APOSOLO JAŊERE BINAŊ
Aposolo jaŋere binaŋ papia i Lukazi qâreŋkewec. Ere miti papia jajahec fokopirec hâcne, Jesure binaŋ â aposolo jaŋere binaŋ. Luka e papia jahec i âgo‐ticne Teofile ere biŋe qâreŋ‐jofawec. Luka tâmiric muzac aposolo jaŋere binaŋ paŋʒâic mi mana‐hâmonʒapeŋ. Erâ Luka e aposolo gâcne jaŋere binaŋ boc mi qâreŋkewec. Qanaŋ Petoro â Johane jahere qâreŋkewec, izi Paulo erao fotâcnerâ binaŋ‐ticne ʒuhuckewec. Paulozi miti muiŋneme mâreŋne mâreŋne haŋ barawec, irec binaŋ hâcne ʒuʒuhuc jaha qâreŋkewec. Binaŋ tucne i ŋic gâcne jaŋere mickonec manarâ qâreŋkewec, â tucne ine e jahac wiac hone manac ewec sâc qâreŋkewec. Paulo e miti kiŋaŋ rame bâjâpehuc wiac ebac ewec â miti muwec i hone manac ewec hâcne. Bâbâfuac epic ine Paulozi miti kiŋaŋ ʒâʒâŋiŋ moc rawec ira raku Troa haeo fisiwec ira. Eme bâbâjâpec raku Filipi haeo ine Lukazi ŋeha Paulo e fotâcnerâ rawec. Juku dameŋ mocko Jerusalemko risieocte Luka jowame mâmâc rapic. Eme ira Paulo kâpâcwâru barâ Kaisarea haeo barapie jara 2 ŋehuc juwec. Ehame Luka e qâterâ ijaha juwec. Juku Paulo wokeo râerâ Roma haeo barapie Luka e woke ijaha Paulohec mâmâc raku Roma haeo fisipic. Mâmâc jupic irec binaŋ hâcne ninic jaha qâreŋkewec. Eme Roma haeo fisikicne ira bâtâcnerâ behewec. Wemocte Paulore binaŋ mi qâreŋke tarawec irec fuŋne kâuc baŋgopeneŋ.
Lukazi aposolo jaŋere binaŋ qâreŋkewec i honepene ʒâʒâŋiŋko fâuckekac, ehuc neŋgocne sâko jajahec fuakac ine ʒiŋuc: Qanaŋ Jesure kikefuŋ Jerusalem haeo fuawec. Eme opâ ruac guru jaŋe Mârozi tâpiri jareme mitire hata bâfuarâ Jesure Biŋebiaŋ bâiŋ basawec epie Palestaiŋ mâreŋ sâckerâ fowec, erâ wâc Siria mâreŋko rarâ Antiokia haeo ira fua ɋârâŋkeme mitire hae qizec sâko namba 2 i Antiokiazi ewec. Binaŋ izi Aposolo gaŋ 1 irecnec domarâ feku gaŋ 12 ira fisikac. Eme binaŋ irec maŋnao gie bapa ŋic mai fuaŋgopieŋ ine Petoro â Johane â Stefano â Filipo erâ gâcne moc moc.
Aposolo jaŋere binaŋ irec dâkâ sâko namba 2 ine Paulo â babaficfâcne jaŋe miti kiŋaŋ gie bapie miti mâreŋ sâc rawec irec dâŋ binaŋ hâcne fokac. Siria mâreŋko Antiokia hae irec kikefuŋ guru jaŋe neŋgoc ŋejarepie miti kiŋaŋ rambiŋ, erâ Jesure ʒâŋe biŋe musawepie mâreŋ sâko 3 fusucmawec, Asia mâreŋ masune, Makedonia, Grik mâreŋ erâ wâc ŋicwofuŋ sâko ere hae qizec, Roma haeo rarâ fua ɋârâŋkewec. Binaŋ biri‐ticne gâcne ʒiŋuc fokac:
