EFESO
Paulo e miti kiŋaŋ ʒâʒâŋiŋ moc rawec, i ra juku risieocte wareku Efeso haeo fisiwec. Erâ i jaŋehec juhuc miti gie mi bawec, mâc jowarurâ warewec. Eme ʒâhecko miti kiŋaŋ mocwâc rarâ Efeso haeo jara 2 â nâfocne iŋuc juhuc ŋic miti jazame mâretec haŋ bawec. Eme irec hâcne ŋic qâpuc tucne jaŋe, nemu sâko‐nâŋec ere ufuŋ i qoroc heocmu, muhuc dâŋsâko jâmbâŋ bâfuarâ ŋic bâiŋ‐jopapie ʒika bâfuazo embiŋ. Efeso i Asia mâreŋ masune irec hae qizec sâko ŋewec. Eme ira miti fuahuc rârec rârec hae ŋerawec ira mâmâc fua rawec. Eme Paulo e ʒâhec kâpâcwâru ficko ŋehuc papia i wirec‐jeŋic qâreŋkewec. Erâ Tikiko râcneme barâ rawec (Efeso 6:21–22).
Mitire fuŋne kecʒiŋuc qâreŋke‐jarewec: Anutuzi juwicnao dameŋ tâmiricko biŋefâc‐ticne enaŋte mana wosâec‐nâpohuc miti fufuare dâŋ birickewec. Izi ʒâhec Dameŋne maickeme Jesu râehuc hatane bâfuawec (gaŋ 1). Mârâc jaha juju kosa juhapie sâqocnezi âke fâuc‐ŋopame gurune gurune jumbiŋ. Eme Wofuŋzi rocŋoparâ sambâŋte jujuo râec‐ŋopame maŋ mocjaha â guru mocjaha embiŋ (gaŋ 2). Anuture dâŋ soŋne i Wofuŋzi Paulo mufuacnewec. Dâŋ soŋnere fârine Jesuzi hâcne bâfuawec (gaŋ 3). Juju guru mocjaha embiŋ. Irec mitio gegec dodoc boc mi juzo, erâ qâpuc juju â sâqocne fuŋne fuŋne qikiŋnezo (gaŋ 4). Tatamacko juhuc dapâcte wiac râsi ecnezo, dameŋ mi spirickezo, mitire momori wiac bajuhuc râsi mi hohonene jopa jâpec ezo. Faŋdâŋ i â gâcne qâreŋke‐jarerâ ŋic ŋokac, neŋgoc mamac â naru, otec, ŋicbomboŋ â kiŋaŋ qaqa mitidâŋ kâdoc qajarewec (gaŋ 5 â 6).
1
Jambuŋdâŋ
Paulo no Anuture micte Jesu Kristore aposolo epozi Efeso haeonec mitiŋic, Kristo Jesu manasiŋkeeŋgopieŋ hâcne, ŋoŋere papia ʒi râekopac. Rom 1:7; Kol 1:1; Kor I 1:2 Mamac‐nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnera fozejec. Kol 1:2
Anutu e mârâc jaha miti hata muʒâwe‐nârewec
Wofuŋ‐nâŋec Jesu Kristo ere Anutu â Mamac, eki sambâŋkonec miti jambuŋ‐ticne fuŋne fune Kristore erâ nâre tahac ewecte mumbiaŋkenʒepeneŋ. Efe 2:6 Eki mârâc jaha jâmbâŋ mâreŋte hobeteŋne mi fuahame mai‐ticnao maŋfuru â bahacmâc junate Kristore erâ mana wosâc enârewec. Joh 15:16; 17:24; Efe 5:27; Rom 8:29 E qanaŋ maname fowecte hâcne Jesu Kristore erâ maŋjauŋ enârehuc naru motecfâc‐ticne erâ junaŋte buafec‐ticnere mupaŋke‐nârewec. Joh 1:12 E joroc Ŋokâ‐ticnere erâ aki anonoc biaŋ‐ticne tahac‐nâpowecte muteŋ bâteŋ ecnenʒepeneŋ. Mat 3:17; Kol 1:13
Jesure soczi kitâc‐nâpowec
