1 Eme Dariusizi maname sâckeme soŋaŋ micne 120 râec‐jopa rakume uucmaŋ‐ticne sâcke‐fârembiŋ. 2 Ehame jaŋere guriŋ bapa ŋic jahec â moc ʒuhuckerâ râec‐jopakicne jaŋeraonec moc Danie hâcne. Eme ŋicwofuŋ neneŋ boc ecnenʒipiŋte soŋaŋ micne i jaŋe gie‐jeŋicte binaŋ ŋic jahec â moc jaŋe bajareniŋte jazakicne. 3 Danie eki ine mamana sâkohec juwecte guriŋ bapa ŋic â soŋaŋ micne siric‐jopa‐fârewec; irec ŋicwofuŋzi uucmaŋ‐ticnere fekicne âkendâŋneocte manasuwec. 4 Eme guriŋ bapa ŋic â soŋaŋ micne jaŋe Danie gie‐ticnere bâbâsifuc moc bâfuarâ dâŋgieo râeniŋte manasumbiŋ; erâ e gie‐ticne bâbâsifuc tâmiric biaŋne bâhâmowecte bahac‐ticne basambiŋ. 5 Ehuc ʒiŋuc mumbiŋ: “Nâŋâc Danie keci ere dâŋ moc mi bâfuanaŋmu, mâc Anutu‐ticnere sâcmutâc dâŋzi weniŋuc mutâcnecneekac irec fuŋne manahuc bâfuanaŋmu mecne.”

6 Eme guriŋ bapa ŋic â soŋaŋ micne jaŋe quruŋ herâ ŋicwofuŋtao fisirâ kecʒiŋuc mumbiŋ: “O ŋicwofuŋ Dariusi, jusanaŋkerâ juzemec! 7 Go mâreŋ sâko qâhâckerâ guriŋne baekic irec maŋnao guriŋ bapa ŋic â soŋaŋ fekicne wahakicne, erâ wâc kansol â dâŋsoŋaŋ juŋgopeneŋ nâŋe sasawa maŋ mocjaha erâ dâŋ moc gazanaŋte wareŋgopeneŋ. Go dâŋ kecʒiŋuc mupaŋkerâ papiao qâreŋketec mumutâc dâŋ ezejec: ‘Ŋafe ʒoaŋ 30 irec maŋnao ŋic moczi wiac mocte numuzo murâ no mi numu‐narehuc nemu moc me ŋic moc numucneocmu e laioŋ jaŋere nombâŋko behepie huzejec.’ 8 Irec ŋicwofuŋ, go mumutâc dâŋ i âkendâŋnerâ gahacne mezi ʒâŋe qâreŋge râetec mi hehetâmirene ezejec, Mede â Perisia ŋic nâŋâcne hata sanaŋ mi qâqâsuane fokac irec sâc hâcne.” 9 Eme ŋicwofuŋ Dariusi e mumutâc papiao ʒâŋe qâreŋ‐ticne râewec.

10 Mumutâc papiao ʒâŋe qâreŋ fuame basanaŋkekicne, dâŋ i Daniezi manarâ ficticnao rawec. Ficticne feŋgaŋne moc ira maŋne moc fowec irec qâqâtâc kataŋ Jerusalem haeopec qâtiŋnekicne domawec. Eme e ira ʒoaŋ sâc arec 3 dieŋzi herâ Anutu numucnehuc daŋge âzâcne jujec, irec sâcko ewec. 11 Danie Anutu‐ticne maickehuc numu wâwâsic ecnehuc juhame ŋic keci jaŋe gasacke rarâ bâfuambiŋ. 12 Izi ŋicwofuŋtao fisirâ mumutâc dâŋ irec ʒiŋuc muhuc âzâcnembiŋ: “O ŋicwofuŋ, go mumutâc dâŋ ʒiŋuc râemec: Ŋic moczi ʒoaŋ 30 irec maŋnao wiac mocte numuzo murâ ŋicwofuŋ no mi numu‐narehuc nemu me ŋic moc numucneocmu, eme laioŋ jaŋere nombâŋko behezo. Erâ dâŋ i musanaŋkehuc ʒâŋe qâreŋge mi râemec me?” Mupie ŋicwofuŋzi muwec: “Dâŋ i basanaŋkekicne fokac, Mede â Perisia ŋic nâŋâcne hata sanaŋ mi qâqâsuane irec sâcko basanaŋkekicne.” 13 Eme jaŋe ŋicwofuŋ dâŋ ʒiŋuc bâtikiecnembiŋ: “Juda mâreŋkonec jowac‐jopa warekicne jaŋere guruonec ŋic mac ʒâŋene Danie e ŋicwofuŋ go mana wahacguhuc, ʒâŋe qâreŋge râehuc mumutâc dâŋ basanaŋkemeŋ i mâmâc maname wawahane ekac, ehuc ʒoaŋ sâc arec 3 nunumu gie baekac.”

