9
Wofuŋzi Saulo fuacnewec
(Apo 22: 6-16” 26: 12-18)
Saulo e Wofuŋte kikefuŋ râsi ejarehuc ima bacjopaocte maŋšoc-ticne gâmâc gâfâŋ wefuhuc domawec. Ehuc ra taha bapa sâkorao mume Damasko haeo Judaŋic jumbiŋ jaŋere papia qâreŋkerâ râcnewec. Râcneme rorâ ocna hata ɋârio moc jupie bâfuac-joparâ ŋic mecne ŋokac mecne mejeŋic qarâ Jerusalem haeo bacjopa wareocte rawec. Izi raku Damasko hae bâqiŋkezo ehame sambâŋkonec šoc tatamaczi uŋ herâ waha âeckewec. Âeckeme mâreŋko rândiŋke qarâ fohuc dâŋ moc šiŋuc manawec: “Saulo, Saulo, go wemocte nu jâpec enarehuc juekic?” Mume Saulozi wiohuc muwec, “Wofuŋ go mo?” Eme muwec, “Nu jâpec enarehuc juekic Jesu no hâcne. Go faharerâ haeo ratec ira wiac ecmurâ dâŋne gazaniŋmu.” Eme ŋic ehec jumbiŋ jaŋe dâŋwe tâmiric mâc fâsâerâ domambiŋ, jaŋe dâŋ sawa manambiŋ, â ŋic ine moc mi honembiŋ. Eme Saulo e faharerâ šâŋe fiocte fi qeruruc ewec. Iŋuc eme ŋicfâcne jaŋe menao rorâ Damasko haeo barambiŋ. Eme ira šoaŋ gie bapa jahec â moc tiŋtuŋ jaha fohuc nânâ opâ mi nâwec.
Ananiazi Saulo Miti Opâ ruacnewec
10 Damasko haeo Jesure qâjâpec moc juwec, šâŋene Anania, e Wofuŋzi maŋko fuac ecnehuc wiracnewec, “Anania.” Eme muwec, “Wofuŋ no ši.” 11 Mume Wofuŋzi šuhuckerâ šiŋuc muwec: “Go hata šâŋene Dândâŋne mueŋgopieŋ ira rarâ Judare ficko ferâ ŋic moc šâŋene Saulo, Taso haeonec, e bâfuazemec. Manakic, e numu-narehuc fokac. 12 Erâ maŋticnezi wiac šiŋuc honejec: Ŋic moc šâŋene Anania erao fisirâ šâŋe fifihec eocte mene qizecnao râejec.” 13 Wofuŋ e dâŋ iŋuc muhuc âzâcneme Ananiazi šiŋuc muwec: “Wofuŋ, ŋic ere mâretec mupie manaekopac, e fuŋfuŋfâcge Jerusalem haeo ba imac wemo afecne ejareekac. 14 Erâ šira iŋuc jaha šâŋege riwaseckeeŋgopeneŋ nâŋe repac-nâporâ bacnâpo raocte taha bapa micne jaŋe mucnembiŋ.” 15 Mume Wofuŋzi šiŋuc âzâcnewec: “Go sifu rac, ŋic e mefâro-nane, eki hâcne šâŋe biŋe-nane ŋic qâpuc â ŋicwofuŋ â Israe guru jaŋerao barahuc juzejec. 16 Iŋuc ehame no šâŋe biŋe-nanere erâ šârâ hâriŋ faio juocte qazucnepemu.” 17 Eme Anania e rarâ fic mukicne ira ferâ Saulore qizecko meticne râehuc muwec, “Saulo qomâ-nane, Wofuŋ Jesu hatao fua-garewec, eki hâcne sorecnume warekopac, go šâŋe fifi ehuc Tiri Mârohec ecmurâ mukac.” 18 Iŋuc muhuc âzâcneme izia šâŋenaonec wiac gagara tinac wahame šâŋe fifi erâ faharerâ mume Miti Opâ ruacnewec. 19 Ehame nânâ nârâ sanaŋkewec.
Saulo miti gie fuŋkeme râsi ecnembiŋ
Saulo e Jesure kikefuŋ Damasko haeo jumbiŋ jaŋehec piticne jurâ 20 izia biac Judaŋic jaŋere mitificko ferâ Jesure biŋe muropiehuc kecšiŋuc jazawec: “Jesu e Anuture Ŋokâ.” 21 Iŋuc jazame manarâ quŋkecnehuc šiŋuc mumbiŋ: “Jerusalem haeo šâŋe i hâcne riwaseckepie ima bacjopaku šira iŋuc jaha repac-joparâ taha bapa micne jaŋerao bacjopa raocte warewec, izi weniŋuc erâ hec hetikic ekac?” 22 Eme Saulo e samandiŋkerâ, Jesu e Kristo jâmbâŋ, irec dâŋfuŋne muritu-hâmohuc Damasko haeo Judaŋic jumbiŋ jazame manapie guguru ewec. 23 Iŋuc eku Judaŋic jaŋe Saulo qaniŋte mumockembiŋ. 24 Mumockepie Saulozi biŋe manarâ juhame jaŋe qaniŋte haesac motâcko ŋafe furec soŋsoŋ domambiŋ. 25 Iŋuc epie Jesure qâjâpecfâc jaŋe ŋafeo sasacko ŋiherâ sacrâpeo âke suepie hurâ wisewec.
