1 Jeroboam e hosâc âsu rikeocte alata maŋfuŋnao domahame Anuture ŋic moczi Wofuŋte micte Juda mâreŋkonec Bete haeo fisiwec. 2 Fisirâ Wofuŋte micte alatare dâŋ muhuc kecʒiŋuc muwec: “O alata, alata, Wofuŋzi gore ʒiŋuc mukac: ‘Manakic, Dawidire garikiŋko motec moc fuaocmu ʒâŋene Josia. Eki hâcne furu mâreŋte taha bapafâc gorao hosâc âsu rikeeŋgopieŋ jaŋe gore faio rikec‐jopame ŋic sieczi ʒâseŋkeocmu.’ ” 3 Iŋuc murâ ʒoaŋ ijaha ʒuhuckerâ madâŋ moc kecʒiŋuc muwec: “Wofuŋzi madâŋ kecʒiŋuc muwec: ‘Manakic, alata ʒi hetâtiehuc fainao ʒafe fokac i wâc hoŋkezo.’ ” 4 Eme ŋicwofuŋ Jeroboam e, Anuture ŋiczi Bete haeo alata ŋewec irec dâŋ owackehuc muwec i manarâ meticne fâretiŋnehuc kecʒiŋuc muwec: “Rorâ basanaŋkeniŋ!” Iŋuc muhuc Anuture ŋictao meticne fâretiŋkewec i râŋgeŋkeme fâre suckeocte eipiewec. 5 Eme Anuture ŋiczi Wofuŋte micte madâŋ muwec irec sâcko alatazi tâtiewec â alata faio ʒafe fowec i wâc iŋuc jaha tâtiewec. 6 Iŋuc fuame ŋicwofuŋ e Anuture ŋic ʒiŋuc âzâcnewec: “Go nore erâ Wofuŋ Anutuge mu bâmiriŋ ecnehuc numucnetec menane mocwâc biaŋkeoc.” Iŋuc mume Anuture ŋic e Wofuŋ wâsickewec. Wâsickehame ŋicwofuŋte mezi mocwâc biaŋkerâ mârâc fowec irec sâc bâfuawec. 7 Eme ŋicwofuŋzi Anuture ŋic hefârehuc muwec, “Nore ficko rarâ ira ŋec domac enac, ehuc tofa bazu‐garepe.” 8 Eme Anuture ŋiczi ŋicwofuŋ dâŋ ʒiŋuc bâtikiecnewec: “Go ficge dâkâne narezo mucmuo no sifu ficgao mi hefâpemu. Erâ no hae mâreŋ ʒira nânâ opâ mi nâpemu. 9 Wofuŋzi dâŋ ʒiŋuc hâcne muhuc mutâcne‐narejec: ‘Go nânâ opâ mi nâzemec; erâ wâc hata waremec ijaha mi risiezemec.’ ” 10 Eme irec e Bete haeo fisiocte rawec, hata ijaha mi risiehuc hata mocko rawec.

11 Eme Bete haeo porofete raŋɋa moc juwec. Ehame ŋokâfâcne jaŋe fisirâ Anuture ŋiczi Bete haeo wiac sasawa ebac ewec irec binaŋ bacnembiŋ. Erâ ŋicwofuŋ dâŋ âzâcnewec i wâc iŋuc jaha mamac‐jeŋic âzâcnembiŋ. 12 Âzâcnepie mamac‐jeŋiczi wio‐jarerâ muwec, “E hata weniŋucpec rajec?” Iŋuc wio‐jareme ŋokâfâcne jaŋe, Juda mâreŋkonec Anuture ŋic fisiwec eki hata rawec i jâutumbiŋ. 13 Jâutupie ŋokâfâcne jazarâ muwec, “Doŋgio sate henareniŋ.” Iŋuc mume sate hecnepie ferâ rawec. 14 Anuture ŋic bâjâperâ raku boriŋjâc mocte fuŋnao ŋehame bâfuarâ wiocnehuc muwec, “Anuture ŋic Juda mâreŋkonec fisijec i go hâcne me?” Wiocneme muwec, “No hâcne ʒi.” 15 Iŋuc mume âzâcnerâ muwec, “Nohec ficko rarâ nânâ piticne nâc.” 16 Iŋuc âzâcneme dâŋ ʒiŋuc bâtikiecnewec, “No gohec mocwâc sâcne mi risiepemu, â mâreŋ ʒira nânâ opâ wâc mi nâpemu. 17 No ʒira nânâ opâ mi nâpemurâ me hata warepo ijaha mi risiepemurâ Wofuŋte dâŋzi nazakac.” 18 E iŋuc mume ʒiŋuc âzâcnewec: “No wâc go iŋucne porofete jukopac, ehame Wofuŋte micte aŋelo moczi ʒiŋuc muhuc nazajec: ‘Go bârisietec ficgao warerâ nânâ opâ nâzejec.’ ” Erâ e iŋuc muhuc eatuckewec. 19 Eatuckeme ehec ficticnao rarâ nânâ opâ nâwec.

