1 Eme Wofuŋzi Mose kecʒiŋuc âzâcnerâ muwec: 2 “Go Israe ŋicguru jaŋe taha wiac râe‐nareniŋte jazazemec. Râeniŋte maŋjeŋic afeckeekac ŋic i jaŋeraonec sasawa nore taha ronʒepieŋ. 3 Jaŋeraonec tahare wiac kecʒiŋuc ronʒepieŋ: Gol, siliwa, aeŋ bâbâroŋ, 4 qoruc furi sâko keŋkeŋne â âmuc âmucne, qoruc hahameŋne â noniŋ kanʒaŋne, 5 lama ŋicnere sahac peŋ bâbâroŋzi rikekicne, noniŋ sahac â jâmiŋjâc, 6 lambere wokemaŋ, rurua wokemaŋte â hosâc âsu ririkere wiac âsu biaŋhec. 7 Erâ taha bapare qoqonaŋ ŋaqi â qâticnere qânâ furi sâko bâbâroŋ â qânâ furi sâko gâcne gâcne. 8 Eme jaŋe furufic moc banarepie no ŋondeŋ‐jeŋicko ŋec juc ezepac. 9 No tiri boze â maŋnao wiac ŋeraocmu hawarine gowatupemu irec sâcko jâmbâŋ bafârenʒepieŋ.

10 “Eme jaŋe jâmiŋjâczi katapa moc banʒepieŋ, ʒoricne‐ticnere sâc kubi* 1 kubi sâcmeta moc 18 inses me 46 senti meta irec sâc. jajahec â nâfocne, otecne‐ticnere sâc kubi mocjaha â nâfocne â hâŋne‐ticnere sâc kubi mocjaha â nâfocne jaha. 11 Eme maŋne â sahacne gol ɋaɋacnezi foŋkezemec, erâ qaŋeŋne moc golzia râreckerâ bazemec. 12 Erâ reŋ raraʒi 4 golzi barâ katapa kikenao basanaŋkezemec, ine ŋifec jajahec â ŋifec jajahec. 13 Erâ jâmiŋzi reŋ jajahec fasaerâ golzi foŋkezemec wâc. 14 Eme katapa reŋkeniŋte reŋ i katapa ŋifecnao reŋ raraʒi basanaŋkekicnao esorietec raʒizejec. 15 Eme reŋ i moc mi unuckehuc katapahec jaha behepie fozejec. 16 Erâ sâcmutâc dâŋ garepemu i katapa maŋko râetec hurâ fozejec. 17 Iŋuc efârerâ golzi tapane moc bazemec, ʒoricne‐ticne kubi jajahec â nâfocne â otecne ine kubi mocjaha â nâfocne. 18 Erâ go kerubim hawari jajahec golzia bazemec, gol hedapirekicnezi hâcne tapanere qaŋeŋnao bazemec. 19 Kerubim hawari moc ŋifec â moc ŋifec iŋuc râec‐jofatec jahe tapanehec qâfâsâehuc qaŋeŋne ŋifec â ŋifec ŋezepirec. 20 Eme kerubim jahe mamaic erâ ŋehuc fakec‐jekic tapa hezickehuc faicpec qaratiepire domazejec, ehame ʒâŋe mai‐jeŋic tapaopec enduŋkezepirec. 21 Go tapane katapa fainao hetec ŋezejec â katapa maŋnao ine sâcmutâc garepemu i râetec hurâ fozejec. 22 Eme gohec ira bâbâfuac enacmu, erâ kerubim tapa fainao ŋekopirec jahere ŋondeŋko domahuc dâŋ gazapemu sasawa i Israe ŋicguru jaza mutâc ezemec.

23 “Eme go jâmiŋzi tebo moc bazemec, ʒoricne‐ticnere sâc kubi jajahec â otecne‐ticnere sâc kubi mocjaha â hâŋnere sâc kubi mocjaha â nâfocne. 24 Erâ gol ɋaɋacnezi foŋkerâ mecqaŋeŋne rârec rârec ine gol ɋâfoŋnezi bazemec. 25 Erâ tebo rârec rârec qaŋeŋne moc metapere sâc, â irec qaŋeŋne moc golzi ba akic ekicne i mâmâc râezemec. 26 Erâ irec reŋ raraʒi 4 golzia barâ gurucne 4 kikene fokacko basanaŋkezemec. 27 Reŋ raraʒi ine qaŋeŋnere heririŋko jâmbâŋ domazejec. 28 Go reŋ i jâmiŋzi fasaerâ golzi ɋorockezemec, eme reŋ izi hâcne katapa reŋkezo. 29 Eme go taha wiac rârâere oto â amae â waiŋ bâzire kiruŋ â râqâc kâwinehec bazemec wâc, i gol ɋaɋacnezia ba akic ehuc bazemec. 30 Erâ go tebo ira poroŋ furu mukicne i dameŋ sâc nore maio râetec fozejec.

31 “Lambe dodoma i gol ɋaɋacnezia bazemec. Kikene â wâtuŋne i gol hedapirekicnezi bazo, â râqâc‐ticne erinehec â ʒariŋ ɋoŋnehec i gol hâcbuczia bazemec. 32 Eme wâtuŋkonec sohocne 6 râwiŋnerâ domanʒepieŋ, ŋifec sohocne jahec â moc â ŋifec sohocne jahec â moc jaha. 33 Erâ wawec kaoŋne ɋoŋnehec iŋucne ʒariŋ ɋoŋne jahec â moc sohocne ŋifec â ŋifec ira bazemec; lambe dodomare wâtuŋkonec sohocne 6 râwiŋnerâ domaŋgopieŋ ira iŋuc hâcne bafârezemec. 34 Erâ lambe dodomare wâtuŋko ʒariŋ ɋoŋnehec iŋucne 4 râezemec. 35 Ine ʒiŋuc bahuc râezemec; ʒariŋ ɋoŋnehec sohocne moc biri wâŋ irec juwicnao, moc biri 2 irec juwicnao, moc biri 3 irec juwicnao, iŋuc hâcne ehuc sohocne 6 ŋifec â ŋifec râwiŋnerâ domaŋgopieŋkoa râe razemec. 36 Sohocne â ʒariŋ ɋoŋnehec i ɋâfâsâerâ fozejec, ehame gol ɋaɋacne hedapirekicnezi bazemec. 37 Erâ go lambe‐ticne 7 bazemec, eme lambe i fainao hetec ŋehuc wiac mamai fokac i batamae‐fârezejec. 38 Lambe qoruc bâbâtâc â râqâc‐ticne i gol ɋaɋanezia bazo. 39 Gol bâwiŋke‐hâmokicne ŋemâc‐ticne 100 izi lambe dodoma â wiac i sasawa bazo hâcne. 40 Erâ manakic, tikio hawarine gaza gowatuc epemu irec sâcko jâmbâŋ bafârezemec.