2
Wofuŋzi Eʒekie giedâŋ mucnewec
1 Eme eki ʒiŋuc nazawec: “Ŋicte ɋâric, go fahare domatec dâŋ gazape.” 2 Iŋuc nazame Anuture Mârozi maŋnaneo hurâ baafecnume fahare domapo, ehuc dâŋ nazame manapo. 3 Kecʒiŋuc: “Ŋicte ɋâric, no Israe ŋic jaŋerao sorecgupe razemec. Jaŋe ŋicguru qaqatarahec, jaŋe pepec enarembiŋ, ehuc jaŋe jaŋacne mecne â mamacfâc‐jeŋic jaŋe mecne dâŋnane qatarahuc jumbiŋzi juŋgopieŋ jaha. 4 Ŋicguru i jaŋe sindaŋ hârindaŋne â maŋrâŋgeŋhec, irec no jaŋerao sorecgupe dâŋ ʒiŋuc fuŋkerâ jazazemec: ‘Wofuŋ Anutuzi ʒiŋuc mukac.’ 5 Iŋuc fuŋkerâ jazatec jaŋe mananiŋmu me qataraniŋmu ine sifu ʒiŋuc mana taraniŋmu: Ŋondeŋ‐nâŋecko porofete moc jukac. 6 Ŋicte ɋâric, go ŋic repicne me sindaŋ hârindaŋne jaŋe rârecgupie omeqaqa faio tinac ŋehuc sifu jaŋe jaŋacne me dâŋjeŋicte mi hâwicguzejec, â râsi ʒâŋe honecgupie maŋge mi gâckezejec. Jaŋe kikefuŋ qaqatarahec hâcne. 7 Eme jaŋe mananiŋmu me qikiŋneniŋmu go sifu dâŋnane jaza‐jâmbâŋkezemec, jaŋe kikefuŋ qaqatarahec hâcne.
8 “Ŋicte ɋâric, go ine dâŋ gazape manahuc kikefuŋ qaqatarahec jaŋe iŋucne mi ezemec, go micge aŋkerâ wiac garepemu i nâzemec.” 9 Eme fipe rame mi moczi papia foforiekicne badomahuc meticne noraopec sicnehame honezepac i! 10 Eme nore maio qaratieme ʒiŋuc honepo: Maine â râpene i qâreŋhec sasawa, ʒâic busâqoc â makuc erâ bu qâqânduc dâŋ qâreŋkekicnezi fowec hâcne.