnâŋecko mi foocmu. Â sâqocne‐nâŋec mufuanaŋmuo ine e mume sasanaŋ â tiŋne runezi sâqocne‐nâŋec ʒurehuc bahac‐nâŋec nâwoc rofâreocmu. Muq 28:13 10 Nâŋâc sâqocne mi baeŋgopeneŋ, iŋuc mupene Anutu burecŋic mucneŋgopeneŋ eocmu â dâŋticne maŋnâŋecko mi foocmu.

1:1: Joh 1:1, 14

1:2: Joh 1:4

1:4: Joh 15:11; 16:24

1:5: Jak 1:17

1:6: Joh I 2:4; Joh 3:21

1:7: Heb 9:14; Bar 1:5; 7:14

1:9: Muq 28:13