1 “O Israe ŋicbureŋ, no dâŋsanaŋ â mumutâc dâŋ qazu‐ŋarekopac i mana rereŋ enʒepieŋ, iŋuc ehuc sâcne juniŋmu, ehuc Wofuŋ mamacfâc‐ŋeŋic jaŋere Anutu e mâreŋ ŋare tahac ekac i ro rauc enʒepieŋ. 2 No dâŋ ŋaza qâmoc ekopac ira moc ʒuhuckerâ mumu me irecnec moc bârârierâ bebehe ine mi enʒepieŋ, aricne, Wofuŋ Anutu‐ŋeŋicte sâcmutâc dâŋ ŋaza mutâc ekopac i hâcne reŋkenʒepieŋ. 3 Wofuŋzi Baali‐Peoro haeo wiac ewec i ʒâŋe fâri‐ŋeŋiczi hone‐fârembiŋ; Wofuŋ Anutu‐ŋeŋic e Baali‐Peoro nemurao qohotambiŋ jaŋe hâcne ŋondeŋ‐ŋeŋickonec bâsirowec‐jopawec. 4 Wofuŋ Anutu‐ŋeŋictao qohotambiŋ ŋoŋe sasawa ine jumbiŋzi juŋgopieŋ jaha. 5 Manaŋgopieŋ, Wofuŋ Anutu‐nanezi naza mutâc ewec irec sâcko dâŋsanaŋ â mumutâc dâŋ qazu‐ŋarepo i ŋoŋe mâreŋ ro rauc eniŋmu ira juhuc mana rereŋ eniŋte iŋuc hâcne epo. 6 Irec ŋoŋe mana rereŋ eniŋ. Iŋuc epie ŋic gurune gurune jaŋe dâŋsanaŋ i mana‐fârerâ ŋoŋere manapie ŋic maŋɋârâŋ â mamanahec eha ʒiŋuc muŋareniŋmu: ‘Opoŋ, ŋicguru keci jaŋe jâmbomac maŋɋârâŋ â mamanahec juŋgopieŋ.’ 7 Me Wofuŋ Anutu‐nâŋec wira wâwâsic ecnepene nâŋâcnehec juekac irec sâc mo ŋicguru ʒâŋe biŋe sâkohec jaŋere nemuzi iŋuc ejareekac? 8 Me miŋecgac sâcmutâc dâŋ mutâcne‐ŋare‐fârekopac dâŋsanaŋ â mumutâc dâŋticne iŋucne i ŋicguru weni jaŋe moc bajuŋgopieŋ?

9 “Ŋoŋe wiac fua‐ŋareme ʒâŋe fâri‐ŋeŋiczi honembiŋ i jufeniŋmu sâc nikec‐ŋopazacte juju‐ŋeŋic soŋaŋkehuc aimuŋ junʒepieŋ, ehuc naru motec ŋosafâc‐ŋeŋic irec dâŋ binaŋ ejarenʒepieŋ. 10 Ŋoŋe Horebe tikio Wofuŋ Anutu‐ŋeŋicte maio domahapie Wofuŋzi ʒiŋuc nazawec: ‘Go ŋic ŋokac nore maio hetumaŋ‐jopatec dâŋnane jazape mananʒepieŋ, ehuc mâreŋko jufeniŋmu sâc araŋ banarehuc naru motecfâc‐jeŋic qazu‐jarenʒepieŋ. Ŋoŋe ʒoaŋ irec moc mi nikec‐ŋopazejec.’ 11 Eme ŋoŋe tiki fuŋnao warerâ domambiŋ. Ehame tikionec ʒocbâruŋ fuarâ feku sambâŋko qataraha duŋdapâc â hâweŋ karoraczi râreckehuc hae mâreŋ sâockerâ fowec. 12 Iŋuc fuame Wofuŋzi ʒocmaŋko juhuc dâŋ ŋazame manambiŋ, e jahacne ine mi honehuc mâc dâŋticne sawa manambiŋ. 13 E ʒâʒâfic‐ticnere dâŋ Sâcmutâc Sanaŋ Teŋ hâcne, i mana rereŋ eniŋte ŋazahuc qorac tapa jajahecko qâreŋkewec. 14 Wofuŋ e dameŋ ira hâcne dâŋsanaŋ â mumutâc dâŋ qazu‐ŋarepemurâ naza mutâc ewec, i ŋoŋe mâreŋ ro rauc eniŋmu ira juhuc mana rereŋ eniŋte iŋuc ewec.