26 Eme raku Jerusalem haeo fisirâ Jesure kikefuŋ jaŋerao šuhuckeocte mume araŋ bacnembiŋ. Ehuc e Jesure motec ewec i manapie Jâmbomac mi ewec. 27 Eme Banabazi âgo ecnehuc aposolo jaŋerao jowa rarâ, Wofuŋzi Saulo hatao fuacnerâ dâŋ âzâcneme Damasko haeo Jesure biŋe mutaniŋkewec, irec dâŋ binaŋ ejarewec. 28 Eme jaŋehec Jerusalem haeo ŋeŋe juju ewec. 29 Ehuc Wofuŋte šâŋeo âtesiŋnehuc ŋic miti acmeruŋ tâmiric jazawec. Eme Judaŋiczi Grikdâŋ mumu jaŋehec wâc mitire muc manac ehuc dâŋ bâbârisiec embiŋ. Eme ŋic i jaŋe hâcne qazo mupie 30 âgofâcne jaŋe manarâ Kaisarea haeo jowa hurâ ŋepie raku Taso haeo fisiwec.
Opâ ruac jaŋe wamao jumbiŋ
31 Eme opâ ruac kikefuŋ Judaia â Galilaia â Samaria mâreŋko jurambiŋ jaŋerao wama fuawec. Wamao juhuc hehešakiec erâ qaboc-jeŋic qapie hume Wofuŋte maio rumehuc jumbiŋ. Ehuc Tiri Mârozi neŋgoc ŋesiŋ ŋejarehame miti soka ŋedâmârec eme guru-jeŋic ɋâriŋ qawec.
Petorozi ŋic moc sahac ɋiɋic bawec
32 Petoro e hata juku Jesure fuŋfuŋfâc Lida haeo jumbiŋ jaŋerao wâc fisiwec. 33 Erâ ira ŋic moc honewec, šâŋene Ainea, e puriŋ erâ fohuc juha jara 8 ewec. 34 Eme Petorozi šiŋuc âzâcnewec: “Ainea, Jesu Kristozi ɋiɋicne bacgukacte faharerâ fofoge gahac bâpiaŋkec.” Mume izia faharewec. 35 Iŋuc eme Lida â Saroŋ heaoneczi honerâ maŋjeŋic bârisierâ Wofuŋte kikefuŋ embiŋ.
Petorozi Tabita bâɋârewec
36 Jope haeo opâ ruac naru ŋokac moc juwec, šâŋene Tabita, Kâtedâŋko Sâec. E gâcne ehâmo-jarehuc bâmec bocjaha bajarehuc juwec. 37 Eme Petoro mâreŋ ira juhame Tabita e huc fuacneme hâmowec. Hâmome qâŋɋâŋ-ticne šurerâ ficmaŋne mocko baferâ râembiŋ. 38 Lida i Jope hae bembeŋko ŋewecte opâ ruac jaŋe Petorore biŋe manarâ ŋic jajahec erao sorec-jofapie rarâ šiŋuc âzâcnepic: “Go jowacgupere nâŋere haeo biac ranaŋ.” 39 Eme Petoro e manarâ šawieme jahehec rambiŋ. Ra fisime qâŋɋâŋ fowecko jowa fembiŋ. Feme ŋokac hozec sasawa jaŋe e orâŋkerâ ki busâqoc ehuc Tabita ɋâricne juhuc ŋaqi ɋâtâ-jarewec i jâutu-fârembiŋ. 40 Eme Petorozi ejareme hufârepie dieŋzi herâ numuwec. Numu tararâ qâŋɋâŋ maickeme šiŋuc âzâcnewec: “Tabita go faharec.” Mume šâŋe fitâcnehuc Petoro honerâ fahare ŋewec. 41 Ŋehame Petorozi menao rohuc âzâcneme fahare domawec. Eme opâ ruac â hozec wira-jareme fepie Tabita ɋâricne bârisie-jarewec. 42 Eme irec biŋe Jope haeo haŋ bame bocjahazi Wofuŋtao qohotambiŋ. 43 Eme Petoro e ŋic moc šâŋene Simoŋ, becsahac bapa, ere ficko dameŋ šošoricne ŋeŋe juju ewec.