1 Jara 6 irec mosa namba 6 jaha â irec ʒoaŋ gie bapa 5 ira Judaŋic jaŋere soŋaŋ micne jaŋehec nore ficko ŋehapene Wofuŋ Anuture tâpirizi norao fua taniŋkewec. Iŋuc fuame mi wiac moc ŋic hawari tinac honezepac i! 2 Gâjoŋ‐ticne juwicnao ʒoc ʒahuc fowec â irec faicnao wiac moc aeŋ bâbâroŋ iŋucne bâruŋkehuc tamaewec. 3 E wiac moc me tinac izi sicnerâ qizec gere‐naneo rorâ fârecnuwec, ehame maŋnane ŋerisieme manape Mârozi sambâŋ â mâreŋ ŋondeŋ‐jekicko bacnu ferâ Jerusalem haeo râecnuwec tinac ewec. Ehuc miti ufuŋte hae ʒoŋa piticne irec motâc faic mâreŋ maickerâ fokac â maŋbâiŋ bâbâfua nemuɋâŋ ŋeekac ira hâcne râecnuwec. 4 Eme no Israere Anutu ere huriri qâreŋ mârâc jaha wâneŋko fuame honepo irec sâc fua‐narewec.

5 Eme Wofuŋzi ʒiŋuc nazawec: “Ŋicte ɋâric, go faic mâreŋkopec fitec feoc.” Eme no faic mâreŋkopec fipe feme alatare sacmotâc faic mâreŋkopec fokac ira maŋbâiŋ bâbâfua nemuɋâŋ ŋeme honepo. 6 Ehame Wofuŋzi ʒuhuckerâ ʒiŋuc nazawec: “Ŋicte ɋâric, Israe kikefuŋ jaŋe ufuŋ‐naneonec jâpecnuniŋte wiac mamakâcne sâko ehuc jueŋgopieŋ i moc honekic me? Erâ go wiac mamakâcne honemeŋ irec sâc sirickehuc honecmu jaha.”

7 Eme eki jowacnume hae ʒoŋare motâcko fisirâ ʒiŋuc honepo: Sâpeo hawec fuarâ fowec. 8 Eme dâŋ ʒiŋuc nazawec: “Ŋicte ɋâric, go sâpe bâmârâŋkec.” Eme bâmârâŋkerâ mi motâc moc domame honezepac i! 9 Ehame ʒuhuckerâ dâŋ ʒiŋuc nazawec: “Go raʒirâ ʒira wiac mamakâcne sâko eeŋgopieŋ i honezemec.” 10 Iŋuc nazame raʒirâ wiac kecʒiŋuc honepo: Sâpeo rârec rârec ira wiac babarâ jujune â qowi repicne erâ Israe kikefuŋ jaŋere nemuɋâŋ irec hawari wiac bakicne. 11 Eme jaŋere heririŋko Israe kikefuŋte soŋaŋ micne 70 domahapie Jaʒania, Safaŋte ŋokâ hâcne, e ŋondeŋ‐jeŋicko domawec. Jaŋe sasawa hosâc âsu ririkere râqâc badomahapie hosâczi ŋezuhuc fewec. 12 Eme Wofuŋzi kecʒiŋuc wio‐narewec: “Ŋicte ɋâric, Israe kikefuŋte soŋaŋ micne jaŋe ru sâc hawari doma rakac i rauckehuc dapâcko hosâc âsu rike‐jareŋgopieŋ i moc honekomec me? Jaŋe ʒiŋuc mueŋgopieŋ hâcne: ‘Wofuŋzi mi honec‐nâpoekac, e mâreŋ‐nâŋec qâmâtâ ecnewec.’ ” 13 Erâ ʒuhuckerâ ʒiŋuc nazawec: “Go wiac mamakâcne honemec irec sâc sirickehuc honecmu jaha.”

14 Izi ine Wofuŋ ufuŋ‐ticnere motâc faic mâreŋ maickerâ fowec ira jowacnume mi ŋokac jaŋe Tamuʒi nemure kiohapie honec‐jopazepac i! 15 Eme ʒiŋuc wio‐narewec: “O ŋicte ɋâric, go wiac ʒi honekomec me? Go wiac mamakâcne honemec irec sâc sirickehuc honecmu jaha.”

16 Iŋuc murâ jowacnume Wofuŋ ufuŋ‐ticnere hae ʒoŋa piticnao raʒipec. Eme Wofuŋ taha ufuŋ‐ticnere hae ʒoŋa alata ŋondeŋ‐jekicko motâc fuŋnao ŋic 25 domahapie honec‐jopapo. Jaŋe Wofuŋte taha ufuŋ râpeckehuc ʒoaŋ wewefunaopec ʒâŋe firâ ʒoaŋ fodapecnehuc numucnembiŋ. 17 Eha ʒiŋuc nazawec: “O ŋicte ɋâric, go wiac i honekomec me? Judaŋic jaŋe wiac mamakâcne irec manapie aafecne eha wiac repicne gâcne ʒuhuckerâ bâfuapie mâreŋ sâcke‐fâreekac. Jaŋe bâmiriŋnu‐bipiehuc sifu maŋbâiŋ enareeŋgopieŋ. 18 Eme no irec hâcne ʒuhuckerâ aaric mana‐jarepemu, ehuc busâqoc mana‐jarehuc mi akic‐jopapemu. Jaŋe wira wâwâsic enare‐bipiehapie sifu micjeŋicko moc mi ropemu.”