20 Eme jahe teboo ŋehapire Wofuŋte dâŋzi jowame risiepic porofete hae rune erao fuawec. 21 Eme Anuture ŋic Juda mâreŋkonec fisiwec e owackecnehuc muwec, “Wofuŋ e ʒiŋuc mukac: ‘Wofuŋ Anutugezi mutâcne‐garejec sâcmutâc i mi reŋkehuc 22 risierâ nânâ opâ nâkomec. Ehuc hae mâreŋ ʒira wiac i mi ecmurâ dâŋ ʒiŋuc gazawec i qâsuakomec: “Go nânâ opâ mi nâzemec.” Irec qâŋɋâŋgezi mamacfâcge jaŋere ʒâŋeruŋko mi fozejec!’ ” 23 Eme nânâ nâpire tarame porofete jowame risiepic ere doŋgi sate hecnewec. 24 Eme porofete e rahame hatao laioŋ moczi fisi bâfuarâ kihâmowec. Kihâmome qâŋɋâŋ‐ticne hatao foha doŋgi â laioŋ jahe qâterâ ŋifec â ŋifec domapic. 25 Ehame ŋic jaŋe hata ira fotâcnehuc qâŋɋâŋ hatao fohame laioŋzi qâterâ gâjoŋne ŋifec domame honembiŋ. Ehuc porofete raŋɋazi hae juwec ira fisirâ ŋic dâŋ binaŋ ejarembiŋ.

26 Ehame hatao bârisiewec porofete eki dâŋ i manarâ muwec, “I Anuture ŋic Wofuŋte dâŋ qatarajec e hâcne. E Wofuŋzi dâŋ âzâcnewec irec sâcko laioŋtao râeme kisuc qâsuckehuc kihâmojec.” 27 Iŋuc murâ ŋokâfâcne ʒiŋuc jazawec: “Doŋgio sate henareniŋ.” Mume iŋuc embiŋ. 28 Eme e rarâ qâŋɋâŋ hatao fome doŋgi â laioŋ jahe ŋifec â ŋifec domahapire bâfuawec. Erâ laioŋ e qâŋɋâŋ i mi nâwec â doŋgi wâc ki qâsuc wiac moc mi ecnewec. 29 Eme porofete e Anuture ŋicte qâŋɋâŋ i doŋgi faio râerâ ki soŋgâŋ ehuc duckeniŋte haeo mocwâc bârisiewec. 30 Ehuc qâŋɋâŋ i e jahacne ʒâŋeruŋko duckerâ ʒiŋuc muhuc kiombiŋ: “Opoŋ, qomâ‐nâŋec.” 31 Eme ŋic e duckerâ ŋokâfâcne kecʒiŋuc muhuc jazawec: “Juku hâmope Anuture ŋic duckeŋgopeneŋ ʒâŋeruŋ ijaha ducnunʒepieŋ; siec‐nane i ere siec ŋifecnao râenʒepieŋ. 32 E Wofuŋte micte Bete haeo alata ŋekac â Samaria hae sâc ira furu mâreŋko ufuŋ ŋerakac irec dâŋ muwec i juku jâmbomac fârio qafâreocmu.”

33 Wiac iŋuc fuame Jeroboam e sifu hata‐ticne hehesicnaonec moc mi risiewec. E ŋic ŋokac guruonec ŋic tucne rocjoparâ furu mâreŋte taha bapa mocwâc âkendâŋ‐jopa rawec. Ehuc ŋic i me i gie irec sâc embiŋ jaŋe rocjoparâ furu mâreŋte taha bapa âkendâŋ‐jopawec hâcne. 34 Eme wiac izi Jeroboam kikefuŋfâc‐ticne jaŋerao hehesic ewecte mâreŋte faio juju‐jeŋic omaeocte sâc ewec.