15 “Wofuŋ e Horebe tikio ʒocmaŋko juhuc dâŋ ŋazawec dameŋ ira e jahacne mi honembiŋte aimuŋ junʒepieŋ. 16 Ehuc sâqorenʒipiŋte wiac i me i jaŋere hawari ɋâŋ qâqâtâc moc mi henʒepieŋ; ŋic hawari mecne, ŋokac hawari mecne, 17 me mâreŋ faio qowi juraŋgopieŋ jaŋere hawari mecne, 18 me mâreŋko wiac i me i foforâ jueŋgopieŋ jaŋere hawari mecne, me opâ qowi opâmaŋko jueŋgopieŋ jaŋere hawari mecne i moc mi banʒepieŋ. 19 Erâ wâc sambâŋko mosa ʒoaŋ â bâpiŋ wiac ŋeraŋgopieŋ jaŋe honec‐jopahuc araŋ bajarenʒipiŋte ira qâhâŋnerâ fipie mi fezejec. Wofuŋ e ŋic gâcne sasawa mâreŋko juraŋgopieŋ jaŋe wiac i araŋ bajareniŋte mutâcne‐jarewec hâcne. 20 Ŋoŋe miŋecgac Wofuŋte ŋicfâc eŋgopieŋ, iŋuc hâcne fuaocte Wofuŋzi ʒocmaŋkonec, Aigita mâreŋkonec hâcne, batarac‐ŋoparâ jowac‐ŋopa wefuwec. 21 Erâ wâc ŋoŋere erâ aaric mana‐narehuc no Jordaŋ opâ mi fotâcnepemurâ mupaŋke‐narewec. Erâ Wofuŋ Anutu‐ŋeŋiczi mâreŋ biaŋne ŋare tahac eme merâfâc mâreŋ‐ŋeŋic eocmu ira wâc mi raʒipemurâ hecke‐narewec. 22 No Jordaŋ opâ mi fotâcnehuc mâreŋ ʒira hâcne hâmozepac, ŋoŋe ine fotâcnerâ mâreŋ biaŋ forakac i ro rauc enʒepieŋ. 23 Ŋoŋe Wofuŋ Anutu‐ŋeŋiczi ŋoŋehec ʒâʒâfic ewec irec nikec‐ŋopame wiac qatara‐ŋarewec irec hawari ɋâŋ qâqâtâc wiac henʒipiŋte rucgereŋ‐ŋeŋic banʒepieŋ. 24 Wofuŋ Anutu‐ŋeŋic e ʒocbâruŋ iŋucne erâ ʒoɋac‐ticnehec hâcne.

25 “Ŋoŋe sawe mâririackerâ naru motec ŋosafâc‐ŋeŋic jaŋehec mâreŋ ira juku ŋic ŋokac qizec erâ ɋâŋ qâqâtâc i me i hehuc Wofuŋ Anutu‐ŋeŋicte maio wiac mamakâcne erâ maŋbâiŋ ecneniŋmuo 26 ine Jordaŋ opâ fotâcnerâ mâreŋ ro rauc eniŋmu ira jupie mi ʒoraha sipiricke‐jâmbâŋkeniŋmu. No miŋecgac sambâŋ â mâreŋ jahe hone manac ehapire dâŋ ʒi hâcne mukopac. 27 Eme Wofuŋ e ŋopa bâtâtiec eŋareme siŋsaŋ qarâ ŋicguru gâcne jaŋere ŋondeŋko rahuc ʒanʒaŋne erâ juniŋmu. 28 Ehuc ɋâŋ qâqâtâc jâc me qânâzi he fasaec ehuc ŋicmezi bakicne erâ wiac hone manac mi eene, me nânâ opâ mi nânâne me wiac âsune mi manaeŋgopieŋ jaŋe hâcne araŋ bajarehuc kiŋaŋ qajareniŋmu. 29 Mâc ŋoŋe ira juhuc Wofuŋ Anutu‐ŋeŋic maŋ qâqâtâc‐ŋeŋiczi wira basac ecnehuc sâcne bâfuaniŋmu. 30 Ŋoŋe juku ʒârâ hâriŋ faio juhapie wiac i sasawa maic‐ŋopaocmu dameŋ ira Wofuŋ Anutu‐ŋeŋictao risiehuc dâŋticne mana rereŋ eniŋmu. 31 Wofuŋ Anutu‐ŋeŋic e buuruc‐ticnehec, irec qâmâtâc eŋarehuc mi sipiric‐ŋopaocmu, me mamacfâc‐ŋeŋic jaŋehec ʒâʒâfic ehuc dâŋ mupaŋke‐jarewec irec wâc mi nikeckeocmu.

