PETORO II
Petorore papia II i Petoro e jahac me mitiŋic âgo‐ticne moczi Petorore ʒâŋeo âkehotahuc qâreŋkewec i mi mana sanaŋkeŋgopeneŋ. Petorozi Asia mâreŋ masunao Jesure kikefuŋfâc jurambiŋ jaŋere papia namba i qâreŋkeme mi ʒorame jaŋerao mitire mumusifuc ŋic fisirâ ʒiŋuc jazambiŋ: Miti ɋâricnezi akadâŋ âkehockeme arictac ewecte juju kosa juzo. Iŋuc murâ dâŋ moc ʒiŋuc mumbiŋ: Jesu e mocwâc mi fisizokac, e fesanaŋ fewec hâcne. Ere woŋec maŋgâŋko mi juzo, behezo. Mumusifuc dâŋ i muhuc sasec mamakâc embiŋ. Ehuc ŋic ŋokac qazu‐jarezo mumbiŋ. Eme Petoro e jahac me mitiŋic moczi irec dâŋ manarâ uŋdâŋ qâreŋke‐jarewec hâcne.
Qâreŋŋic e mitire fârine jaŋerao fua ɋârâŋkeocte bufac qajarewec (gaŋ 1:3–11). Ehuc wiac hone manac eweczi miti mana sarickehuc muwec. Eme hâmoc dameŋ‐ticne bembeŋkewecte ʒi mimic uŋ sawaŋ ejarewec (gaŋ 1:12–21). Erâ mumusifuc â sasec ŋic jaŋere fuŋne ritu‐jâmbâŋkewec (gaŋ 2). Â Wofuŋ fifisi‐ticnere fuŋne mujaŋgeŋkehuc qâreŋkewec (gaŋ 3).
1
Mumuʒâwe â jambuŋdâŋ
Simoŋ Petoro, Jesu Kristore kiŋaŋ qaqa â aposolo noni, Anutu â bâbâpiaŋ‐nâŋec Jesu Kristo tiŋne‐ticnere erâ mamanasiŋ furi sâko tahac‐nâpokicne ijaha ŋare tahac ekicne, ŋoŋe papia ʒi qâreŋke‐ŋarekopac. Ŋoŋe Anutu â Wofuŋ‐nâŋec Jesu mana maŋ epie ŋoŋerao aki anonoc â wama ɋaŋɋaŋ ɋâriaŋ fuahuc fozejec. Jud 1:2
Mitire fârine bâfua rahuc juzo
Jesu e tatamac â tâpiri‐ticnezi hefârec‐nâpome hone ʒâŋitac ecnepene sahacte â maŋte dope sasawa i Anutu tâpiri‐ticnezi bâfua‐nârewec. Pet I 2:9 Iŋuc erâ dâŋ biŋe fekicne furi sâko nâre tahac ewec, i maŋkepene irec fârine nâŋâcnao fuame mâreŋko sasecte sisipiric fokac i râpeckerâ Anuture hawari qâreŋfâc enaŋmu. Irec ŋoŋe mamanasiŋhec juŋgopieŋte ʒoɋac epie tiŋne juju‐ŋeŋic fuazejec, tiŋne jujuzi mamana bâfuazejec, Gal 5:6, 22; Jud 1:3 mamanazi maŋte sowa bâfuazejec, maŋte sowazi sasanaŋ bâfuazejec, sasanaŋzi miti nunumure aafec bâfuazejec, miti nunumure aafeczi ââgo juju bâfuazejec, ââgo jujuzi maŋjauŋ bâfuazejec. Gal 6:10 Wiac i sasawa ŋoŋerao fohuc fua ɋârâŋkeme Wofuŋ‐nâŋec Jesu Kristo mana maŋ eniŋte giene bapie fârimâc mi eocmu. Moc e wiac i tâmiric juocmu, ere ʒiŋuc muzo: E ʒâŋe tiŋtuŋ â maŋmutuc, mârâc ʒure bâpiaŋ ecnekicne irec nikeckewec. Joh I 2:9, 11 10 Âgofâc, ŋoŋe irec hâcne samarierâ, bâwosâec‐ŋoparâ hefârec‐ŋopakicne i fârinehec eocte sasanaŋ bâfuanʒepieŋ. Ŋoŋe iŋuc erâ docke pârâc tâmiric sâcne juniŋmu. 11 Iŋuc epie juku Wofuŋ â bâbâpiaŋ‐nâŋec Jesu Kristozi eŋareme ere juju sanaŋte uucmaŋko ququŋke tâmiric hata aaŋko raʒiniŋmu. Joh 3:5; 10:7
Petoro e hâmoc‐ticnere manawec
12 Ŋoŋe wiac i sasawa qazu‐ŋarekicne â dâŋfârio keteŋ‐ŋopakicne domaŋgopieŋ, i manahuc sifu dâŋ ijaha heɋâre‐ŋarehuc jupemu. Jud 1:5 13 Sahac boze‐nanehec juhuc sâc dâŋ i manasu‐ŋarehuc wiwic‐ŋopape sâckeocmu. Kor II 5:1 14 No boze‐nane biac hetarapemu i manakopac, dâŋ i Wofuŋ‐nâŋec Jesu Kristozi mufua‐narewec. Joh 21:18, 19 15 Erâ behec‐ŋopape ŋoŋe dâŋ i ɋâreme ɋâre mana rahuc juniŋte emoc bâmoc eŋarepemu.
Petoro e bapa fuŋfuŋ juhuc wiac hone manac ewec
16 Nâŋe Wofuŋ‐nâŋec Jesu Kristo tâpiri‐ticnere â fifisi‐ticnere dâŋ ŋazambeŋ, i nemu binaŋ ŋic mamanao fuakicne mi ŋazambeŋ, nâŋe bapa fuŋfuŋ domahuc Wofuŋ tatamac‐ticne fuame honembeŋ. 17 Ine Anutu Mamaczi eri mumuteŋ râcnehame sambâŋ tatamackonec erao dâŋ ʒiŋuc wahawec: “Joroc Ŋokâ‐nane keci hâcne, no hone aŋac ecneekopac.” Mat 17:5 18 Nâŋe ehec mâmâc tiri tikio juhapene dâŋ i sambâŋkonec wahame manambeŋ. 19 Eme nâŋe irec porofete jaŋere dâŋ manapene fârine jâmbâŋ eekac, izi ʒoclambe iŋucne erâ dapâcko tamaeekacte ŋoŋe ira ʒâŋe fihuc juhapie hae fure‐fârezejec â maŋŋeŋicko bâpiŋ sâkozi wefuzejec. 20 Erâ qanaŋ moc ʒiŋuc mana‐hâmonʒepieŋ: Findaŋdâŋ miti papiao qâreŋkekicne fokac irec fuŋne i ŋic moczi e jahacne maŋte mi mumune. 21 Findaŋdâŋ i ŋiczi manasu biric erâ moc mi mukicne, ŋic jaŋe Tiri Mârozi fenʒoŋ‐jopame Anuturaonec dâŋ mujumbieŋ. Tim II 3:16, 17

1:2: Jud 1:2

1:3: Pet I 2:9

1:5: Gal 5:6, 22; Jud 1:3

1:7: Gal 6:10

1:9: Joh I 2:9, 11

1:11: Joh 3:5; 10:7

1:12: Jud 1:5

1:13: Kor II 5:1

1:14: Joh 21:18, 19

1:17: Mat 17:5

1:21: Tim II 3:16, 17