1 Eme Wofuŋzi Mose âzâcnewec, “Qorac tapa jajahec qanaŋ fasaec‐jofakicne iŋucne mocwâc fasaec‐jofazemec, eme qorac tapa qanʒaŋ‐jofameŋ jahere faio dâŋ qâreŋkekicne fowec ijaha qâreŋkepemu. 2 Irec go uupicte ʒawiezemec. Erâ furicte Sinai tikio wefurâ tiki botâŋko nore maio fuazemec. 3 Erâ moczi moc gohec moc mi wefuzepirec, â moczi moc tikio moc mi juzejec, â lama bulimakao wiac jaŋe tiki fuŋko ware nânâ mi nânʒepieŋ.” 4 Iŋuc mume Mosezi qorac tapa jajahec mârâc fasaec‐jofakicne iŋucnea fasaec‐jofawec. Erâ Mose e furic uupicte Wofuŋzi mutâcnecnewec irec sâcko qorac tapa jajahec bacjofarâ Sinai tikio fewec. 5 Eme Wofuŋ e karorac maŋko waharâ erao domawec. Eme Mose e Wofuŋte ʒâŋe riwaseckeme 6 Wofuŋzi ere ʒâŋe maio fotâcnehuc kecʒiŋuc wirawec: “Wofuŋ, Wofuŋ e Anutu buuruc â aki anonoc‐ticnehec, kimbeŋ‐ticne urucne, erâ maŋjauŋ â erâ‐eesanaŋ i ɋârâŋnea focnekac. 7 E ŋifec kiŋtofa â qaqatara â sâqocne bâtâmirehuc ŋic tauseŋne tauseŋne ehâmo‐jarehuc juekac, â ŋifec ine kiŋhec jaŋere fuŋne mi mana pitiwahuc naru motec ŋosafâc‐jeŋic bazu‐jare raekac.” 8 Iŋuc mume Mose e picpac jaha mâreŋko fodapewec. 9 Ehuc muwec, “O Wofuŋ, go nore manatec sâckekacko ine sifu ŋondeŋ‐nâŋecko juhuc nâŋehec mâmâc razemec, ŋicguru ʒi jaŋe râŋgeŋ qaŋqaŋne juŋgopieŋ hâcne. Erâ kiŋ bahac â sâqocne‐nâŋec behehuc biŋefâcge bacnâpozemec.”

10 Eme Wofuŋzi muwec, “Manakic, no ʒâʒâfic moc bâfuapemu. No ŋicgurufâcge sasawa jaŋere maio mâsi moc bapemu, mâsi iŋucne mâreŋ sâko mâreŋ irec faio mecne â ŋicne ŋicne jaŋere ŋondeŋko mecne moc mi fua wefuwec, eme ŋicguru ŋondeŋ‐jeŋicko jukomec jaŋe ʒeŋgoma Wofuŋ nore gie bapare fuŋne honenʒepieŋ; no wiac qeŋ bipinehec eŋarepemu hâcne.

11 “No miŋecgac dâŋ ŋazakopac i mana rereŋ enʒepieŋ. Manaŋgopieŋ, no Amori ŋic, Kanaaŋ ŋic, Hitiŋic, Periʒi ŋic, Hiwiŋic â Jebusi ŋic ʒâŋe fai‐ŋeŋicko jâpec‐jopapemu. 12 Ŋoŋe rucŋeŋic banʒepieŋ, mâreŋ raʒiniŋmu irec rune jaŋehec juhuc ʒâʒâfic moc epie dâŋzi bitiŋ râe‐ŋarenʒipiŋte. 13 Ŋoŋe alata wiac‐jeŋic heropienʒepieŋ, nemure qânâ wâtuŋ wiac‐jeŋic qanʒaŋnenʒepieŋ â nemuɋâŋ‐jeŋic hezu henʒaŋnenʒepieŋ. 14 Ŋoŋe nemu gâcne moc mi numu‐jarenʒepieŋ. Wofuŋ nore ʒâŋe ‘Ʒoɋachec’; no Anutu ʒoɋac‐nanehec hâcne. 15 Ŋoŋe mâreŋ irec rune jaŋehec ʒâʒâfic moc mi enʒepieŋ, jaŋe nemufâc‐jeŋic jaŋerao qohotahuc bâzi rike‐jareniŋte hefârec‐ŋopapie nemure tiwâ ʒepec nânʒipiŋte 16 erâ narufâc‐jeŋic rocjoparâ motecfâc‐ŋeŋic jarepie ŋonâŋfâc‐jeŋic juhuc nemufâc‐jeŋic araŋ bajarehuc motecfâc‐ŋeŋic eatuc‐jopapie jaŋe wâc nemufâc‐jeŋic jaŋerao qohotanʒipiŋte.

17 “Ŋoŋe gol rike dockekicnezi nemu qâqâtâc moc mi banʒepieŋ.