32 “Ŋoŋe mi fuarâ juhapie Anutuzi mâreŋko ŋic bâfuawec irecnec fuŋkerâ dameŋ fowefuwec irec maŋnao wiac qeŋ bipinehec ŋoŋe fua‐ŋarewec iŋucne moc ŋic gâcne jaŋe wâc fua‐jareme hone manac embiŋ me? Ŋoŋe irec fuŋne mananiŋte mâreŋ qaŋeŋne ŋifeckonec fuŋkerâ raku ŋifecko tarakac ira ŋic juŋgopieŋ jaŋe mu wioc ejarenʒepieŋ. 33 Ŋoŋe Anuture dâŋ ʒocmaŋkonec fuame manarâ jumbiŋ irec sâc ŋic weni jaŋe wâc manarâ jumbiŋ? 34 Me Wofuŋ Anutu‐ŋeŋiczi Aigita mâreŋko ʒâŋe fai‐ŋeŋicko mâsi bahuc ŋicfâc‐ticne bacŋopawec irec sâc mo nemuzi ŋicguru moc jaŋe e jahacne biŋe eniŋte mume wiac hâhâwicne kecʒiŋuc fua‐jareme tâpiri â mesanaŋ‐ticnezi ŋic gâcne jaŋere ŋondeŋkonec rocjopawec: Fific guguriŋ, wiac ʒâŋe furu fuŋne fuŋne erâ ʒika â wiac hâhâwicne sâko gâcne gâcne? 35 Wofuŋ e mocjahazi Anutu, e iŋucne moc mi jukac, irec fuŋne i ŋoŋe hâcne ŋaza ŋowatuc ekicne. 36 E fuŋne‐ticne ŋaza ŋowatuc eocte dâŋticne sambâŋkonec wahame hone manac embiŋ, â mâreŋko ine ʒocbâruŋ sâko‐ticne honembiŋ, ehuc ʒocmaŋkonec dâŋticne fuame manambiŋ wâc. 37 E maŋticne mamacfâc‐ŋeŋic jaŋerao foha ɋâricfâc‐jeŋic ŋoŋe rowosâec‐ŋoparâ e jahacne tâpirio Aigita mâreŋkonec jowac‐ŋopa wefuwec. 38 Ehuc ŋicguru gâcne jaŋe ŋoŋere sâc sirickehuc tâpiri sâkohec jumbiŋ jaŋe ʒâŋe fai‐ŋeŋicko jopa jâpec ejarehuc mâreŋ‐jeŋic ro rauc eniŋte ŋare tahac ewec. Eme miŋecgac irec fârine fuakac hâcne. 39 Irec ŋoŋe miŋecgac dâŋ ʒiŋuc mana maŋ enʒepieŋ: Moczi mâcne, Wofuŋ eki hâcne sambâŋko â mâreŋko Anutu jukac. 40 Irec dâŋsanaŋ â sâcmutâc‐ticne miŋecgac ŋaza mutâc ekopac i mana rereŋ enʒepieŋ. Iŋuc ehuc ŋaŋacne mecne â ɋâricfâc‐ŋeŋic jaŋe mecne juhâc qâhâmonʒepieŋ, ehuc Wofuŋ Anutu‐ŋeŋiczi mâreŋ fosanaŋke‐ŋareocte ŋare tahac ekac ira dameŋ ʒora junʒepieŋ.”

41 Eme Mose e Jordaŋ opâ ocniŋucnao hae jahec â moc jaŋe ŋeŋezic hae erâ ŋeniŋte rowosâec‐jopawec. 42 I ʒika qaqa ŋic moczi juwicnao ŋic âgo‐ticne râsi mi ecnehuc â qâhâmoocte wâc mi manasuhuc juku sifu qâhâmoocmuo ine hae ira wiserâ ra juocte iŋuc ewec. 43 Hae kecʒiŋuc jaŋe hâcne rowosâec‐jopawec: Bezere hae mâreŋ burocnere wâneŋko ŋewec i Rubeŋ guru jaŋere biŋe; Ramoti hae Gileade mâreŋko ŋewec i Gade guru jaŋere biŋe, â Golaŋ hae Basaŋ mâreŋko ŋewec i Manase guru jaŋere biŋe.

44 Mosezi Israe kikefuŋ sâcmutâc dâŋ mutâcne‐jarewec ʒine hâcne. 45 Israe kikefuŋ jaŋe Aigita mâreŋkonec wahapie Mosezi dâŋsanaŋ erâ mumutaniŋ â mumutâc dâŋ ʒi jaza‐fârewec. 46 Ine Jordaŋ opâ ocniŋucnao, Bete‐Peoro hae ŋifecnao Amori ŋicwofuŋ Sihoŋ Hesiboŋ haeo juwec, ere mâreŋko wâneŋ fokac ira hâcne jazawec. Mose â Israe kikefuŋ jaŋe Aigita mâreŋkonec waharâ ŋicwofuŋ Sihoŋ e hâcne bawahambiŋ. 47 Bawaharâ e jahacne â Basaŋ ŋicwofuŋ Ogo jahere mâreŋ ro rauc embiŋ. Jahe Amori ŋic jaŋere ŋicwofuŋzi Jordaŋ opâ ocniŋucnao ʒoaŋ wewefunaopec jupic hâcne. 48 Aronoŋ wâneŋ qaŋeŋnao Aroe hae ŋekac irecnec fuŋkerâ raku Sirioŋ tikio (Herimoŋ tiki hâcne) tarakac mâreŋ i hâcne ro rauc embiŋ. 49 Ehuc Araba wâneŋ Jordaŋ ocniŋucnao foraku Hâwec Hâmocnao, Pisiga tiki fuŋnao tarakac i mâmâc ro rauc embiŋ.