19
Sinai tikio fisimbiŋ
Israe ŋicguru jaŋe Aigita mâreŋkonec waha rahuc juhapie mosa jahec â moc eha ʒoaŋ ijaha jâmbâŋ Sinai mâreŋ burocnao fisimbiŋ. Jaŋe Refidim hae mâreŋ beherâ raku Sinai mâreŋ burocnao fisirâ ira ŋec juc embiŋ. Ehuc Sinai tiki mendâŋko toma âterâ fombiŋ. Mosezi ine Anuturao fewec. Ehame Wofuŋzi tikionec wirahuc âzâcnewec: “Go Jakobore ɋâricfâc, Israe ŋicguru hâcne ʒiŋuc muhuc jazazemec: No Aigita ŋic jaŋe wiac ejarepo â ŋoŋe tucwipere fakec faio tinac bacŋopa warepo i ŋoŋe hone‐fârembiŋ. Eme ʒi dâŋnane mana rereŋ ehuc ʒâʒâfic‐nane bajuniŋmuo ine ŋicne ŋicne jaŋere ŋondeŋko ŋicfâc‐nane bacŋopapemu, mâreŋ sâko mâreŋ i nore biŋe ekac hâcne. Ŋoŋe taha bapazi uucmaŋ‐nane rauckerâ ŋicguru tirine moc erâ junarenʒepieŋ. Go dâŋ i hâcne Israe ŋic jazazemec.”
Eme Mose e waharâ ŋicguru jaŋere micne bapa hetumaŋ‐joparâ Wofuŋzi dâŋ âzâcnewec i furu jaha jaza‐fârewec. Eme ŋic jaŋe ʒeŋgoma ʒiŋuc âzâcnembiŋ: “Wofuŋzi dâŋ muwec i reŋke‐fârenaŋte muŋgopeneŋ.” Eme Wofuŋzi Mose âzâcnewec: “No karorac maŋko gorao fâzo ekopac, eme no gohec dâŋ muc manac ehapere ŋicguru jaŋe manarâ dâŋge mana ʒakiehuc junʒepieŋ sanaŋ.”
Iŋuc mume Mose e ŋic ŋokac jaŋere dâŋ i Wofuŋ âzâcnewec. 10 Eme Wofuŋzi Mose âzâcnewec: “Go ŋicguru jaŋerao hurâ jazatec jaŋe miŋecgac â tomâcko maŋsowa juhuc ŋaqi wiac‐jeŋic ʒurenʒepieŋ. 11 Ehuc ʒawierâ juhapie ʒoaŋ namba 3 maickezejec. Eme ʒoaŋ ira hâcne Wofuŋzi ŋic ʒeŋgoma jaŋere ʒâŋe faio Sinai tikio wahaocmu. 12 Goki ine aka hajarehuc ʒiŋuc jazazemec: ‘Ŋoŋe tikio fenʒipiŋte me tiki qaŋeŋne sawa moc ba bâuac enʒipiŋte rucŋeŋic banʒepieŋ. Moc e tiki ba bâuac eocmu e hâmo‐jâmbâŋkezejec. 13 Ŋic moczi moc mi bâuazejec, bâuame qânâzi hehâmozo me tepezi muru‐hâmozo, ŋic me qowi e moc mi jujâmbâŋkezejec.’ Qeŋ ʒoricne dâŋeme manarâ ine tiki fuŋko warenʒepieŋ.” 14 Iŋuc mume Mosezi tikionec ŋic jaŋerao waharâ ʒawieniŋte jazawec, eme jaŋe ŋaqi‐jeŋic ʒurembiŋ. 15 Eme ŋic ŋokac ʒiŋuc jazawec: “Ŋoŋe sowa juhapie ʒoaŋ namba 3 maickezejec. Ehame ŋokac ba bâuac moc mi ejarenʒepieŋ.”
16 Eme ʒoaŋ namba 3 hae fureme ɋuŋ parandaŋ hehuc fowec â karorac ɋâfoŋne moc waha tiki botâŋne foŋkewec erâ qeŋ sokawec dâŋeme ŋic tomao jumbiŋ jaŋe ɋarac ɋarac qambiŋ. 17 Iŋuc fuame Mosezi ŋic ŋokac jaŋe Anutuhec bâbâfuac eniŋte tomaonec jowac‐jopame tikifuŋko birickerâ domambiŋ. 18 Eme Wofuŋ e ʒocmaŋko tikio wahawecte tikizi hosâc qame hosâc‐ticnezi hosâc qeŋqeŋko feekac iŋucne fewec, erâ tiki i mâretec ɋiɋiteckehuc ŋewec. 19 Ehame qeŋzi soka makawec dâŋeme Mose e dâŋ mume Anutuzi okacne ɋuŋmaŋko bâtikiecnewec. 20 Erâ Wofuŋ e Sinai tikio wahawec, tiki botâŋnao hâcne. Ehuc Mosezi tiki botâŋnao feocte wiracneme fewec. 21 Eme Wofuŋzi Mose âzâcnewec: “Go hurâ ŋicguru uŋ jazac, jaŋe Wofuŋ no honecnuniŋte aka huckerâ wefuhuc bocjahazi hâmo sipiric enʒipiŋte. 22 Erâ taha bapa Wofuŋ maickeeŋgopieŋ jaŋe iŋuc jaha maŋsowa juhuc ʒawienʒepieŋ, mi epie Wofuŋ noni sipiric‐jopazipore.” 23 Eme Mosezi Wofuŋ âzâcnewec: “Ŋic ŋokac jaŋe Sinai tikio sâcne mi wefuniŋmu, i go gahac uŋsawaŋ enârehuc ʒiŋuc mumeŋte: ‘Tiki râreckehuc sac barâ furu muzemec.’ ” 24 Eme Wofuŋzi âzâcnewec: “Go huc, eme Aroŋ jowatec mâmâc wefuzepirec, taha bapa â ŋic ŋokac jaŋe ine Wofuŋ norao wefuniŋte aka mi huckenʒepieŋ; epie Wofuŋ noni sipiric‐jopazipohec.” 25 Iŋuc mume Mosezi ŋicguru jaŋerao waharâ jazawec.