Jesu e socticnezi kitâc‐nâpowecte sâqocne bâbâtâmire fua‐nârewec, i aki anonoc‐ticnere ʒâkâŋ fokac irec sâc hâcne. Kol 1:14, 20; Efe 2:7; 3:8, 16 Eme ʒâkâŋ‐ticnao maŋɋârâŋ â mamana fâri bâmâckehuc qoŋgiŋke‐nârewec. Kol 1:9 Ehuc maŋbuc‐ticnere dâŋ, qanaŋ maname biaŋkeme ʒiŋuc âkendâŋnewec i mujaŋgeŋke‐nârewec: Efe 3:9; Rom 16:25 10 “No guriŋne bahape dameŋ maŋkepo i qosackeme Kristozi wiac sasawa, sambâŋko mecne mâreŋko mecne, qâturehuc irec fuŋqizecne ezejec.” Gal 4:4; Kol 1:16 11 Ere erâ, wiac sasawa maŋticnere mupaŋkerâ baekaczi mârâc jaha hone wosâec‐nâporâ miti merâfâc rauckenaŋte munârewec. Kol 1:12; Rom 8:28 12 Eme irec Kristore mamanac jumbeŋ jueŋgopeneŋzi Anufu ʒâŋe rara‐ticnere mumuteŋfâc erâ junʒepeneŋ. 13 Eme ŋoŋe iŋuc jaha dâŋ fâri qizecne, bâbâpiaŋ‐ŋeŋicte Biŋebiaŋ hâcne, ro maŋ ehuc Kristo manasiŋkepie Tiri Mâro qanaŋ biŋe qanârekicne i ŋareme maqâreŋhec embiŋ. Efe 4:30; Kol 1:5, 6 14 Sambâŋko huhure biŋe‐nâŋec fokac, irec ʒâʒâficne Mâro nârekicne. Eme Anutu ʒâŋe rara‐ticnere mumuteŋ sâko fuaocte biŋefâc‐ticne nâŋâcnao Mârozi bâbâpiaŋ gie fuŋkewec i batarazokac. Kor II 1:22; 5:5
Miti jaŋerao qaja fuserâ foocte Paulozi nunumu gie bawec
15 Eme ŋoŋe Wofuŋ Jesu manasiŋkeeŋgopieŋ â mitiŋic âgofâc‐nâŋec maŋjauŋ ejareeŋgopieŋ, irec biŋedâŋ manapore Kol 1:4, 9 16 ŋoŋere dameŋ sâc manasuhuc Wofuŋ daŋge mumuteŋ ecneekopac. Kol 1:3 17 Ehuc ŋoŋere ʒiŋuc numuekopac: Wofuŋ Jesu Kristo ere Anutu, eri tatamac Mamac hâcne, eki Mâro ŋareme izi maŋɋârâŋhec bacŋoparâ Wofuŋte fuŋne mufua‐ŋareme mana taranʒepieŋ. Kol 1:10 18 Erâ maŋʒâŋe‐ŋeŋic bâtâcneme ine Wofuŋzi rocŋopahuc sambâŋ ʒeŋaŋ biŋe qaŋarewec, ire manapie fârine ezejec, â fuŋfuŋfâc‐ticne ŋoŋe huhure ʒâŋe rara biaŋ kadahe ŋarewec, irec wâc manapie fârine ezejec, Sâc 33:3, 4; Efe 1:7; Kol 1:5, 11 19 â mamanasiŋhec nâŋâcnao tâpiri soka makakicne i teqâ saki‐ticnezi gie baekac sâc bâfuawec, irec iŋuc jaha manapie fârine ezejec. Kor II 13:4; Kol 1:11; 2:12 20 Tâpiri irec fuŋne Kristo hâmockonec bâɋârerâ sambâŋko mefâre‐ticnao râehuc bataniŋkewec. Mi Mâ 110:1 21 Ehuc kia gawaman â ŋicwofuŋ â fekicne fuŋne fuŋne jaŋere femicne sâko râewecte mâreŋko â sambâŋko ʒâŋe biŋe fokac izi gâkowakac, dameŋ ʒiŋucziare sawa mâcne, iŋuc fohuc juocmu sanaŋ. Kol 1:16; 2:10 22 Erâ wiac sasawa maŋfuŋnao heteckehuc kike‐ticnere rurumaŋko guruc‐jopahuc qizec‐jeŋic eocte âkendâŋnerâ kikefuŋ gurufâcne jaŋerao râewec. Mi Mâ 8:6; Mat 28:18; Efe 4:15; Kol 1:18 23 Eme jaŋe me kikefâc‐ticne ehapie ŋihe umbiŋ ejarehuc fofotâc juhuc wiac sasawa sâcke raekac. Rom 12:5; Kol 1:19; Kor I 12:27; Efe 4:10

1:1: Rom 1:7; Kol 1:1; Kor I 1:2

1:2: Kol 1:2

1:3: Efe 2:6

1:4: Joh 15:16; 17:24; Efe 5:27; Rom 8:29

1:5: Joh 1:12

1:6: Mat 3:17; Kol 1:13

1:7: Kol 1:14, 20; Efe 2:7; 3:8, 16

1:8: Kol 1:9

1:9: Efe 3:9; Rom 16:25

1:10: Gal 4:4; Kol 1:16

1:11: Kol 1:12; Rom 8:28

1:13: Efe 4:30; Kol 1:5, 6

1:14: Kor II 1:22; 5:5

1:15: Kol 1:4, 9

1:16: Kol 1:3

1:17: Kol 1:10

1:18: Sâc 33:3, 4; Efe 1:7; Kol 1:5, 11

1:19: Kor II 13:4; Kol 1:11; 2:12

1:20: Mi Mâ 110:1

1:21: Kol 1:16; 2:10

1:22: Mi Mâ 8:6; Mat 28:18; Efe 4:15; Kol 1:18

1:23: Rom 12:5; Kol 1:19; Kor I 12:27; Efe 4:10