2
Mose fuawec
Eme Lewi guruonec ŋic moczi ra Lewi guruonec jaha ŋokac moc rowec. Eme ŋokac e juku motec kiweckerâ rowec. Erâ motec e sahac hawari‐ticne biaŋne, iŋuc honerâ soŋkeme foha mosa jahec â moc tarawec. Eme ʒuhuckerâ ficko soŋkeocte maname quŋkeme sasac moc soroqeczi fukicne i rorâ kikisune sâfâzi bâbâzicke‐fârerâ motec ira râeme hume Nilu opâ mecnao ʒamac ʒamac maŋko heme ŋewec. Eme seŋticnezi ine wiac i me i moc fuacneme honezepac muhuc taicko soŋaŋ domawec. Ehame Farao otâ‐ticne e opâ ruaocte ra fisiwec, eme kiŋaŋ narufâcne jaŋe opâ mecnao rac warec ehuc juhapie naru e sasac i bâfuarâ kiŋaŋ naru‐ticne moczi roocte soreme huwec. Eme bawefume tapane rorâ mi motec moc kiohuc foha honezejec i! Ehuc bune sâqoreme muwec: “Hebiraio ŋic jaŋere ɋâric moc ʒine hâcne.” Eme seŋticnezi Faraore otâ ʒiŋuc âzâcnewec: “No ra Hebiraio ŋokac moc âzâcnepe ware motec moŋ gume‐garezac me?” Eme Faraore otâzi âzâcnewec: “Ra iŋuc ec.” Eme naru e ra motec neŋgoc‐ticne jowa warewec. Ware fisime Faraore otâzi âzâcnewec: “Go motec kecʒi bararâ moŋ gume‐narezemec, eme no irec furine garepemu.” Eme ŋokac e motec bararâ moŋ gumehuc juwec. 10 Eme motec e sokame Farao otâ‐ticne bara râcneme motec‐ticne erâ juwec. Ehame ʒâŋe‐ticne kecʒiŋuc muhuc Mose muwec: “No opâonec fârepe wefuwec hâcne.”
11 Eme Mose e juku soka tararâ dameŋ mocko Israe ŋic âgofâcne jaŋerao rarâ kâpâcwâru gie bahuc juhapie honec‐jopawec. Ehuc Aigita ŋic moczi Hebiraio ŋic âgofâcne jaŋeraonec moc qame honewec. 12 Erâ ŋifec â ŋifec ŋic jaŋere ʒâŋe fime arictac eme Aigita ŋic qâhâmorâ moŋgeŋzi hefackewec. 13 Hae fureme mocwâc rarâ Hebiraio ŋic jajahec perec eec ehapire ŋic âgo‐ticne maŋgâŋ qawec e ʒiŋuc âzâcnewec: “Go wemocte âgoge qakomec?” 14 Mume eki dâŋ ʒiŋuc bâtikiecnewec: “Nâŋere ŋic fekicne me mumutara ŋic i mozi râecguwec? Go Aigita ŋic qâhâmomec iŋuc jaha no qâhâmocnuzo mukomec me?” Iŋuc mume Mosezi hâwickeme ʒiŋuc manasuwec hâcne: “Wiac epac i biac mana‐fâreŋgopieŋ i.” 15 Eme Faraozi biŋe manarâ Mose qaocte qâqâreŋne qawec.
Mosezi Midiaŋ mâreŋko wiserâ rawec
Mose eki ine Faraoraonec wiserâ Midiaŋ mâreŋko ra juwec. E ira fisirâ opâ nombâŋ mocte heririŋko waha ŋewec. 16 Eme Midiaŋ ŋic jaŋere taha bapa ere otâfâc 7 jumbiŋ. Eme jaŋe ware mamac‐jeŋicte lama bulimakao opâ gumec‐jopaniŋte opâ fiarâ otoo hoŋkepie huwec. 17 Ehame qowi soŋaŋ jaŋe fisirâ jâpec‐jopambiŋ. Iŋuc epie Mosezi faharerâ naru bafic‐jopahuc qowifâc‐jeŋic opâ gumec‐jopawec. 18 Eme jaŋe mamac‐jeŋic, ʒâŋene Reguele, Jetoro hâcne, erao fisipie ʒiŋuc wio‐jarewec: “Ŋoŋe miŋecgac weniŋuc erâ biac jâmbâŋ wareŋgopieŋ?” 19 Jaŋe mumbiŋ: “Aigita ŋic moczi soŋaŋ jaŋe jâpec‐nâpopie bafic‐nâpojec, ehuc opâ fia‐nârerâ qowifâc‐nâŋec gumec‐jopajec wâc.” 20 Eme otâfâcne wio‐jarehuc muwec: “Ŋic e wena? Ŋoŋe wemocte behepie ŋejec? Wiracnepie ware nânâ nâzejec.” 21 Eme Mose e ŋic ehec juocte maname sâckewec, ehame ŋic e otâ‐ticne Ʒibora Mose râcnewec. 22 Eme juku motec kiweckerâ rowec. Rome Mose e ʒiŋuc muhuc ʒâŋene Geresom muwec: “No mâreŋ furunao jaba jukopac.”
23 Eme juku Aigita ŋicwofuŋ Faraozi hâmowec. Israe ŋic jaŋe ine kâpâcwâru giezi bâmâc‐jopame mu huacbuc â kio wâwâsic embiŋ. Eme kâpâcwâruo juhuc kio wâwâsic epie Anuturao fe fisiwec. 24 Eme Anutu e mu huacbuc‐jeŋic manarâ Abraham, Isaka â Jakobo jaŋehec ʒâʒâfic ewec irec manasuwec. 25 Erâ Anutu e Israe ŋic jaŋe hone ʒemuraŋ ejarehuc batarac‐jopaocte manasuwec.