Paulo e Banabahec miti kiŋaŋ bâtâcnerâ rapic (gaŋ 13–14).
Paulo e Silahec miti kiŋaŋ arec 2 rapic (gaŋ 15 botâŋne—18).
Paulo e miti kiŋaŋ arec 3 rawec (gaŋ 18 botâŋne—20).
Paulo e Jerusalem haeo rame kâpâcwâru bambiŋ (gaŋ 21–26).
Paulo e wokeo ferâ hâwecko rahuc juku Roma haeo fisiwec (gaŋ 27–28).
1
Jesu e motecfâcne mâzoc‐joparâ fewec
O Teofilo, no mârâc dâŋ qâreŋke‐garepo, ine Jesuzi gie bawec â miti muwec irec dâŋ binaŋ sasawa egarepo. Luk 1:3 E gie‐ticne fuŋkerâ baraku dameŋ‐ticne maickeme Tiri Mârozi ecneme aposolo rowosâec‐jopawec jaŋe micrâfâ‐ticne jaza tararâ sambâŋko fewec, irec binaŋ hâcne qâreŋke‐fârepo. Luk 6:13 E ʒâic manaku hâmorâ mocwâc ɋârerâ jaŋe hâcne ʒoaŋ gie bapa 40 fua soŋ ejarehuc fuŋne‐ticne bajaŋgeŋkeme hone manac embiŋ, â Anuture uucmaŋ irec dâŋ jaza mutâc ewec.
Erâ jaŋehec ŋec domac ehuc dâŋ ʒiŋuc jazawec: “Ŋoŋe Jerusalem hae jâpec mi behenʒepieŋ, Mamacte biŋedâŋ ŋazape manambiŋ, i fârinehec eocte ira woŋec junʒepieŋ. Apo 10:41; Joh 15:26; Luk 24:49 Johane e opâ rua‐ŋarewec, ʒi ine dameŋ mi ʒorahame Tiri Mâro rua‐ŋarezo.” Mat 3:11 Iŋuc mume, tumaŋnerâ jumbiŋ jaŋe ʒiŋuc muhuc wiocnembiŋ: “Wofuŋ, go dameŋ ira hâcne Israe ŋic qâzuc‐nâpotec mocwâc nâŋe nâŋâcne ŋicwofuŋhec erâ junaŋmu me?” Luk 24:21; Apo 3:21 Mupie ʒiŋuc jazawec: “Mamac e tâpiri‐ticnere erâ dameŋ ʒoric qândâŋ bawec fokac i ŋoŋe mamanane mi ekac. Mar 13:32 Mocjaha Tiri Mârozi ŋoŋerao waharâ tâpiri bâfua‐ŋareme biŋe mumufâc‐nane eniŋmu. Ehuc Jerusalem haeo bâtâcnerâ miti‐nane Judaia â Samaria mâreŋko murâ murakupie mâreŋ qaŋeŋne sâcke‐fâreocmu.” Dâŋ iŋuc murâ ʒâŋe fai‐jeŋicko afeckerâ fewec. Fehame karoraczi bâsoŋkeme basambiŋ. Mar 16:19; Luk 24:51; Joh 6:62 10 Eme sambâŋko fehame firâ râqârehuc domahapie ŋic jajahec ŋaqi qaŋqaŋhec mi jaŋerao fuarâ domazepirec i! Luk 24:4 11 Erâ ʒiŋuc jazapic: “Galilaia mâreŋkonec ŋicbureŋ, ŋoŋe wemocte sambâŋko fihuc jaha domaŋgopieŋ? Jesu ŋoŋe honehapie behec‐ŋoparâ sambâŋko fekac, eki hâcne juku iŋuc jaha wahazokac.” Mat 26:64; Luk 21:27; Tim I 3:16; Bar 1:7
Motec jaŋe risierâ nunumu gie bambiŋ
