KORINTI II
Paulo e Korinti ŋic jaŋere papia I râe‐jareme rame woserâ dâŋjeŋic fowec i sâcne mi mufâsâembiŋ. Eme Paulo e irec biŋe manarâ Tito soreme rawec. E jahacne ine Efeso haeo ŋewec. Eme Tito e rarâ jume ʒorame Paulo e woŋec juipierâ mâretec maŋbahackewecte e jahac Korinti haeo raocte rawec. Raku Makedonia mâreŋko fisirâ ira Tito bâfuawec. Erâ Tito ere mickonec dâŋ ʒiŋuc manawec: Korinti ŋic jaŋe Paulore dâŋ mana uruerâ bahac fowec i bâtiŋnembiŋ, ehuc sâqocne bapa e tuŋkembiŋ, â fâfâuc fowec irec dâŋ wâc mutararâ maŋ mocjaha embiŋ, erâ wâc bâbâsifuc wiac gâcne i bâtiŋneniŋte giene bahuc jumbiŋ.
Paulo e dâŋ i manarâ bune uruene Wofuŋ daŋge âzâcnewec. Erâ Titozi dâŋ i sawa mi barawec. Dâŋ moc bafisiwec ine ʒiŋuc: Korinti kikefuŋ neŋgocne sâko jaŋe Paulore dâŋ reŋkehuc bâbâtiŋ gie bapie Judaŋic opâ ruac bâbâsifucne jaŋe i honerâ aaric‐jopawec. Irec Paulo mupitiwahuc mâretec musoriŋkembiŋ, ehuc gie‐ticne â eebapa‐ticne surehuc Korinti ŋic dâŋ bocjaha jazambiŋ. Gie repicne i fuŋkerâ bahapie Titozi hone manac ejarewecte irec dâŋ binaŋ wâc Paulo ecnewec. Eme Paulo e bubiaŋ fârine manaweczi ŋifec buʒâic wâc manawec. Ehuc Korinti ŋicfâcne maŋ bâsifuc ejarekupie sisipiricte hatao mocwâc ranʒipiŋte boc mezackewec. Irec papia namba II ʒi hâcne Makedonia mâreŋko juhuc qâreŋkewec.
Papia maŋnao dâŋ neŋgocne neŋgocne kecʒiŋuc forakac:
Gaŋ 1—7. Paulo miti gie‐ticnere dâŋ.
Gaŋ 8—9. Jerusalem haeonec kikefuŋ jaŋere erâ taha moneŋ rârâere dâŋ.
Gaŋ 10—13. Paulo e kikefuŋ jaŋere erâ juju gie fârine bawec.
1
Jambuŋ â mumuteŋ dâŋ
Anuture micdâŋte Jesu Kristore aposolo epo Paulo no hâcne, erâ qomâ‐nâŋec Timoteo nâhe Korinti haeonec Anuture kikefuŋ â Akaia mâreŋko mitiŋic juraŋgopieŋ ŋoŋe papia ʒi qâreŋke‐ŋarehuc ʒiŋuc mukoperec: Kor I 1:1 Mamac‐nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec. Rom 1:7 Wofuŋ‐nâŋec Jesu Kristo ere Mamac â Anutu muteŋkenʒepeneŋ. E buuruc Mamac â bâbâmiriŋ rune juekac. Rom 15:5; Efe 1:3; Pet I 1:3 Ehuc ʒârâ hâriŋ fuŋne fuŋne enâreme bâmiriŋ‐nâpoekac. Eme Anutuzi bâmiriŋ‐nâpoekac, bâbâmiriŋ izia nâŋe iŋuc jaha âgo gâcne ʒârâ hâriŋ fuŋne fuŋne maŋnao juhapie sâcne bâmiriŋ‐jopanaŋmu. Kristo e ʒâic manawec irec tofane nâŋerao ɋârâŋne fuaekac, iŋuc jaha bâbâmiriŋ‐ticne ɋârâŋnea bâfua‐nâreekac. Mi Mâ 34:19; 94:19 Nâŋerao fific guguriŋ fuaekac, i ŋoŋerao bumâteŋ â bâbâpiaŋ fuaocte fua‐nâreekac, â bâbâmiriŋ fua‐nâreekac i wâc ŋoŋere erâ fua‐nâreekac, ine bâbâmiriŋ izi ŋoŋerao fotâcnerâ dopec‐ŋopahame fific guguriŋ nâŋerao fuaekac ijaha ŋoŋerao fuame irec ʒâic maŋuruc jaha mananiŋte. Kor II 4:15, 17 Eme nâŋe ŋoŋere manabâc mi ehuc ʒiŋuc manapaŋkeŋgopeneŋ: Ʒârâ hâriŋte kâdoc rohuc bâbâmiriŋte kâdoc mâmâc roeŋgopieŋ.
Wofuŋzi Paulo â âgofâcne hâmockonec batarac‐jopawec
