1 No mâreŋko juhuc ŋic jaŋerao wiac hehesicne kecʒiŋuc fuame honepe mi sâckeekac: 2 Anutu e ŋic moc e me e moneŋ mafa â ʒâŋe biŋe â fic hae erâ wiac gâcne sasaware ecneekac i mâmâc râcne‐fâreocmu mecne. Erâ ine ŋic e wiac i nâ bac ehuc bubiaŋ manazacte aka hecneha ŋic furune moczi nâ bac ehuc bubiaŋ manaocmu. Mâsi iŋucne i wiac fâri tâmiric erâ mi sâcke‐jâmbâŋkeekac. 3 Ŋic moc e dameŋ ʒora jufehame naru motecfâc‐ticne 100 fuacneniŋmu mecne, ehame jujuhâmo moc mi bâfuahuc juku hâmome biaŋne mi duckeniŋmuo ine ere manape wawahane eha kogoc hâmocne fuawec ere ine manape fefene eocmu. 4 Kogoc iŋucnezi fuarâ izia dapâcko sifuckeme ere nikec‐nâpoekac. 5 E ʒoaŋ tatamac moc mi honeocmu â jujure fuŋne wâc mi manaocmu, erâ sifu ŋic e sirickehuc jujumana haeo raocmu. 6 Kogoc iŋucnezi ŋic moc jara 2 tauseŋ jufehuc jujuhâmo mi bâfuaocmu ere sâc sirickeocmu hâcne. Erâ jahe sifu hae ijaha rakopirec.

7 Ŋic nâŋâc gie sasawa baeŋgopeneŋ i nânâ opâ‐nâŋec bâfuanaŋte baeŋgopeneŋ, erâ ine sâcnâŋec bâfua‐bipiehuc sifu manapene mi sâckeekac. 8 Ehame ŋic maŋɋârâŋheczi weniŋuc ehuc ŋic mutuc matacne sirickeme biaŋkeekac? Â ŋic qarâ suriŋne e juju biaŋnere fuŋne manaocmu izi sâcne bafickeocmu me? 9 Nâŋâc wiac fonâreekac irec manapene sâckezejec, me fonâre‐bipieha ʒuhuckerâ ronaŋte mupene ine sâqoreekac. Erâ i wiac fâri tâmiric jaha, mezi mâŋâŋ rorâ basanaŋkezo eipieeŋgopeneŋ irec sâc ekac.

10 Wiac sasawa fua raekac i fuaocte Anutuzi mârâc jaha maname fowec. Irec nâŋâc ʒiŋuc manaeŋgopeneŋ: Tâpiri‐nâŋec sirickehuc juekac ehec dâŋ mu qaqatarac sâcne mi enaŋmu. 11 Sifu ehuc dâŋ bocjaha mupene fâri tâmiric jaha eme wemo wiac biaŋne moc fua‐nâreocmu? 12 Ŋic nâŋâc mâreŋko juju dameŋ‐nâŋec bembeŋne â fâri tâmiric erâ mumuc iŋucne fuarâ omaeekac irec maŋnao weniŋuc jupene biaŋkeocmu i mo ŋiczi moc manaekac? Me ŋic nâŋâc juku hâmopene faicnao mâreŋko wemo wiac moc fuarâ foocmu i wâc mozi manarâ sâcne nâzâocmu?