12 Eme aposolo jaŋe Oliwa tikionec risie waharâ raʒimicnao Jerusalem hae ŋewec ira raʒimbiŋ. Sawane i sabata hombaŋko hata rarane irec sâc. Luk 24:50–53 13 Raʒirâ haeo ferâ ŋeŋe juju ehuc jumbiŋ fic ira fembiŋ. Jumbiŋ ine ʒiŋuc: Petoro â Johane, Jakobo â Anderea, Filipo â Toma, Batolomaio â Mataio, Jakobo Alifaiore ŋokâ, Simoŋ Ʒelote, erâ Juda Jakobore ŋokâ. Luk 6:13–16 14 Ŋic i jaŋe hâcne maŋ mocjaha erâ nunumu gie ʒuʒuhuc jaha bahuc jumbiŋ. Iŋuc ehapie Jesure neŋgoc Maria â ŋokac gâcne â Jesu ɋafâc‐ticne jaŋe mâmâc bafic‐jopambiŋ. Apo 2:1; Joh 7:3–5; Mat 13:55
Judare âkehoc bâfuambiŋ
15 Dameŋ ira Jesure qâjâpecfâc ʒare‐jeŋic 120 qâririŋ iŋuczi tumaŋnerâ ŋehapie Petoro e ŋondeŋ‐jeŋicko faharerâ dâŋ ʒiŋuc jazawec: 16 “Âgo bureŋ, Juda râsi jowac‐jopame Jesu rombiŋ ere dâŋ Tiri Mârozi Dawidi mic ba afec ecneme mu qâreŋ ewec i wemocko mâc fozac. Mi Mâ 41:9 17 Juda e nâŋâcnaonec hâcne, â miti gie i e mâmâc mucnekicne. 18 Eme ŋic eki ʒika furizi mâreŋ kitâcnecnewec ira ra qizeczi qârisic hurâ bune qâfâuckeme hone waha‐fârewec. Mat 27:3–10 19 Eme biŋe i Jerusalem haeoneczi mana‐fârerâ mâreŋ irec ʒâŋe Akedama mumbiŋ, nâŋâcne dâŋko Ʒikamâreŋ. 20 Miti mânecko ʒiŋuc hâcne qâreŋkekicne fokac:
‘Hae‐ticne tuhu fuazejec,
â ficticnao ŋic moc mi juzejec.’
Erâ moc ʒiŋuc:
‘Mafa‐ticne i furunezi rauckezejec.’ Mi Mâ 69:25; 109:8
21 Eme Jesu ŋondeŋ‐nâŋecko jume ju ecnepene ŋic gâcnezi qâsuec‐nâpombiŋ, Joh 15:27 22 ehuc Johanezi Jesu Miti Opâ ruacneme gie‐ticne fuŋkewec dameŋ ira erao ʒuhuckerâ bâjâpehuc juhapene sambâŋko fewec, ŋic iŋucne moczi fuarâ bafic‐nâpome, Jesu hâmockonec faharewec irec biŋe mupene haŋ bazejec.” 23 Petorozi iŋuc jazame ŋic jajahec bâfuac‐jofambiŋ. Moc ʒâŋene Josefe, Basaba mucne jumbieŋ, ʒâŋene moc Jusito, erâ âgone Matia. 24 Bâfuac‐jofarâ ʒiŋuc muhuc numumbiŋ: “O Wofuŋ maŋ hohone, go ŋicjahec ʒi jaheraonec wenimoi bâwosâekomec i nâwotutec mucnepene Joh 2:24, 25; 6:70 25 Juda miti â aposolo gie‐ticne hetararâ e jahacne hatao rawec ere jujutacko juzejec.” 26 Iŋuc numurâ miti ɋâsâi qapie Matia âke fuame aposolo 11 jaŋerao ʒuhuckewec. Muq 16:33

1:1: Luk 1:3

1:2: Luk 6:13

1:4: Apo 10:41; Joh 15:26; Luk 24:49

1:5: Mat 3:11

1:6: Luk 24:21; Apo 3:21

1:7: Mar 13:32

1:9: Mar 16:19; Luk 24:51; Joh 6:62

1:10: Luk 24:4

1:11: Mat 26:64; Luk 21:27; Tim I 3:16; Bar 1:7

1:12: Luk 24:50–53

1:13: Luk 6:13–16

1:14: Apo 2:1; Joh 7:3–5; Mat 13:55

1:16: Mi Mâ 41:9

1:18: Mat 27:3–10

1:20: Mi Mâ 69:25; 109:8

1:21: Joh 15:27

1:24: Joh 2:24, 25; 6:70

1:26: Muq 16:33