18 “Goreŋ sowa hombaŋ ŋehuc junʒepieŋ. Ŋoŋe goreŋ sowa juhapie ʒoaŋ gie bapa 7 tarazejec, ine ŋazapo irec sâc mosa dameŋ April‐ko ŋenʒepieŋ, ŋoŋe mosa dameŋ ira hâcne Aigita mâreŋkonec wahambiŋ. 19 Mârâc fufua sasawa ŋic me qowi i nore biŋe, qowi ŋicne mârâc fufua, bulimakao â lama mârâc fufua hâcne. 20 Doŋgi mârâc fufua irec okacne lama râenʒepieŋ, me okacne mi râezo murâ ine doŋgi upene qâpirickenʒepieŋ. Motecfâc‐ŋeŋic mârâc fufua jaŋere okacne wâc râenʒepieŋ. Erâ moczi moc nore maio metariŋ mi fisinʒepieŋ.

21 “Ŋoŋe ʒoaŋ gie bapa 6 gie sâcne baniŋmu, ʒoaŋ namba 7 ira ine hombaŋ ŋenʒepieŋ, ine gie hesarac dameŋko me qa roro dameŋko hombaŋ ŋenʒepieŋ wâc. 22 Erâ woka hombaŋ, bâbâsu hombaŋ hâcne, i mecne â jara tataranao waiŋ qa roro irec hombaŋ mecne i mâmâc ŋenʒepieŋ. 23 Ŋic ʒeŋgoma jaŋe jara mocte maŋnao arec jahec â moc Wofuŋ Anutu, Israere Anutu hâcne, nore maio fuanʒepieŋ. 24 No ŋoŋere maio ŋic gurune gurune jâpec‐joparâ hae mâreŋ‐ŋeŋic bâsokapemu, eme jara mocte maŋnao arec jahec â moc Wofuŋ Anutu‐ŋeŋic fua‐nareniŋte rahapie moczi moc mâreŋ‐ŋeŋicte andac mi ezejec.

25 “Ŋoŋe qowi bâzi‐nanere soc i poroŋ goreŋhec mi rikenʒepieŋ, erâ aakic hombaŋte lama bâzi i tiwâne râepie foha hae mi furezejec. 26 Nânâ bâbâsu dameŋko wiac fârine biaŋne i Wofuŋ Anutu‐ŋeŋic nore ficko bafenʒepieŋ. Erâ lama motecne i neŋgocnere susuhec mi rikenʒepieŋ.” 27 Erâ Wofuŋzi Mose âzâcne muwec, “Go dâŋ i qâreŋkezemec, no dâŋ izi hobeteŋne eha go â Israe ŋic ŋoŋehec ʒâʒâfic mocwâc ekopac hâcne.” 28 Eme Mose e ira Wofuŋhec nânâ opâ tâmiric juhame ŋafe ʒoaŋ 40 tarawec. Ehame ʒâʒâficte dâŋ, Sâcmutâc Sanaŋ Teŋ i hâcne qorac tapao qâreŋkewec.

29 Eme Mose e Sinai tikionec wahahuc Sâcmutâc Sanaŋ Teŋ irec qorac tapa jajahec i meo bacjofa wahawec. Ehuc faic Wofuŋhec dâŋ muc manac epicko ʒâŋe mai‐ticne tatamachec ewec tatamac i foha waha fisiwec, i e jahac mi manawec. 30 Eme Aroŋ â Israe ŋicguru sasawa jaŋe Mose honembiŋ i ʒâŋe mai‐ticne tamaeme honerâ hâwic‐jopame maŋfuŋ‐ticnao mi rambiŋ. 31 Eme Mosezi wira‐jareme Aroŋ â kikefuŋte micne bapa jaŋe Moserao rapie jaŋehec dâŋ muc manac embiŋ. 32 Izi ʒâhec Israe ŋic ŋokac sasawa jaŋe ware maŋfuŋnao fisipie eki Wofuŋzi Sinai tikio sâcmutâc dâŋ âzâcnewec i bâtikie‐jare‐fârewec. 33 Dâŋ jaza‐fârerâ ʒâŋe mai‐ticne rurufazi qofackewec. 34 Erâ dameŋ sâc Wofuŋhec mai ecneme dâŋ dâŋ enicte rurufa bârârierâ mâc domaha Wofuŋzi dâŋ âzâcneku âzâcne‐fârewec. I tarame waharâ dâŋ âzâcne mutâc ekicne sasawa i Israe ŋicguru bâtikie‐jare‐fârewec. 35 Eme dameŋ ira Mose ʒâŋe mai‐ticne tamaeme Israe ŋicguru jaŋe hone jumbieŋ. Irec Mose e ʒâŋe maine rurufazi mocwâc qofackeme foha Anuturao fefe dameŋ‐ticne maicke jujec.