1 Erâ aeŋ bâbâroŋzi alata moc ʒoricne‐ticnere sâc 20 kubi â otecne‐ticnere sâc 20 kubi â hâŋne‐ticnere sâc 10 kubi, iŋuc bawec. 2 Eme aeŋ bâbâroŋ rike sueŋkerâ opâ râqâc sâko mako oorâŋ moc bawec. Mecqaŋeŋne ŋifeckonec ŋifec fisiwec i kubi 10 irec sâc. Hâŋne‐ticnere sâc i kubi 5, â mucsâc orâŋkehuc fârepie kubi 30 ewec. 3 Eme râqâc sâko mecqaŋeŋne heririŋnao metâ wiac hândâŋ biri jajahec râreckehuc râekicne. Eme kubi moc maŋnao hândâŋ 10, 10 iŋuc sasawa. Eme irec sâc fuaocte qanaŋ afezi sâsâcne barâ râepie foha aeŋ bâbâroŋ rikerâ hesiepie hurâ fuawec. 4 Eme râqâc sâko i bulimakao hawari 12 jaŋere faio râekicne. Jaŋeraonec jahec â moczi faic mâreŋkopec maickerâ domambiŋ, jahec â moczi ʒoaŋ huhunaopec, jahec â moczi juwic mâreŋkopec â jahec â moczi ʒoaŋ wewefunaopec. Eme sârec‐jeŋiczi iitic ehapie râqâc sâko i fai‐jeŋicko ŋewec. 5 Eme râqâc sâko ɋâfoŋne‐ticne i metape mocte sâc, eme mecqaŋeŋ‐ticne i hapec mecqaŋeŋ iŋucne â hawarine i faroqac âri iŋucne; maŋnao opâ hurâ ŋewec i pake 3 tauseŋ irec sâc. 6 Erâ ʒuʒure gomba 10 barâ fâreopec 5 hecjopawec â qanaopec iŋuc jaha 5 hecjopawec. Eme ira hâcne qowi bâzi rikehuc wiac bajumbiŋ i heʒâziŋkepie rawec, â opâ râqâc ira ine taha bapa jaŋe opâ ruaniŋte bawec.

7 Erâ e lambe dodoma 10 mutâcnekicne irec sâc golzi barâ taha ufuŋko râewec, 5 i fâreopec â 5 ine qanaopec hecjopawec. 8 Erâ wâc tebo 10 barâ taha ufuŋko râewec, 5 i fâreopec â 5 i qanaopec. Erâ gomba 100 golzia bawec. 9 Ehuc taha bapa jaŋere hae ʒoŋa â hae ʒoŋa sâko erâ hae ʒoŋa irec motâc doma rawec i bafârerâ motâc sasawa aeŋ bâbâroŋzi ɋorocke‐fârewec. 10 Ehuc opâ râqâc sâko i ufuŋko mâreŋ juwicpec â ʒoaŋ wewefunaopec ŋoŋondeŋ‐jekic tuturuŋne fowec ira heme ŋewec.

11 Eme Huram e kuʒi, sapac â soc titiere râqâc wiac bawec wâc. Iŋuc erâ ŋicwofuŋ Salomore micte Anuture ufuŋko gie bawec i batara‐fârewec. 12 E wiac ʒiŋuc bafârewec hâcne: Wâtuŋ ŋicne jajahec utu‐jekic oorâŋ barâ fainao eri wiac mizekicne sâckerâ râe rawec. 13 Erâ jâchândâŋ hawari 400 bawec wâc, i eri wiac jajahec mizec‐jofakicne ira biricke rakicne, ehuc eri mizekicne mocko jâchândâŋ biri jajahec râec‐jofakicne, â mocko biri jajahec jaha râec‐jofakicne. 14 Erâ keretac wiac 10 â kuʒi sâko 10 i keretac sâc moc moc ŋerawec, 15 erâ opâ râqâc sâko â i derâ domaŋgopieŋ bulimakao 12. 16 Erâ kuʒi, sapac â soc titiere râqâc wiac, ine hâcne, wiac keci sasawa i Huramabizi ŋicwofuŋ Salomore micte Wofuŋ ufuŋ‐ticnere biŋe aeŋ bâbâroŋ emasaŋkekicnezi bafârewec. 17 Jordaŋ wâneŋko Zereda â Sukoti hae jahere ŋondeŋko ŋicwofuŋzi mume wiac keci afezi sâc barâ aeŋ bâbâroŋ rike hesiec epie hurâ fua‐fârewec. 18 Salomo e wiac iŋucne bocjaha jâmbâŋ bawec. Ehame aeŋ bâbâroŋte ŋemâc i mamana taranere sâc mi ewec.

19 Eme Salomo e Anuture ufuŋko wiac ʒiŋuc ŋewec i bafârewec: Alata golzi bakicne, poroŋ furu mukicne i rârâere tebo, 20 lambe dodoma â lambe gol ɋaɋacnezi bakicne, i furific mutâcnekicne irec sâc batamaeniŋte; 21 erâ âri wiac, lambe â ʒoc roro fitac gol ɋaɋacne jâmbâŋzi bakicne; 22 erâ ʒocbâruŋ ââke hâpo, soc titiere râqâc, hosâc âsu ririkere râqâc â ʒocrâqâc gol ɋaɋacnezi bakicne. Erâ ufuŋte motâc sâko â furu dindiŋte motâc â furufic maŋne irec motâc golzia bakicne.