7
Anutuzi Dawidihec ʒâʒâfic ewec
(Bin I 17:1–27)
Wofuŋzi ŋicwofuŋ Dawidi kisâfâc‐ticne jaŋere erâ ŋezickehuc wama bâfuacneme ficticnao juhuc porofete Nataŋ ʒiŋuc âzâcnewec: “Manakic, no jâmâzâc fic ʒira ŋeŋe juju ekopac â Anuture katapazi ine bozeo ŋekac.” Iŋuc mume Nataŋzi ŋicwofuŋ dâŋ ʒiŋuc bâtikiecnewec: “Go rarâ manakic sâc ec, Wofuŋzi gohec jukac hâcne.”
Eme ŋafe ira Wofuŋte dâŋ ʒiŋuc Nataŋtao fuawec: “Go rarâ kiŋaŋŋic‐nane Dawidi ʒiŋuc âzâcnec: ‘Wofuŋ e ʒiŋuc mukac: Goki fic moc banarecmurâ mukomec me? No Israe ŋic Aigita mâreŋkonec jowac‐jopa wefupoonectehaŋ fic mocko ŋeŋe juju mi ehuc bozeoa ŋeŋe juju ewarehuc jupozi jukopac. No Israe ŋic jaŋehec mâreŋ ira me ira rac warec epo sâc Israe ŋic gurufâc‐nane soŋaŋ‐jopahuc juniŋte mujarepo mumutara ŋic i jaŋeraonec moc dâŋ ʒiŋuc âzâcnepo: “Go wemocte jâmâzâc jâczi fic moc mi banarekomec?” ’ Irec go kiŋaŋŋic‐nane Dawidi ʒiŋuc âzâcnezemec: ‘Anutu Tâpiri Ɋuŋɋasaŋ Wofuŋ e ʒiŋuc mukac: Go lama bâjâpec‐jopahuc kecɋaŋ gieo juhaŋtec Israe ŋicfâc‐nane jaŋere fekicne jucmurâ rocgupo. No ira me ira juekic sâc gohec juekopac. Erâ bânie‐garehuc kisâfâcge sasawa jopaekopac. Erâ ʒuhuckerâ mâreŋko ʒâŋe biŋe sâkohec jaŋe iŋucne ʒâŋe biŋe sâkohec jaha bacgupemu. 10 Erâ Israe ŋicfâc‐nane jaŋe ŋeŋe hae moc bâfua‐jarepe ira jusanaŋkeniŋmu. Eme ŋeŋe hae jâmbâŋ‐jeŋic bâfua‐jarepe ira juhapie juwicnao ŋic repicne gâcnezi fific guguriŋ ejarehuc ʒikare suru jâiŋ ejare jumbieŋ mâsi wiac iŋucne mocwâc mi fuazejec. 11 Erâ juwicnao Israe ŋicfâc‐nane qaŋeŋ‐jopaniŋte mumutara ŋic râec‐jopape juhapie wiac fuawec iŋucne mocwâc mi fuarâ fozejec. No kisâfâcge jaŋere erâ ŋezicguhuc wama bâfua‐garepemu. Erâ ʒuhuckerâ ʒiŋuc mutâniŋke‐garekopac: Wofuŋ noni hâcne fic moc bagarepemu. 12 Eme juju dameŋge tarame apa ŋosafâcge jaŋehec fomanahaŋtec garikiŋfâcge â naru motecfâcge jaŋeraonec moc rowosâepe eki gore tuc qarâ jume no uucmaŋ‐ticne dope hutuŋ ecnepemu. 13 Iŋuc ecnehape eki ʒâŋe‐nanere fic moc baocmu. Eme no uucmaŋ‐ticne dope hutuŋ ecnehape raŋɋa raŋɋa foocmu. 14 Erâ no mamac‐ticne ehape eki ŋokâ‐nane erâ juocmu. E sâqocne bame mâreŋ mamac jaŋe ŋokâfâc‐jeŋic jopa bâtiŋ eeŋgopieŋ irec sâc no gunu â kâcbiŋzi qa bâtiŋ ecnepemu. 15 No ʒâŋe faigao Saulo ecnepo iŋuc aki anonoc‐nanezi eraonec moc mi rârie‐jâmbâŋkeocmu. 16 Eme garikiŋfâcge dope hutuŋ ejarepemurâ uucmaŋgezi ʒâŋe fai‐naneoa fohuc juocmu sanaŋ.’ ” 17 Eme Nataŋ e dâŋ sasawa âzâcne jâutuc ekicne irec sâcko binaŋ bahuc Dawidi âzâcne‐fârewec.
