1 No wiac sasawa irec manatâc qâtâc boc ehuc ʒiŋuc mana tarapo: Anutu e ŋic maŋɋârâŋhec â tiŋne jaŋere eebapa irec guriŋ bahuc maŋjauŋ â aaric‐jeŋicte guriŋ i wâc mâmâc baekac. Irec ŋic nâŋâc wemo wiaczi maic‐nâpoocmu i nâŋâc moc mi manaeŋgopeneŋ. 2 Wiac fuaocmu i ŋic mâmâc sasawa rocnâpoocmu, ŋic tiŋne â hehesicne, biaŋne â sâqocne, mitihec â miti tâmiric, Anutu araŋ bacneeŋgopeneŋ me mi bacneeŋgopeneŋ, nâŋâc mâmâc rocnâpo‐fâreocmu. Ine hâcne, sâqocne bapa wiac fuacneocmu sâc ijaha ŋic biaŋne fuacneocmu, â mumupaŋ dâŋ mi muocmu e ŋic mumupaŋ dâŋ mume wiac fuacneocmu irec sâc jaha fuacneocmu. 3 Ŋic mâmâc sasawa okacne sâc ijaha rofâreeŋgopeneŋ izi hâcne mâreŋko wiac gâcne fuarâ foekac i sirickehuc sâqoreekac. Ŋic jaŋe mâreŋko jufeeŋgopieŋ sâc mamanasu hehesicne â gâgâpâcne bajuku hâmorâ hâmokicne jaŋerao ʒuhuckeeŋgopieŋ. 4 Â moc e mâreŋko ɋâricne jueŋgopieŋ jaŋere ŋondeŋko juha woworic‐ticne foekac jaha; qâto moc juocmuzi laioŋ hâmocnere sâc sirickeocmu. 5 Ɋâricne jueŋgopieŋ jaŋe juku hâmonaŋmu i manaeŋgopieŋ, â hâmokicne jaŋe ine wiac moc mi manaeŋgopieŋ. Ehuc ʒuhuckerâ furi roro i mi eniŋmu, â ŋic moczi moc jaŋere mocwâc mi manasuniŋmu. 6 Jaŋe hâmohapie maŋjauŋ‐jeŋic â aaric‐jeŋic â ʒoɋac‐jeŋic i mâmâc omae‐fâreocmu. Jaŋe mâreŋko wiac i me i fuaocmu ira ʒuhuckerâ gie moc mi baniŋmu.

7 Ajoc, go nânâge nâhuc bubiaŋ manac, â waiŋ opâge nâhuc ʒeri ec, go iŋuc ecmurâ Anutuzi mârâc jaha biac mana‐gareme sâckewec. 8 Irec go dameŋ sâc ʒeri bubiaŋ faio juzemec. 9 Ŋokacgere egareekac ehec ʒeri bubiaŋ faio juzemec, Anutuzi mâreŋ ʒira juju fâri tâmiric garewec i fogareha iŋuc hâcne ezemec. Ehuc juju dameŋge fâri tâmiric sasawa irec ʒeri bubiaŋ manazemec, go mâreŋko ʒâic gie sâko bahuc juhaŋtec ʒeri bubiaŋ i sawa fua‐gareocmu hâcne. 10 Go gie i me i ʒoɋachec bazemec, i wemocte? Hâmokicne jaŋere haeo racmu ira gie me mamana me mamana tara me maŋɋârâŋ moc mi fokacte iŋuc hâcne ezemec.

11 Erâ no mâreŋko wiac kecʒiŋuc wâc fuame honepo: Ŋic gasackeeŋgopieŋ jaŋe mao fisirâ furi mi roeeŋgopieŋ, â ŋic ʒoɋachec jaŋe ʒikao mi sanaŋkeeŋgopieŋ, â ŋic maŋɋârâŋhec jaŋe nânâ wiac boc mi bâfuaeŋgopieŋ, â mamana sâkohec jaŋe moneŋ mafa boc mi hureeŋgopieŋ, â ŋic mamana sarichec jaŋe gie fekicne boc mi rauckeeŋgopieŋ. Jaŋe sasawa wiac busâqocnehec fua‐jareekac hâcne. 12 Ŋic nâŋâc dameŋ banârekicne i moc mi manaeŋgopeneŋ. Ine qowi jaŋe mi manahuc bitiŋko raʒipie kicjopaekac, â hâwec qowi jaŋe wâc mi manahuc wasaŋko jowaeŋgopieŋ irec sâc jaha ŋic nâŋâc mi manahuc juhapene dameŋ sâqocnezi ututuŋ jaha maic‐nâpoekac.

13 No mâreŋko wiac kecʒiŋuc wâc fuame honerâ manape boc fefene ewec: 14 Mâreŋ mocko hae piticne moc ŋewec, erâ ŋecjucfâc‐ticne jaŋe afecne sawa. Ehame ŋicwofuŋ tâpirihec moczi momorifâc‐ticne jaŋehec fisirâ hae i somâckembiŋ. Somâckerâ qânâsac âkeʒurâ haeo feniŋte ʒae wiac bambiŋ. 15 Erâ hae irec maŋnao ŋic hapetac moczi maŋɋârâŋhec juwec. E maŋɋârâŋ dâŋticnezi hae i râsifâc‐ticne jaŋere meonec batarawec. Ehame ʒâhec ine ŋic ere mocwâc mi manasumbiŋ. 16 No iŋuc honerâ ʒiŋuc mana tarapo: Maŋɋârâŋzi tâpirire sâc sirickehuc wiac fefene ekac; ŋic gâcne jaŋe ine ŋic waha qaqanere maŋɋârâŋ qaisockeeŋgopieŋ â dâŋticne wâc qikiŋneeŋgopieŋ.

17 Ŋicguru mutuc matacne jaŋere micnezi dâŋ musokahuc mume hazec mi râenʒepeneŋ, ŋic maŋɋârâŋheczi dâŋ urucne mume ine mana rereŋ epene biaŋkeocmu. 18 Maŋɋârâŋzi ʒikare wiac sirickehuc gie biaŋne baekac, â bâbâsifuc ŋic mocjaha maczi ine wiac biaŋne bocjaha ima baekac.