Nâŋe Asia mâreŋko ʒârâ hâriŋ faio juwefumbeŋ irec kâuc banʒipiŋte mupe mananiŋ: Ira wiac hâhâwicne jâmbâŋ fai‐nâŋecko ferâ kimâc‐nâpome juju‐nâŋecte mâretec mana maŋbahac embeŋ. Apo 19:23; Kor I 15:32 Eme ʒi hâmocte biŋe eŋgopeneŋ muhuc maŋnâŋec ŋeŋgoroŋkewec. Erâ i mâc mi fua‐nârewec, nâŋe nâŋâcne tâpirire manapene waha qaqane eha Anutu hâmoc qâŋɋâŋ bâɋâreekac e mocjaha manasiŋkenaŋte wiac i fua‐nârewec. 10 Eme eki hâcne hâmockonec batarac‐nâpowec. Erâ e batarac‐nâpoweczi juku wâc batarac‐nâpozokac, dâŋ iŋuc mana ʒakiehuc erao siŋkeeŋgopeneŋ. Tim II 4:18 11 Eme ŋoŋe nunumuzi bafic‐nâpopie Anutu e buafec‐ticnere erâ ŋezic‐nâpome micne micne musereckerâ nâŋere erâ daŋge mumuteŋ ecnepie sâckezejec.
Paulozi maŋfâsâc juwec
12 Nâŋe nâŋâcnere piticne mana biaŋkeeŋgopeneŋ ine kecʒiŋucte: Maŋfâsâc â mitio maŋtaniŋ jupene maŋnâŋeczi wiac mocte tutuc mi qanâreekac. Nâŋe miti tâmiric jaŋere maio iŋuc hâcne juhuc miti mamana ŋoŋere maio wâc jujâmbâŋkeeŋgopeneŋ. I mâreŋko maŋɋârâŋ dâŋ fokac ira siŋkehuc mâcne, Anuture uruc jauŋko siŋkehuc eeŋgopeneŋ. Kor II 2:17; Heb 13:18; Kor I 1:17 13 Nâŋe dâŋ hetac herirec ehuc mâcne, dâŋ fârine sasawa qâreŋke‐ŋarepene wose manac eeŋgopieŋ. No manakopac, ŋoŋe ʒâhec mana tara‐jâmbâŋkeniŋmu. 14 Ine hâcne gâcne ŋoŋe ʒiŋuc biac mana tarazo eŋgopieŋ: Nâŋe ŋoŋere boreŋfâc â ŋoŋe Wofuŋ Jesu dameŋ sâko‐ticnao nâŋere boreŋfâc eniŋmu. Kor II 5:12; Fil 2:16
Paulozi pacgoroŋ dâŋ mi muwec
15 No dâŋ i hâcne maŋkehuc qanaŋ ŋoŋerao fârâ bubiaŋ qaŋarepemurâ mupo. 16 Erâ fâ honec‐ŋoparâ Makedonia mâreŋko razo mupo. Ira ra jurâ mocwâc ŋoŋerao risiepe gâcnezi bâjâpecnupie Judaia mâreŋko ranaŋte manasupo. Kor I 16:5, 6 17 Eme no iŋuc muhuc âkesac eŋarepo muŋgopieŋ me? Me no ŋic miti tâmiric, irec dâŋ mupaŋkepe moc i fârine â moc i racne eekac? Kor II 5:16 18 Anutu e jâmbomac rune jukacte dâŋ ŋazapene wemocko racne â fârine ataŋ eocmu? 19 Anuture Ŋokâ Jesu Kristo ere fuŋne i no â Siliwano â Timoteo nâŋe ŋazapene gâcne fârine â gâcne racne iŋuc mi ewec. Aricne, ere fuŋne i fâri fideteŋ sasawa. 20 Anuture biŋedâŋ fuŋne fuŋne i erao hâcne deŋke‐fârekac. Irec hâcne esoc‐nâpome “Jâmbomac” muhuc Anutu mucne bacneeŋgopeneŋ. Bar 3:14 21 Ŋoŋehec Kristorao râec‐nâpo sanaŋkewec i Anutu eki hâcne. Joh I 2:27 22 Erâ ekizia wâc ma qâreŋ banârehuc ʒâʒâfic‐ticne Mâro maŋnâŋecko râeme huwec. Kor II 5:5; Rom 8:16; Efe 1:13, 14
23 No Korinti haeo fârâ imac‐ŋopazipore mi fâpo. Dâŋ i Anutuzi manaha jâmbomac jâmbâŋ mukopac. Kor II 11:31; Rom 1:9 24 Erâ nâŋe mitio ŋicbomboŋ eŋarenaŋte mi muŋgopeneŋ, mâc ŋoŋerao bubiaŋ fuaocte babaficko gie baeŋgopeneŋ. Ŋoŋe mamanasiŋko qiŋ herâ domaŋgopieŋ i manakopac. Pet I 5:3

1:1: Kor I 1:1

1:2: Rom 1:7

1:3: Rom 15:5; Efe 1:3; Pet I 1:3

1:5: Mi Mâ 34:19; 94:19

1:6: Kor II 4:15, 17

1:8: Apo 19:23; Kor I 15:32

1:10: Tim II 4:18

1:12: Kor II 2:17; Heb 13:18; Kor I 1:17

1:14: Kor II 5:12; Fil 2:16

1:16: Kor I 16:5, 6

1:17: Kor II 5:16

1:20: Bar 3:14

1:21: Joh I 2:27

1:22: Kor II 5:5; Rom 8:16; Efe 1:13, 14

1:23: Kor II 11:31; Rom 1:9

1:24: Pet I 5:3