18 Eme ŋicwofuŋ Dawidi e bozeo raʒirâ Wofuŋ maickehuc waha ŋerâ ʒiŋuc numuwec: “O Wofuŋ Anutu, no ŋic waha qaqane â garikiŋfâc‐nane jaŋe wâc ʒâŋe biŋe tâmiric, ehame go ine sifu jaha ehâmo‐narekomec. 19 O Wofuŋ Anutu, go wiac iŋucnere manatec wawahane eha kiŋaŋŋicgere garikiŋfâc â ŋic gaŋne gaŋne jufeniŋmu irec dâŋ i mârâc naza nowatuc emeŋ. 20 Irec wemo dâŋ moc ʒuhuckerâ gazapemu? O Wofuŋ Anutu, go kiŋaŋŋicge nore fuŋne mana tara‐fâreekic. 21 Erâ go gahacne mumupaŋte â maŋgezi mukac irec sâcko wiac qeŋ bipinehec ʒi ehuc kiŋaŋŋicge no mufua‐narekic. 22 O Wofuŋ Anutu, goki sawa hâcne fekicne, go iŋucne moc mi jume manaeŋgopeneŋ. Anutu moc mi juha goki sawa jukic hâcne. 23 Me Israe ŋicfâcge jaŋe weni jaŋehec sâc hecjopazo? O Anutu, go mâreŋko ŋic guru gâcne weni jaŋe ŋicfâcge bacjopacmurâ kiŋaŋ qaqa gieonec batarac‐jopazo fisimeŋ? Erâ ʒâŋe biŋege saweocte wiac qeŋ bipinehec ehuc ŋicguru weni jaŋe Aigita mâreŋkonec batarac‐joparâ hata‐jeŋic bâʒâwemeŋ, ehuc ŋic guru gâcne â nemufâc‐jeŋic jopa jâpec ejaremeŋ? 24 Israe ŋic jaŋe hâcne ŋicfâcge erâ juraʒihuc juniŋte dope hutuŋ ejaremeŋ. Ehuc Wofuŋ go gahaczia Anutu‐jeŋic erâ jumeŋ. 25 O Wofuŋ Anutu, ʒi ine kiŋaŋŋicge â garikiŋfâcne jaŋere manasuhuc dâŋ mumeŋ i fosanaŋkeocte basanaŋkec, ehuc mumeŋ irec sâc ec. 26 Eme ʒâŋege kecʒiŋuc muhuc muaŋne rahuc junʒepieŋ: ‘Anutu Tâpiri Ɋuŋɋasaŋ Wofuŋ e Israere Anutu jukac.’ Ehame kiŋaŋŋicge Dawidi nore garikiŋfâc jaŋe ine gore maio juraʒihuc junʒepieŋ. 27 O Anutu Tâpiri Ɋuŋɋasaŋ Wofuŋ, Israere Anutu, go kiŋaŋŋicge dâŋ ʒiŋuc muhuc âzâcne jâutuc emeŋ hâcne: ‘No fic moc bagarepemu.’ Irec kiŋaŋŋicge no hâbihec erâ nunumu ʒi numu‐garekopac. 28 O Wofuŋ Anutu, go Anutu fârine, erâ dâŋge fârine jaha. Goki hâcne wiac biaŋne ʒi kiŋaŋŋicge no mupaŋke‐naremeŋ. 29 Irec manatec sâckeme kiŋaŋŋicge nore garikiŋfâc jambuŋ‐jopazemec. Iŋuc ejaretec jaŋe gore maioa juraʒihuc junʒepieŋ. O Wofuŋ Anutu, go gahac mupaŋkemeŋ irec jambuŋgezi kiŋaŋŋicgere ficko fohuc juzejec sanaŋ.”