4
1 “Basaŋ mâreŋte bulimakao* I Basaŋ ŋokac jaŋere mukicne. Samaria tikio jueŋgopieŋ,
ŋoŋe dâŋ ʒi mananiŋ!
Ŋoŋe ŋic qarâ suriŋne fific bacjopaeŋgopieŋ,
â hapetac jaŋe imac‐jopaeŋgopieŋ,
erâ ŋowefâc‐ŋeŋic ʒiŋuc jazaeŋgopieŋ:
‘Waiŋ opâ bawarepie nanaŋ!’
2 Ŋoŋere hâcne Wofuŋ Anutuzi tiri juju‐ticnere erâ ʒiŋuc mupaŋkewec:
Manaŋgopieŋ, dameŋ moc maic‐ŋopaocmu
ira hawicko rocŋoparâ bacŋopa raniŋmu,
jei, ʒâŋetucfâc‐ŋeŋic mâmâc rocjopa‐fâreniŋmu.
3 Eme ŋoŋe sac hawec sâc râpeo soŋsoŋ hufâreniŋmu,
ehame tuŋŋopapie Herimoŋ tikiopec ranʒepieŋ.”
Wofuŋte dâŋ iŋuc.
Israe ŋic jaŋe Anuture bâbâtiŋ gie qâsuahuc mi biaŋkembiŋ
4 “Bete haeo rarâ qaqatara gie ʒuhuckerâ baniŋ,
Giligali haeo rarâ qaqatara bâŋɋârâŋkehuc eniŋ,
furic sâc taha bâzi‐ŋeŋic rikeniŋ,
erâ ʒoaŋ jahec â moc tarame sâc
teŋkonec wâŋŋeŋic râeniŋ!
5 Daŋge taha râeniŋte poroŋ goreŋhec rikeniŋ,
erâ buafec faio taha rârâe‐ŋeŋicte dâŋ musokaniŋ.
Israe ŋic ŋoŋe iŋuc hâcne eniŋte
boc aŋac‐ŋopaekac.”
Wofuŋte dâŋ iŋuc.
6 “Noni hâcne mupe hae‐ŋeŋic sâc nânâ poroŋ babasa fuame
nânâ wiac‐ŋeŋic omae‐fârewec,
ŋoŋe ine sifu norao mi risiembiŋ.”
Wofuŋte dâŋ iŋuc.
7 “Noni hâcne qa roro dameŋte mosa jahec â moc
juwicnao hoe sakare‐ŋarepo.
Ehuc mupe hae mocko hoe hewec â hae moc i mâc fowec,
ehame giegaŋ moc i hoezi bâgunuckewec,
â giegaŋ moc i mâc fohuc hâmo ɋaŋac ewec.
8 Iŋuc fuame hae 2 me 3 irec rune jaŋe hae mocko
opâ nâniŋte rarâ nâpie mi gapec‐jopawec.
Eme ŋoŋe sifu norao mi risiembiŋ.”
Wofuŋte dâŋ iŋuc.
9 “Noni mupe jacgoŋ‐ŋeŋic ʒararaŋ ʒahuc hâmo ɋaŋac ewec,
ehuc nânâ â waiŋ gie‐ŋeŋic imacke‐ŋarepo,
ehame nemuja â oliwa jâc wiac‐ŋeŋic i ɋirikiŋzi nâfârewec,
ŋoŋe ine sifu norao mi risiembiŋ.”
Wofuŋte dâŋ iŋuc.
10 “No mupe Aigita mâreŋko huc hâmoc fuawec,
sâc ijaha mupe ŋoŋe fua‐ŋarewec,
no ŋicmotecfâc‐ŋeŋic ʒikazi jopa sipiric ejarepo,
ehuc becâsicfâc‐ŋeŋic ŋowac rorâ bacjopa rapo,
erâ ŋeŋe juju embiŋ toma ira mupe
âsu fuarâ sâke‐ŋeŋicko fewec,
ŋoŋe ine sifu norao mi risiembiŋ.”
Wofuŋte dâŋ iŋuc.
11 “Anutu noni mârâc jaha Sodom â Gomora hae ima bacjofapo,
irec sâc jaha ŋondeŋ‐ŋeŋicko ima sâko bâfuapo.
Iŋuc eŋarepe ŋoŋe ʒockonec tucne moc rokicne irec sâc embiŋ,
erâ sifu norao mi risiembiŋ.”
Wofuŋte dâŋ iŋuc.
12 “O Israe ŋic, no irec hâcne wiac mukicne eŋarepemu,
eme iŋuc eŋarepemure ŋoŋe Anutu‐ŋeŋic nore maio
fuaniŋte ʒawienʒepieŋ.”
13 Manaŋgopieŋ, tiki â mâŋâŋ bâfuac‐jofawec,
erâ maŋ mamana biri‐ticne ŋic mufua‐jareekac,
ehuc mume fureekac â ŋafeekac,
erâ wâc mâreŋ facne sâc âterâ raekac,
e Anutu Tâpiri Ɋuŋɋasaŋ Wofuŋ,
ʒâŋe‐ticne iŋuc fokac.