TIMOTEO II
Paulo e Roma haeo mecne kâpâcwâruo ŋehuc papia i qâreŋkewec. Mârâc kâpâcwâru bapie ŋewec dameŋ ira mâcne, ʒâhec mocwâc rorâ Roma haeo bararâ kâpâcwâru bapie ŋewec, dameŋ ira papia namba 2 qâreŋkewec. Mârâcko Roma haeo momori moczi soŋaŋkehame fic omanao ŋewec. Ŋehame ŋic jaŋe iqickezo murâ sâcne iqickembiŋ. Ʒâhec ine kâpâcwâru fic jâmbâŋko râepie ŋehame Onesiforozi basaku jaha bâfuawec (gaŋ 1:15–17). Motecfâcne gâcne jaŋe mamac‐jeŋic behe‐fârembiŋ, Luka e mocjahazi ehec juwec (gaŋ 4:10–11). Kiazi Paulo dâŋte hefâreme ŋic moczi Paulore riŋ rorâ dâŋ mumu i aricne (gaŋ 4:16). Eme irec Timoteore ecneme ʒiŋuc qâreŋkewec: Go ŋeŋe ʒeʒepec boc mi ehuc biac norao warezemec (gaŋ 4:9 erâ 21). Erâ Mareko jowame mâmâc erao ranicte muwec (gaŋ 4:11).
Timoteozi biac ra fisirâ honeocmu me mâcne, irec maŋjahec erâ papia qâreŋkecnewec. Timoteo e Efeso haeoa huhame râecnewec. Ira mitire mumusifuc dâŋ boc haŋ bawec. Eme Timoteozi hehâmoocte giene bame ŋic gâcne jaŋe râsi boc ecnepie ʒâic busâqocko juhuc maŋne betaŋkezo ewec. Irec Paulozi ʒiŋuc qâreŋkecnewec: Go hâbige mi goroŋkezejec (gaŋ 1:6–8), â ʒârâ hâriŋ kâdoc rocmurâ mi takicguzejec (gaŋ 2:1–7 â 4:1–5). Erâ mitire mumusifuc ŋic jaŋere dâŋ bawahaocte â tatakic tâmiric mu bâuruec ejareocte qâreŋkecnewec (gaŋ 2:23–26). Ŋic iŋucnezi Anuture qânâ wâtuŋ mi herândiŋkeniŋmu (gaŋ 2:19). Gie i bahuc mitidâŋ qazucnekicne ira siŋkeocte (gaŋ 3:14–17) â miti muminʒiriŋkeocte irec dâŋ mâmâc qâmockecnewec (gaŋ 4:2).
Paulo e hâmohape miti gie i weniŋuc foocmu, iŋuc muhuc manabâc mi ewec. E mitire ʒiŋuc manawec: I ŋiczi mi niŋgiŋkeniŋmu (gaŋ 2:9), â mumusifuc ŋic jaŋere ʒiŋuc muwec: Fuŋne‐jeŋic taniŋkeocmu (gaŋ 3:8–9). Erâ hâmocte wâc mi hâwickewec. E Wofuŋtao qohota sanaŋkehuc ʒiŋuc muwec: Wofuŋ e hâmoc qâmiziewec (gaŋ 1:10), ehec ʒâic fâro manahuc juku hâmorâ juju‐ticnao fisizo (gaŋ 2:10–13), erâ Wofuŋte meonec eri hendiŋ rozo (gaŋ 4:6–8). Paulo e Wofuŋte mamanac iŋuc hâcne juhame Nerozi mume qambiŋ. E fuŋne ʒiŋuc manawec: Hâmoc dameŋ‐nane maickekac, iŋuc manahuc papia ʒi hâcne mâmâzoc dâŋ qâreŋkewec. Gie‐ticne â papia qâqâreŋ‐ticne ira hâcne tarawec. Baweme‐ticnezi hâcne Timoteore papia II qâreŋkewec.
1
Jambuŋdâŋ
Paulo no Anuture micte, Kristo Jesuzi juju bâfuawec irec biŋedâŋ muiŋnepemurâ Kristo Jesure aposolo epozi Timoteo motec biaŋ‐nane gore papia ʒi qâreŋkekopac. Anutu Mamac â Wofuŋ‐nâŋec Kristo Jesu eraonec aki anonoc, uruc jauŋ â wama gorao fotâcnerâ fozejec.
Timoteo mamanasiŋ fârine focnewec