14 Ŋicwofuŋ e dâŋ i manarâ bune mâretec sâqorewec. Ehuc Danie sisipirickonec bataraocte mamanasu gie bahuc juhame ʒoaŋ huwec. 15 Eme ŋic keci jaŋe ŋicwofuŋtao ʒocnehec fisirâ âzâcnembiŋ: “O ŋicwofuŋ, go manac, Mede â Perisia ŋic nâŋâcne hata sanaŋ ʒiŋuc fokac: Ŋicwofuŋzi mumutâc me mumupaŋ dâŋ moc âkendâŋneocmu i hehetâtiene mi fokac.”

16 Eme ŋicwofuŋzi mume Danie ra ro baware laioŋ jaŋere nombâŋko behepie huwec. Ehame ŋicwofuŋzi Danie ʒiŋuc âzâcnewec: “Anutuge, kiŋaŋ ʒuʒuhuc jaha qacnehuc juekic eki ŋezicguzejec.” 17 Iŋuc muha qânâ moc qârândiŋkepie ra nombâŋ micne ŋebâzickeme ŋicwofuŋzi sâfâ fitec qambiŋko e jahacne maqâreŋ heutuckeme fowec, moczi moc Danie wiac iŋuc me iŋuc ecnenʒipiŋte. 18 Ehame ŋicwofuŋzi erific‐ticnao rarâ ŋafeo nânâ mi nâwec, ehuc ŋokacfâc‐ticne jaŋeraonec moczi erao fezacte aka hejarewec, erâ guŋte wâc mi ecnewec.

19 Hae fure pârâckeme izia ŋicwofuŋzi faharerâ laioŋ jaŋere nombâŋko ʒocnehec rawec. 20 Erâ Danie nombâŋko ŋewec nombâŋ i bâqiŋkehuc busâqoc maracko owa ruruckerâ wiracnehuc muwec: “O Danie, Anutu jujunere kiŋaŋ qaqa, Anutu ʒuʒuhuc jaha kiŋaŋ qacneekic e sâcne ŋezicgume laioŋ jaŋe akicgumbieŋ me?” 21 Eme Daniezi ŋicwofuŋ ʒiŋuc âzâcnewec: “O ŋicwofuŋ, jusanaŋkerâ juzemec! 22 Anutuzi aŋelo‐ticne soreme warejec; erâ laioŋ micjeŋic bâbâzickeme wiac moc mi enarembieŋ. No honecnume bahacmâc epe iŋuc enarejec. Â ŋicwofuŋ‐nane go wâc wiac hehesicne moc mi egarepo.” 23 Ŋicwofuŋ e ine bubiaŋ sâko manawec, ehuc Danie nombâŋkonec fârepie wefuocte muwec. Irec fârepie wefuwec hâcne. Ehuc sahacnao ʒâpâ moc mi honembiŋ, i Anutu manasiŋkewecte iŋuc fuawec. 24 Eme ŋicwofuŋzi mume Danie dâŋgieo râembiŋ ŋic i jaŋe â ŋokac naru motecfâc‐jeŋic jaŋe mâmâc rocjoparâ laioŋ jaŋere nombâŋko behec‐jopapie humbiŋ. Eme huha huhapie jaha mi laioŋ jaŋe kisuc qâsuc‐jopahuc siec‐jeŋic kinʒaŋ qanʒaŋne‐fârenʒepieŋ i!

25 Wiac iŋuc fuame ŋicwofuŋ Dariusizi ŋic gurune gurune â ŋicne ŋicne erâ dâŋne dâŋne mâreŋ sâc jurambiŋ jaŋerao papia moc ʒiŋuc qâreŋkerâ râeme rawec: “Wamazi ŋoŋerao qaja fuserâ fozejec. 26 No mumupaŋ dâŋ kecʒiŋuc râekopac: Nore uucmaŋko ŋic juraŋgpieŋ jaŋe Danie Anutu‐ticnere hâwic‐jopame araŋ bacnenʒepieŋ.

28 Iŋuc fuame Daniezi Dariusi â Perisia ŋic Kiru jahe ŋicwofuŋ jupic dameŋ ira juhâc qâhâmowec.