Mamac ŋosafâc‐nane jaŋe maŋfâsâc juhuc tuczi tuc Anuture kiŋaŋ qawarekupie ɋâric‐jeŋic noni iŋuc jaha eekopaczi daŋge âzâcnehuc nunumuo ʒuʒuhuc ŋafe furec manasucguhuc juekopac. Apo 23:1; 24:16; Fil 3:5 Nore ki busâqoc emeŋ, irec manasurâ honecguhuc bubiaŋ sâko manapemurâ enareekac. Erâ mamanasiŋ fârine fogarekac, irec wâc manasuekopac, mamanasiŋ i hâcne mimige Loisi â neŋgocge Eunike jaherao foweczi gorao wâc fotâcnewec fokac i manakopac. Apo 16:1
Sasanaŋhec erâ mitire juju gie bazo
Eme no irec hâcne manasu‐gararâ mupe: No menane qizecgao râepe Anutuzi jambuŋ tahacguwec i hehâroŋketec ʒocne fuazejec. Tes I 5:19; Tim I 4:14 Ehuc ʒiŋuc manasuzemec: Anutu e hâbi‐nâŋec goroŋkeocte mâro mi nârewec, tâpirihec â maŋjauŋhec â maŋsowahec enaŋte nârewec. Rom 8:15 Irec go Wofuŋ‐nâŋecte biŋe mutaniŋkecmurâ mimi gaŋgaŋ mi ezemec, erâ kâpâcwâru ŋicticne nore dâŋ mucmurâ acmeruŋ wâc mi ezemec. Go Anutuzi tâpiri gareme sâc no qâsuecnurâ Biŋebiaŋte erâ ʒârâ hâriŋ faio juzemec. Rom 1:16 Eki hâcne bâpiaŋ‐nâporâ tiridâŋ‐ticnezi hefârec‐nâpowec. I biaŋ‐nâŋecte mâcne, e jahac maname fowecte aki anonoc‐ticnere erâ iŋuc enârewec. I mârâc jaha jâmbâŋ Kristo Jesure erâ biŋe qanârekicne. Tit 3:5 10 Eme fârine fufua ine dameŋ ʒi bâbâpiaŋ‐nâŋec Kristo Jesu wahame fua tâcnewec. Eki hâcne hâmoc qâmizierâ juju â wiac fofo sanaŋ Biŋebiaŋko bajaŋgeŋke‐nârewec. Rom 16:26; Heb 2:14; Kor I 15:55, 57 11 Eme no irec biŋe mumu â aposolo â qaqazu jupemurâ munarekicne. Tim I 2:7
Mitire kadahe aimuŋ soŋaŋkezo
12 No irec hâcne ʒârâ hâriŋ faio juekopac, ehuc mi mimieekopac. No manasiŋkeekopac ere maŋjahec mi eekopac, aricne, no ʒiŋuc manapaŋkeekopac, e tâpiriheczi ʒeŋaŋ‐nane sâcne soŋaŋke‐narehame dameŋ sâko maickezokac. 13 Dâŋ fârine irec biri‐ticne qazu‐garepo ijaha bâjâpezemec, i Kristo Jesu manasiŋkehuc â maŋzi jauŋkehuc iŋuc ezemec. Tim I 6:3; Tit 2:1 14 Tiri Mâro maŋnâŋecko juekac eki neŋgoc ŋegarehame miti kâdoc qârârie‐garekicne, i aimuŋ soŋaŋketec fogarezejec. Tim I 6:20
Onesiforo ere dâŋ
15 Asia mâreŋko behecnu‐fârembiŋ i manameŋ, Figelo â Hemogene jahe mâmâc. Tim II 4:16 16 Wofuŋ e Onesiforo ere wiacfâc maŋuruc qajarezejec. Mamac‐jeŋiczi kâpâcwâru ŋic nore mi takickeha bubiaŋ hati qanarehuc juwec. 17 E Roma haeo fisirâ ʒoɋac basacnuku bâfuacnuwec. 18 Wofuŋzi manaha dameŋ sâko Wofuŋtao uruc jauŋ bâfuazejec. E Efesoo wâc kiŋaŋ qaqa gie wemo afecne bawec i go gahac hone manac emeŋ. Jud 1:21

1:3: Apo 23:1; 24:16; Fil 3:5

1:5: Apo 16:1

1:6: Tes I 5:19; Tim I 4:14

1:7: Rom 8:15

1:8: Rom 1:16

1:9: Tit 3:5

1:10: Rom 16:26; Heb 2:14; Kor I 15:55, 57

1:11: Tim I 2:7

1:13: Tim I 6:3; Tit 2:1

1:14: Tim I 6:20

1:15: Tim II 4:16

1:18: Jud 1:21